பெரியாரின் மயிரைப் பிடுங்கி...

தொண்டு செய்து பழுத்த பழம்
தூய தாடி மார்பில் விழும்
- புரட்சிக் கவிஞர் பாரதிதாசன்

வான் தவழும் வெண்மேகத் தாடியாடும்
வளையாத சிந்தனைக்கோர் ஆட்டம் இல்லை
- கவியரசு கண்ணதாசன்

வெண்தாடி வெளிச்சம்
- கவிஞர் கலி.பூங்குன்றன்

நின் அடையாளம்
தாடியும் தடியும்
நீதான் எங்கள்
அடியும் முடியும்
- கவிப்பேரரசு வைரமுத்து

உன் முகத்தில்
படர்ந்திருக்கும்
நரைமுடிகள்
போதிமர வேர்கள்!
- கவிஞர் பழநிபாரதி

சவரம் செய்யும் நேரம் கூட என் சமூகத்திற்குப் பயன்பட வேண்டும் என்று நினைத்த தங்கள் தலைவனின் அடையாளத்தை பாடி மகிழ்ந்தனர் கவிஞர்கள். சுருக்கமாகச் சொன்னால் தந்தை பெரியாரின் தடிக்கு நிகராய் பாடல் பெற்ற தலம்தான் தாடி.

சிங்கமாய்ச் சிலிர்க்கும் அந்த முகத்துக்கு வனப்பு சேர்த்தது அவரது தாடி! பார்ப்போரை கவர்ந்திழுத்த அந்தத் தாடியைக் கவர்திழுத்த கதை தெரியுமா? இதோ கேளுங்கள்!

06.03.1973 - காரைக்குடி பகுதிக்கு எப்போது வந்தாலும், கல்லுக்கட்டியில் இருக்கும் என்.ஆர்.சாமியின் கடைக்கும், வீட்டுக்கும் வராமல் இருக்கமாட்டார் தந்தை பெரியார். அப்படி ஒரு முறை என்.ஆர்.சாமி ஸ்டோர்ஸ்-இல் அமர்ந்திருக்கிறார் பெரியார். உடன் புகைப்படம் எடுக்க என்.ஆர்.எஸ்-இன் பேரன், பேத்திகளை வீட்டிலிருந்து அழைத்து வந்தார்கள். மற்றவர்கள் பெரியாரின் அருகில் நின்று புகைப்படம் எடுத்துக்கொள்ள, கைக்குழந்தையாக இருந்த என்னாரெசு பிராட்லாவைக் (என்.ஆர்.எஸ்-இன் இரண்டாம் மகன் சாமி திராவிடமணியின் இரண்டாம் மகன்) கையில் தூக்கி வைத்துக் கொண்டு புகைப்படம் எடுக்கச் சொல்கிறார்.

படம் எடுத்த பின் சாமிசமதர்மம் கையில் குழந்தையைத் தரும்போது 'ஆ..' என்று துடிக்கிறார் பெரியார். பிறகு தாடியைத் தடவிக் கொள்கிறார்.
என்னவென்று பார்த்த சமதர்மம் குழந்தையின் பிஞ்சு விரல்களின் நடுவில் தாடி முடி இரண்டு ஒட்டி வந்திருப்பதைக் கவனிக்கிறார்.
"அய்யா.. தாடிங்கய்யா.." என்கிறார் சமதர்மம்.
"ம்..ம்.. " என்று தாடியைத் தடவியபடி சிரிக்கிறார் பெரியார்.

அந்த இரண்டு முடிகளையும் பத்திரப்படுத்துகிறார் சமதர்மம். உடனிருந்த மாவட்டப் பொருளாளர் இரா.சுப்பிரமணியம் தனக்கு ஒன்று தருமாறு நீண்ட நாட்களாகக் கேட்க, ஒன்றை தந்துவிட்டார். (பின்னர் அது தொலைந்துபோனது)
மற்றொன்றை தன் சொத்தாகப் பாதுகாக்கும் சாமி.சமதர்மம் சொல்கிறார்,
"ஸ்பிரிங் கம்பி மாதிரி இருக்கு அய்யா முடி. அத்தனை உறுதி. நான் என் மகனுக்குத் தரும் உயரிய பொருள்.. சொத்து.. எல்லாம் இந்த மயிர்தான். " என்று சொல்லிச் சிரிக்கிறார். (எனக்குத்தான் ... எனக்குத்தான்)

புத்தரின் பல் பாதுகாக்கப்படுகிறதாம் இலங்கையில்.
அப்படி தந்தை பெரியாரின் உயிர்ப்பொருள் ஒன்று இன்னும் பாதுகாக்கப்படுகிறது எனில், அது தாடிமுடியாகத் தான் இருக்கும். அன்று
பெரியாரின் தாடி மயிரைப் பிடுங்கிய தி.என்னாரெசு பிராட்லா இன்றைய காரைக்குடி நகர தி.க. செயலாளராகப் பணியாற்றி வருகிறார்.

குறிப்பு: இந்தச் செய்தி கவிஞர் பழநிபாரதியின் தந்தையார் சாமிபழனியப்பன் எழுதிய 'நினைவு மலர்கள்' நூலிலும் இடம்பெற்றுள்ளது.