இடஒதுக்கீடு இடைக்காலத் தடை: நம் கடமை

உயர்கல்வியில் பிற்படுத்தப்பட்டோருக்கு 27% இட ஒதுக்கீடு அளிக்கும் மத்திய அரசின் சட்டத்திற்கு எதிராக தொடுக்கப்பட்ட வழக்கை விசாரித்த உச்ச நீதி மன்றம் சட்டத்திற்கு இடைக்காலத் தடை விதித்து(stay) தீர்ப்பு அளித்துள்ளது. இந்த அரசியல் சட்டத்திற்கு விரோதமான தீர்ப்பு ஒடுக்கப்பட்டோரிடையே பெரும் கொந்தளிப்பை ஏற்படுத்தியுள்ளது.
"1931-ஆம் ஆண்டு எடுக்கப்பட்ட மக்கள்தொகை கணக்கெடுப்பின்படி இந்த இடஒதுக்கீடு வழங்கப்படுவதால் இதை ஏற்க முடியாது. அதன்பின் சூழல்கள் மாறியுள்ளது. இப்போது சமூகத்திலும், பொருளாதாரத்திலும் பின்தங்கியவர்கள் யார் என்பதை மத்திய அரசு தெளிவாகக் கூற வேண்டும். இது வாக்குவங்கியைக் கணக்கில் கொண்டு இயற்றப்பட்ட சட்டம்" என்றெல்லாம் தன் போக்கில் உளறியிருக்கிறார்கள் உச்சிக்குடுமி உச்சநீதிமன்ற நீதிபதிகள்.
"வாக்குவங்கியைக் குறிவைத்துத் தான் இடஒதுக்கீடு" என்பது அப்பட்டமான இடஒதுக்கீட்டு எதிர்ப்பாளர்களின் வெற்றுக்கூச்சலாகும். அதையே நீதிபதிகள் பயன்படுத்தியிருப்பது அவர்கள் யார் என்பதை அடையாளம் காட்டுகிறது.சரி, "1931-ன் படி பிற்படுத்தப்பட்டோர் எண்ணிக்கை இல்லை; எனவே இப்போது ஜாதி வாரியாக கணக்கெடுப்பு எடுக்கப்படவேண்டும்" என்கிறது தீர்ப்பு! அதாவது பிற்படுத்தப்பட்டோர் எண்ணிக்கை குறைந்துள்ளது என்ற கருத்தில்தான் இந்த வார்த்தைகள் பயன்படுத்தப்பட்டிருக்கின்றன. அவர்கள் சொற்படியே வருவோம். வாக்குவங்கியைக் குறிவைத்துத் தான் இடஒதுக்கீடு என்றால் இடஒதுக்கீட்டால் பலன் பெறுவோர் அதிகம் என்றுதானே பொருள். அப்படி இருக்க, பிற்படுத்தப்பட்டோர் எண்ணிக்கை குறைந்திருப்பது போன்ற தோற்றத்தை அடுத்தடுத்த வரிகளிலேயே போட்டு, தங்கள் அவசர ஆத்திரப் புத்தியைக் காட்டிக்கொண்டுள்ளனர் இரண்டு பார்ப்பனரல்லாதாத உயர் ஜாதி நீதிபதிகள்.
ஜாதி வாரியாக எடுக்கப்பட்ட பழைய கணக்கெடுப்புகளைக் காட்டக்கூடாது; சமூக அளவில் பிந்தங்கியவர்களை அடையாளம் காட்டவேண்டும் என்று சொல்லும் நீதிமன்றம்தான் - இடஒதுக்கீட்டின் மூலம் நாட்டைத் துண்டாடப் பார்ப்பதாகத் தாவிக் குதிக்கிறது. எத்தனை முரண்பாடுகள்.
சரி, சந்தடி சாக்கில் சிந்து பாடுவதைப் போல "சமுதாயத்தில் பிந்தங்கியவர் களோடு,'பொருளாதாரத்தில்' பிந்தங்கியவர்கள்" என்றும் ஒட்டுப் போடுகிறது உயர்ஜாதி ஊசி!
உச்சநீதி மன்ற நீதிபதிகளுக்கும் இடஒதுக்கீட்டு முறை பின்பற்றப்பட வேண்டும் என்ற கோரிக்கையின் முக்கியத்துவம் இப்போது இன்னும் நன்றாகத் தெரிகிறது.இதற்கு நமது எதிர்ப்பையும், தமிழர்களின் உணர்வையும் காட்டும் விதத்தில் ஜனநாயக முற்போக்குக் கூட்டணிக் கட்சிகள் 31.3.2007 அன்று தமிழகம் தழுவிய அளவில் முழு வேலைநிறுத்தம் செய்ய முடிவு செய்துள்ளன. இதில் அனைத்துத் தரப்பாரும் கலந்து கொண்டு நம் உணர்வைக் காட்ட வேண்டியது அவசர, அவசியமாகும்.
மாணவர்களின் பங்கெடுப்பும் இதில் மிகவும் அதிகமானதாக இருக்கவேண்டியது அவசியமாகும். மாணவர் போராட்டத்தத் தவிர்க்கத் தான் தேர்வு அதற்கான தயாரிப்புகள் என்று மாணவர்கள் நெருக்கடியில் இருக்கும் இந்த நேரத்தில் தீர்ப்பு வருகிறது. ஆனாலும் நாங்கள் விழிப்போடிருக்கிறோம் என்பதை சமூகத்திற்குக் காட்டவேண்டிய தருணத்திலிருக்கிறோம்.