அன்புடன் - அடுத்த காப்பி (வித் அனு)

அடுத்தடுத்து காப்பிக் கடை நடத்திக் கொண்டிருக்கும் சன் தொலைக்காட்சியின் அடுத்த கடை!

சன் -னில் வெளிவந்த விளம்பரத்தைப் பற்றியும், கவுதமி நிகழ்ச்சியை நடத்துவது பற்றியும் என் தங்கை சொன்னதுமே "காப்பி வித் அனு"வா என்று கேட்டேன். நிகழ்ச்சியின் முதல் விருந்தினர் யாராக இருக்கும் சொல்லு என்று கேட்கும்போது அது பத்மஸ்ரீ கமல்ஹாசன் அவர்களாகத் தானிருக்கும் என்று நினைத்தேன். நான் நினைத்தபடியே 'ஆமாம்' என்றாள் தங்கை.

"எப்படிண்ணா கண்டுபிடிச்ச?"
"இதைக் கண்டுபிடிக்கிறதுக்கு C.B.I-யில இருந்து ஆபீசரா வருவாங்க" என்ரு விவேக் பாணியில் சொல்லிவிட்டு, நிகழ்ச்சியை எதிர்பார்த்துப் பார்த்தேன்.

கமல் கலந்துகொள்ளும் நிகழ்ச்சி அல்லவா... நன்றாகத் தானிருந்தது.
சுஜாதா பாணியில் சொல்லவேண்டுமானால் "இடையிடையே அந்த 'லாப்டாப்'பை எடுத்துக் கொடுப்பதும், அதை இயக்க சொல்லித் தருவதும், அதற்கும் ஒரே முறை எடுத்த காட்சியையே திரும்பத் திரும்பப் பயன்படுத்துவதும் ஈராக்-கை விட பெரும் போராக இருக்கிறது " என்று சொல்லலாம்.

அது போகக் கடைசியில் கையெழுத்து வாங்கும் அனுவுக்கும், கைரேகை பதிக்கச்சொல்லும் கவுதமிக்கும் எவ்வளவு ஒற்றுமை என்பதற்கு இது ஒன்றே போதுமானது.

கமல் பேட்டியைப் பொறுத்தவரை, சித்தப்பா என்ற முறையில் அனு தவறவிட்ட வாய்ப்பை நண்பர் என்ற முறையில் கவுதமி பயன்படுத்திவிட்டார்.

கமல் அவர்களை கவுதமி, 'சார்' என்றழைப்பதை என் நண்பர்கள் பலர் செயற்கையாக இருக்கிறது என்று சொன்னாலும், இப்படித் தான் அழைத்துக்கொள்வார்கள் என்ற நமது எதிர்பார்ப்பே அதற்கு காரணமாக இருக்கும்.

மற்றபடி, நிகழ்ச்சி வழக்கம் போல் நன்றாகவே இருந்தது. இன்னும் விஜய் தொலைக்காட்சியின் பல்வேறு நிகழ்ச்சிகளையும் நாம் சன்னில் எதிர்பார்க்கலாம்.

கொசுறு -1:
கடந்த 'அசத்தப்போவது யாரு' நிகழ்ச்சியில் 'சத்யராஜ்' அடித்த ஒரு காமெண்ட் நிகழ்ச்சியை கு(உ)றித்தது: "நான் தொடர்ந்து இந்த நிகழ்ச்சியைப் பல வாரங்களாக பார்த்து வருகிறேன்" என்றார்.
பின்குறிப்பு:
'அசத்தப்போவது யாரு'வின் இரண்டாவது நிகழ்ச்சி அது! ஒருவேளை தன் பாணியில் கிண்டலடித்துவிட்டுப்போனாரோ என்னவோ?1


கொசுறு -2:
அண்மைக்காலத்தில் சன் குழுமத்தில் தமிழ்சொற்கள் இடம்பெறுவதாக நண்பர்கள் சொன்னார்கள். குங்குமம் "பெஸ்ட் கண்ணா பெஸ்ட்"டிலிருந்து, "உசத்தி கண்ணா உசத்தி"க்கு வந்திருக்கிறதாமே! அதைப்போலத் தான் 'அன்புடன்' தலைப்புமாக இருக்கலாம். இல்லாவிட்டால், என்ன தலைப்பு வைத்திருப்பார்கள்?

"டீ வித் திருவாளர்"
"கோக் வித் கவுதமி"
இன்னும் வேறு என்னவெல்லாம் இருக்கலாம் என்பதை பின்னூட்டுங்களேன்.


முந்தைய 'அசத்தப்போவது யாரு' பற்றிய பதிவுக்கு.....