PRINCENRSAMA

கள்ள நோட்டைக் கண்டுபிடிப்போம் வாங்க!

2012-01-26T06:44:00.000+05:30

கடந்த ஓராண்டுக்கும் மேலாகவே எ.எ.வி.வி. (எண்ணி எழுதாமல் விட்ட விசயம்) மற்றொன்று - கள்ளநோட்டு விவகாரம். நாடெங்கும் இப்பிரச்சினை கவனம் பெற்றிருக்கும் சூழலில் இப்போதாவது எழுதிவிடுவோம் என்ற வேகத்துடன் அதிகாலை 4மணிக்கு எழுதத் தொடங்குகிறேன்.

--------------------------------------------------------------------

கையில் கிடைக்கும் நோட்டு ஒத்தையோ கத்தையோ, அது கள்ள நோட்டா நல்ல நோட்டா என்று சோதனை செய்து, பணத்தைக் கொடுத்தவர் வயிற்றில் பீதியைக் கிளப்பி ஆராய்ச்சி செய்யும் பழக்கம் 2010-ன் இறுதிவாக்கில், மின்னஞ்சலில் கிடைத்த தகவல்களைக் கொண்டு எதார்த்தமாய் தொடங்கியது.

எனது ஆய்வில்... கிட்டத்தட்ட ஆய்வாகவே இதைச் செய்தேன் என்பதை அருகில் உள்ளவர்கள் அறிவார்கள்- நொந்த மனத்துடன்....! ஏன்னா அவங்க கிட்ட இருந்துதானே கத்தையைப் புடுங்கி ஆராய்ச்சி பண்ணுவேன். அவங்களுக்கும் இந்த ஆய்வு நோய் தொற்றிக் கொண்டது என்பதையும் சொல்லித்தான் ஆக வேண்டும்.

எங்களது ஆய்வில் மிகக் குறைந்த அளவு என்று எடுத்துக் கொண்டாலும் 15 % முதல் 25% வரை கள்ள நோட்டுப் புழக்கம் இருந்துவருகிறது என்பதைத் தெரிந்து கொள்ள முடிந்தது. உண்மையில் அது பெரிதும் அதிர்ச்சியளிக்கக் கூடியதாகவே இருந்தது. 1000, 500 மட்டுமல்லாமல், சர்வ சாதாரணமாக 100 ரூபாய், 50 ரூபாய், 20, 10 வரைக்கும் கள்ள நோட்டுகள் இருக்கின்றன.

வங்கிகளில் பீதியைக் கிளப்பிய அனுபவமும் உண்டு. SBI-ல் சென்று அவர்கள் கொடுத்த இரண்டு 500 ரூபாய்த் தாள்களில் ஒன்று கள்ள நோட்டு என்று நான் சொன்னதும் அரண்டு, மிரண்டு, கள்ள நோட்டு கண்டுபிடிக்கும் எந்திரத்தில் எல்லாம் வைத்துப் பார்த்தனர். ‘இல்ல சார்’ என்று பதறிய காசாளர், கடைசியில் ஏன் வம்பு என்று எனக்கு நோட்டை மாற்றிக் கொடுத்துவிட்டார். உடன் வந்த நண்பருக்கு பேரதிர்ச்சி..! வங்கியில் கூட எது கள்ள நோட்டு என்று கண்டுபிடிப்பதில் இருக்கும் தெளிவின்மை.

ஏ.டி.எம் எந்திரங்களில் இருந்தும் கள்ளநோட்டுகள் வந்திருக்கின்றன. ஒருமுறை தானியங்கி காசுவழங்கும் எந்திரத்தில் இருந்து தோழர் (பலர்பால் தானே!) எடுத்துக் கொடுத்த 10000 ரூபாயைக் கவனித்துப் பார்த்ததில் 40% அதாவது 4000 ரூபாய் கள்ள நோட்டு! பிறகு அவர்கள் குடும்பத்துக்கே அது குறித்து விளக்கம் அளித்தேன். கள்ள நோட்டு எது என்று கண்டுபிடிக்க அன்றைக்கு இணையத்தில் இருந்து இரண்டு இணைப்புகளை அவர்கள் எனக்கு அனுப்பினார்கள். அவ்விரண்டில் RBI கொடுத்திருந்த விளக்கத்தில் நான் சொன்ன தகவல்கள் இல்லை. காரணம் அது 1999 ஆண்டுக்குரிய எச்சரிக்கை! இன்றும் அது இணையத்தில் உள்ளது. மற்றொரு இணைப்பு வேலை செய்யவில்லை. (http://pauri.nic.in/IdentyFakeNote.htm)

காலந்தோறும் கள்ளநோட்டுகளின் தரம் உயர்ந்தே வந்திருக்கிறது. எத்தனையோ நுணுக்கங்களை அரசு கொணர்ந்தாலும், அவற்றை அடுத்தடுத்த பதிப்பில் உயர்த்திக் கொண்டே வருகிறார்கள் கள்ளநோட்டு தயாரிப்பாளர்கள். நான் பார்த்த கள்ளநோட்டுகளின் தரமும் வெவ்வேறு விதத்தில் இருந்தது. பார்த்த உடனே பளிச்சென வித்தியாசம் தெரியும் வகை ஒன்று. அந்த நோட்டுகளை அச்சின் தரத்திலும், வண்ணங்களைக் கொண்டுமே எளிதில் கண்டுபிடித்துவிடலாம். ரோஸ் நிறம் அப்பிக் கிடக்கும் 50 ரூபாய் நோட்டுகளும் மஞ்சளாய் இல்லாமல் பச்சை நிறத்துக்கு மாறி இருக்கும் 500 ரூபாய் நோட்டுகளும் இவ்வகையின.

ஆனால் தரத்தில் சவால் விடும் நோட்டுகளையும் கூட, இரண்டு, மூன்று இடங்களைச் சோதிப்பதன் மூலம் எளிதில் கண்டுபிடித்துவிடலாம். முழுமையாக கள்ள நோட்டுகளைச் சோதிப்பது எப்படி என்பதற்குக் கீழே கொடுத்திருக்கும் படங்களைப் பார்க்கலாம். இவற்றில் சில சரியாக நம்மால் உணரமுடியாதவை.

உடனே கண்டுபிடிப்பதற்கான வழிமுறைகள் (நான் கையாண்டவை):

பணத்தை எண்ணும்போது, வெள்ளைப் பகுதி (காந்தி படம் நீர்க்கோடு தெரிவதற்காக விடப்பட்டிருக்கும் அல்லவா?) மேலே தெரியுமாறு வைத்துக் கொண்டு எண்ண வேண்டும். (இயல்பாக ஒரே சீராக பணத்தை அடுக்கிக் கொண்டு எண்ண வேண்டும் என்ற அடிப்படையை என் தந்தையிடமிருந்து நான் கற்றிருக்கிறேன். அதிலும் பழைய தாள்களை முன்னால் வைத்து, புதிய தாள்களை அடியில் வைத்து அடுக்கிக் கொண்டு வரும் என் அய்யாவின் நேர்த்தி என்னைக் கவர்ந்த ஒன்று)

எண்ணுதல் - சரியான முறை

எண்ணுதல் - தவறான முறை

* இவ்வாறு எண்ணும் போது முதலில் கவனிக்க வேண்டியது சீரான பதிவு. (கீழே விவரம் கொடுக்கப்பட்டுள்ளது)

கடந்த 7 வருடங்களாக வெளிவரும் புதிய நோட்டுகளில் ரூபாயின் மதிப்பும், அதற்கு முன்பு பூ வடிவங்களும் இவ்விடத்தில் அச்சிடப்பட்டுள்ளன. புதிய நோட்டுகள் கையில் இருந்தால் கண்டிப்பாக சீரான பதிப்பில் ரூபாயின் மதிப்பு, அதாவது 100, 500, 1000 போன்ற எண்கள் இடம்பெற்றிருக்கும்.

பழைய தாளில் உள்ள பூ வடிவம்

* அதில் சந்தேகம் வந்தால் அடுத்து நோக்க வேண்டியது. காந்தி நீர்க்கோடு படம் இருக்கும் அந்த வெள்ளைப் பகுதியினுள் பக்கவாட்டில் நீர்எழுத்திலேயே அச்சிடப்பட்டிருக்கும் ரூபாயின் மதிப்பு. (காந்தியின் நீர்க்கோடு படம் கள்ளநோட்டிலும் உண்டு. ஆனால் அதற்கடுத்த தொழில்நுட்பமான கருப்பு வட்டமிடப்பட்டிருக்கும் இடம் இன்னும் கள்ளநோட்டில் வரவில்லை.)

புதிய தாளில் உள்ள ரூபாய் மதிப்பு சீரான பதிவு மற்றும் நீர் எழுத்து

* இதில் சந்தேகம் இருந்தால் பின் பக்கம் திருப்பிப் பாருங்கள். நல்ல நோட்டில், கீழ்ப்பகுதியில் நடுவில் எந்த ஆண்டு அச்சிடப்பட்டது என்ற தகவல் இருக்கும். கள்ளநோட்டில் அச்சடிக்கப்பட்ட ஆண்டு இருக்காது.

* கள்ளநோட்டில் வண்ணங்கள் சரியான அளவில் இல்லாமல், அப்பிவைத்தது போல அடுத்த படங்களிலும் கூட சேர்ந்திருக்கும். நல்ல நோட்டில் சாட்டிலைட், கணினி போன்றவை பிசிறினிறி தனியாகத் தெரிவது போல் கள்ள நோட்டில் தெரியாது. அந்த சிகப்பு வண்ணம் அடுத்த படங்களின் மீதும் ஒட்ட்யிருக்கும்.

இவை தவிர, பாதுகாப்பு இழையின் அளவும் வடிவமும் கள்ளநோட்டில் தனியாகத் தெரியும். ஏதோ பேருக்கு பேக்கரியில், பால்பேடா மீது சில்வர் பூசியது போல இருக்கும். ஆனால் நல்ல நோட்டில் தெளிவாகத் தெரியும்.

பிறகு தொடு உணர்வு, வண்ணம் மாறும் எழுத்துகள், சாய்த்துப் பார்த்தால் தெரியும் பணத்தில் வண்ணம் என்று இதர ஏரியாக்கள் நிறைய உண்டு. அவற்றை விளக்கமாகக் கீழே பாருங்கள். இப்போது RBI வெளியிட்டிருக்கும் தகவல்களிலும், துண்டறிக்கைகளிலும் அவை தெளிவாக உள்ளன. இதற்கென அவர்கள் பன்மொழிகளிலும் தயாரித்திருக்கும் விளம்பரமும் சிறப்பாக இவற்றை விளக்கும்.

http://www.paisaboltahai.rbi.org.in/poster.htm - இவ்விணைப்பில் பதிவிறக்கம் செய்து கொள்ளத்தக்க துண்டறிக்கைகளும், அதற்குக் கீழே பிளாஷில் செய்யப்பட்ட விளக்கங்களும் உள்ளன.

http://www.paisaboltahai.rbi.org.in/tvc.aspx - இவ்விணைப்பில் விளக்கக் காணொளி உள்ளது. தமிழிலும் தேர்ந்தெடுத்துப் பார்க்கலாம்.

படத்தின் மீது சொடுக்கி பெரிதாக்கிப் பார்க்கலாம்

ஒரே மெட்டு - எத்தனை பாடல்!! அடடா...என்றும் ராஜா!

2012-01-23T01:34:00.000+05:30

அவசியம் எழுத வேண்டும்; பிறருக்குச் சொல்ல வேண்டும் என்று நாம் கருதி பணி/சோம்பல் காரணமாக தள்ளிப்போடும் செய்திகள் பல பிறரால் சொல்லப்பட்டுவிடும் போது, நாம் நினைத்தது வந்துவிட்டதே என்ற மகிழ்ச்சியும், கொஞ்சம் இயலாமையால் உருவான பொறாமையும் ஏற்படுவதை மறுக்க முடியாது. ஆனால் அதை மீறி, மகிழ்ச்சியை வளர்த்துக் கொள்ளுதலே நமது உடலுக்கும் மனதுக்கும் நல்லது என்கிற உணர்வில் தான் இது வரை செயல்பட்டு வந்திருக்கிறேன். (வேற வழி...!)

அந்த வகையில் நீண்ட நாட்களாக நினைத்துவைத்திருந்த சில விசயங்கள் பதிவாகவோ, செய்தியாகவோ, படத்திலோ வெளிவந்து விட்டன. எனவே இனியும் அவற்றைக் காலம் கடத்தாமல் பதிவது என்ற நோக்கில் தொடங்கிவிட்டேன். அநேகமாக, அடுத்த ஓரிரண்டு பதிவுகளும் இதே திக்கில் இருக்கலாம்..

---------------------------------------
இளையராஜாவின் பாடல்களைத் தொடர்ந்து கேட்டு, அணுஅணுவாய் ரசிக்கும் பழக்கம் அண்ணன்களிடமிருந்து தொற்றியது. ஒவ்வொரு இசை நுணுக்கங்களையும் ரசித்து, வியந்து, மகிழ்வது தனிசுகம்.

இப்போதிருக்கும் சன் மியூசிக் வருவதற்கு முன்னால், சன் தொடங்கிய சில ஆண்டுகளில் சன் மூவீஸ் என்றும், சன் மியூசிக் என்றும் இரண்டு சேனல்கள் தோன்றின. பின்னர் அவை தொடரப்படாமல் நின்றுபோயின. அதன் பின்னர் 2000-ஆம் ஆண்டு வாக்கில் கே டிவி-யும் பின்னர் சன் நியூஸ், சன் மியூசிக், ஆதித்யா என அடுத்தடுத்து சேனல்கள் வந்தன.

நிறைய இடைக்காலப் படங்களை எனக்கு அறிமுகப்படுத்தியது சன் மூவீஸும், கே டி.வியும் தான். அதே போல் தான் சன் மியூசிக் சேனலும்.

ஆட்டோ ராஜா படத்தில் ’சங்கத்தில் பாடாத கவிதை...’ பாடலுக்கு பாட்டி ஒருவருடன் மலர்களுக்கு மத்தியில் காதல் செய்து கொண்டிருப்பார் விஜயகாந்த். அட்டகாசமான அந்தப் பாடலை தேடித்தேடிக் கேட்கத் தொடங்கினேன். பிறகு இணையத்தின் துணை கொண்டு அந்தப் பாடலை தேடிய போது, அதே இசையில் எண்ணற்ற பாடல்களை பல மொழிகளில் ராஜா உருவாக்கியிருப்பது தெரிந்தது.

தம்பி புருனோவும், நானும் அவற்றைத் தொகுத்துக் கொடுத்து, ஒரு முறை சூரியன் பண்பலையில் நண்பர் ராஜசேகர் மூலமாக பகிர்ந்து கொண்டோம். அந்த இணைப்புகளோடு நமது வலைப்பூவிலும் எழுத வேண்டுமென்று அதை வைத்திருந்தும் இழுத்துக்கொண்டே போய் எழுத முடியவில்லை.

இத்தொகுப்புகளை பலரும் யூடியூப் இணையதளத்தில் குறிப்புடன் கூட இணைத்திருக்கிறார்கள்.

இந்நிலையில் இன்று அக்கா கவின் மலர் அவர்கள் தனது முகநூல் பக்கத்தில் இந்த தொகுப்பைத் தேடிப் பகிர்ந்திருந்தார்கள். எனவே வாயை மூடிக் கொண்டு அதையே எடுத்து இந்தப் பக்கத்திலும் பதிந்துவிட்டுப் போகிறேன்... பொறாமை கலந்த மகிழ்ச்சியுடன்!

-------------------------------------------------------

அதிகமாக இசை கேட்டுக்கொண்டிருப்பதன் பலன் இந்த குறிப்பு..

எனக்குத் தெரிந்து மிக அதிகமான எண்ணிக்கையில் ஒரே ஒரு மெட்டு இத்தனை முறை பயன்படுத்தப்பட்டிருப்பது இளையராஜாவின் இந்த ஒரு மெட்டுதான் என்று நினைக்கிறேன்.

மலையாளத்தில் ’ஓலங்கள்” படத்தில் இடம்பெற்ற ‘தும்பி வா’ முதல்...

இதோ..:http://www.youtube.com/watch?v=QczFj252vGE

அதன்பின் தமிழில் ‘ஆட்டோ ராஜா’வுக்காக இங்கே :

http://www.youtube.com/watch?v=DQg-5s21zP4

அதன்பின் தெலுங்கில் பாலுமகேந்திரா இயக்கத்தில் ’Nireekshana’ படத்தில்:

http://www.youtube.com/watch?v=hNaJftkrKcU

அதனபின் தமிழில் அதேபடம் மொழிமாற்றம் செய்யப்பட்டு ‘கண்ணே கலைமானே” என்ற பெயரில் வெளியானது.
http://www.youtube.com/watch?v=YkNNB_y15ZA

அநேகமாக பாலுமகேந்திராவுக்கு மிகப் பிடித்த மெட்டாக இது இருந்ததால்...மீண்டும்..Aur ek prem kahani" இந்திப் படத்தில் அதே மெட்டை மீண்டும் பயன்படுத்தினார்
http://www.youtube.com/watch?v=oJL9Z17P4YA

மீண்டும் 'Paa" படத்தில் அதே மெட்டு..வேறொரு வடிவத்தில்... :
http://www.youtube.com/watch?v=Ir6tShQJmHk

இவை மட்டுமல்ல....வரிகளே அல்லத ஒரு இன்ஸ்ட்ருமெண்டல் போனஸ்
:http://www.youtube.com/watch?v=8Thz8_Z7rw8

இது மாதிரி ஒரே மெட்டு இத்தனை முறை வேற்ங்காவது பயன்படுத்தப்பட்டிருக்கிறதா? இருந்தால் சொல்லுங்கள்.

எத்தனை முறை எப்படிக் கேட்டாலும் பிடித்துப் போகும் மாயம் தான் என்ன?
நன்றி: கவின்மலர்
https://www.facebook.com/kavinnnn/posts/3148563476301

--------------------------------------------------------

ஒரே மெட்டு தான்.. ஆனால் அதில் எத்தனை உணர்வுகளைக் கொடுக்க முடிகிறது இவரால்...!

காதலாகிக் கசிந்துருகும் பாடல், அப்படியே உற்சாகமாக குழந்தைகள் பாடும் பாடலாகிறது, இளசுகள் சுற்றுலாவில் கரகரப்புடன் பாடும் துள்ளல் பாடலாகிறது...! இது தவிர கார்த்திக்ராஜா இசையில் விளம்பர இசையாகவும் வந்துள்ளது. (’நீர்வீழ்ச்சி தீமூட்டுதே’ பாடலை எழுதியவர் பாவலர் அண்ணன் அறிவுமதி அவர்கள்)

ராஜா - நீ - தமிழன் உலகுக்குத் தந்த இசைக் கொடை!

தமிழில் பிறந்தநாள் வாழ்த்துப்பாடல்! நன்றி தோழர்களே!

2012-01-10T01:28:00.001+05:30

”எனக்கு இன்னிக்கு ஹேப்பி பர்த்டே!” என்று சொல்லிக் கொள்ளும் குழந்தைகளைப் பார்த்திருக்கிறீர்களா? அன்றைக்கு முழுமையும் அவர்களுடைய நாள் என்ற உணர்வு தான் அதற்கு காரணம். எல்லா நாளும் நம்முடைய நாள் தான் என்றாலும் கொண்டாட்டத்திற்குரிய நாள்களாக பிறந்தநாள், திருமணநாள் போன்றவை அமைகின்றன.

கூடுமானவரை, மறக்காமல் குடும்பத்தினருக்கும், நண்பர்களுக்கும் பிறந்தநாள் வாழ்த்துச் சொல்வதும், இயன்றவரை குட்டிக் குட்டி கொண்டாட்டங்களை கேக் வெட்டி நடத்துவதும் எமது வழக்கங்களில் ஒன்று.

அப்போதெல்லாம் "Happy Birthday To You|" பாடுவதற்கு பதிலாக, தமிழில் அதே ராகத்தில் “இனிய பிறந்தநாள் வாழ்த்துகள்; இனிய பிறந்தநாள் வாழ்த்துகள்” என்று பாடுவேன். தமிழில் நல்ல பிறந்தநாள் வாழ்த்துப் பாடல் இல்லையே என்ற வருத்தமும், நமது இசைக் கலைஞர்களை வைத்து ஒன்று தயாரித்து வெளியிட வேண்டும் என்ற எண்ணமும் இருக்கும்; இருக்கிறது.

அந்த ஏக்கத்தினைத் தீர்க்கும் விதமாக அமைந்திருக்கிறது - முகில் படைப்பகம் வழங்கியிருக்கும் பிறந்தநாள் வாழ்த்துப் பாடல். வித்யாசாகரின் நற்றமிழில் ஆதியின் இனிய இசையில் சரோ என்ற மென்குரல் நாயகனின் குரலில் தேனாய் பாய்கிறது பிறந்தநாள் வாழ்த்துப் பாடல்!

இந்தப் பாடலை குறுந்தகடு வாயிலாக வெளியிடவேண்டும். இணையத்தில் நல்ல தரத்தில் இலவசமாகப் பதிவிறக்கம் செயும் வாய்ப்பும் வேண்டும் என்று முகில் படைப்பகத்தாரை வேண்டிக் கொள்கிறேன்.

http://vidhyasaagar.com/

நீங்களும் கேட்டு மகிழுங்கள்! பரப்புங்கள்! பயன்படுத்துங்கள்!!

”பெரியாறு அணையைக் காப்போம்!“ கோவாவில் தமிழக மாணவர்கள் பதிலடி போராட்டம்!

2011-11-29T16:56:00.001+05:30

”முல்லை பெரியாறு அணையைக் காக்க வேண்டும்!”

கோவாவில் தமிழக மாணவர்கள் பதிலடி போராட்டம்

”அன்புக்குரிய கேரளர்களே! ஏன் இந்த கொலைவெறி?”
உரக்க முழக்கமிட்ட தமிழக மாணவர்கள்

கடந்த நவம்பர் 23-ஆம் தேதி முதல் கோவா மாநிலம் பனாஜியில் 42-ஆவது பன்னாட்டுத் திரைப்பட விழா நடைபெற்றுவருகிறது. பல நாடுகளிலிருந்தும், இந்தியாவின் பல மாநிலங்களிலிருந்தும் திரைப்படத் துறையினரும், மாணவர்களுமாக மொத்தம் 8ஆயிரம் பேர் பங்கேற்றுள்ளனர். இந்நிலையில் இன்று (நவம்பர் 29) மதியம் உணவு இடைவேளைக்குப் பிறகு திரைப்பட விழா நடக்கும் வளாகத்தில் கூடிய கேரளாவைச் சேர்ந்த நடிகர் ’ஒரு தலை ராகம்’ ரவீந்தர், சில பத்திரிகையாளர்கள் உள்ளிட்ட 30 பேர் ‘முல்லைப் பெரியாறு அணை இடிந்துவிடும்’ என்றும், ’புதிய அணையைக் கட்ட வேண்டும்’ என்றும் குரல் எழுப்பி ஆர்ப்பாட்டத்தில் ஈடுபட்டதோடு, வளாகத்திற்குள்ளேயே ஊர்வலம் போலவும் நடத்தினர்.

இதனைக் கண்டு வெகுண்டெழுந்த பல்வேறு திரைப்படக் கல்லூரிகளைச் சேர்ந்த தமிழ் மாணவர்கள், திரைப்படத் துறையினர் 50-க்கும் மேற்பட்டோர் உடனடியாக ஒன்றுகூடி, ”8000 ஏக்கர் விளைநிலம், 3 கோடி மக்கள் வறட்சியில் சாகும் அவலத்தைத் தடுக்க வேண்டும்”, “முல்லைப் பெரியாறு அணையைக் காக்க வேண்டும்”, “அணையைச் சிதைப்பது, இந்திய ஒற்றுமையைச் சிதைத்துவிடும்”, “அன்பிற்குரிய கேரள மக்கள், உச்ச நீதிமன்றத்தின் உத்தரவை ஏற்கவேண்டும்” “அன்பிற்குரிய கேரள மக்களே! ஏன் இந்த கொலைவெறி” என்றும் தொடர்ந்து உரக்க முழக்கம் எழுப்பி ஊர்வலம் சென்றனர். உடனடியான இந்த பதில் நடவடிக்கையைக் கண்டவர்கள் வியப்படைந்தனர். இரண்டு குழுவினரும் முழக்கம் எழுப்பி ஊர்வலம் சென்றதால் அங்கு சிறிதுநேரம் பதற்றம் நிலவியது.

ஊர்வலம் சென்ற தமிழக மாணவர்கள்

செய்தியாளர்களிட பேசிய மாணவர்கள், “கேரள அரசு உச்சநீதிமன்றத்தின் தீர்ப்பை மதித்து உடனடியாக தன்னுடைய நடவடிக்கைகளை நிறுத்த வேண்டும். முல்லைப் பெரியாறு தமிழக மக்களின் வாழ்வாதாரம். அதனை ஒருபோதும் விட்டுத் தர முடியாது. இதற்காக தமிழக மாணவர்கள் போராடுவார்கள்” என்று தெரிவித்தனர். இந்திய, பன்னாட்டு பத்திரிகையாளர்கள், பார்வையாளர்களிடம் அவர்கள் முல்லைப் பெரியாறு அணைப் பிரச்சினை தொடர்பான உண்மை நிலைமையினை விளக்கினர்.

போராட்டத்தில் ஈடுபட்ட மாணவர்களின் ஒரு பகுதி!

பிறகு அங்கு வந்த காவல்துறையினர் தமிழ் மாணவர்களைக் கலைந்து செல்லுமாறு வேண்டினர். ”கேரளப் போராட்டக் குழுவினர் கலைந்து சென்றால் தான் நாங்களும் கலைந்து செல்வோம். அவர்கள் ஒரு வேளை போராட்டம் செய்தால் தொடர்ந்து பதில் நடவடிக்கைகளில் ஈடுபடுவோம்” என்று எச்சரிக்கை விடுத்து, பின்னர் கேரள போராட்டக் குழுவினர் கலைந்து சென்றதும் தமிழ்மாணவர்களும் கலைந்து சென்றனர். இதனால் அங்கு பரபரப்பு நிலவி வருகிறது.

முகநூலில் ‘தேசீயவாதி’ ஆவது எப்படி?

2011-10-26T21:41:00.000+05:30

தேவையான பொருட்கள்:

1. இந்திய தேசியக் கொடியின் படங்கள் சில.

2. கொடியின் வண்ணங்கள் கூடப் போதுமானது. அதிலும் குறிப்பாக ’வந்தே மாதரம்’ பாடல் டிசைனில் உள்ளது போன்ற நடுவில் அசோகச் சக்கரம் இல்லாத ஓவிய வடிவில் இருந்தால் இன்னும் உங்கள் தேசீய ‘கிரேடு’கூடும்!)

3. காந்தி, நேரு படம் பயன்படுத்தலாம். ஆனால் அதைப் பயன்படுத்தினால் காங்கிரஸ் சாயம் வந்துவிடும் ஆபத்து இருப்பதால், காந்தியைக் கொன்ற ஆர்.எஸ்.எஸ்-சின் இன்றைய அடையாளமான மோடி படத்தைப் பயன்படுத்தலாம்.

4. அன்னா ஹசாரே, மதச்சார்பின்மையைக் காக்க அப்துல்கலாம் (வேறு எந்த முஸ்லிம் படமும் அனுமதியில்லை.)

5. ’பாரத் மாத்த்த்தா க்க்க்கீ ஜே!’, ’வந்த்த்தே மாத்த்தரம்’ போன்ற ரெடிமேட் ஸ்லோகங்கள் கொஞ்சம் போல வைத்துக் கொள்ளலாம்.

செய்முறை:
இந்தியாவின் இண்டிபெண்டன்ஸ் டே, ரிபப்ளிக் டே (எது ஜனவரி 26, எது ஆகஸ்ட் 15 என்றெல்லாம் தெரியவேண்டியதில்லை.) என்று யாராவது சொல்லும் போதெல்லாம் மேற்காணும் படங்களில் ஒன்றைப் profile படமாகப் போட்டுவிட்டு, forward mail எதாவதிலிருந்து எடுத்து ஸ்டேடஸ் மெசேஜ் போடலாம்..

கூடவே ஏ.ஆர்.ரஹ்மானின் ‘வந்தே மாதரத்தை’ப் பயன்படுத்துவது தூக்கலாக இருக்கும்.

இந்தியா- பாகிஸ்தான் கிரிக்கெட் போட்டிகள் நடக்கும்போது, துப்பாக்கியில் இருந்து வரும் தோட்டாக்கள் போல அடிவயிற்றிலிருந்து வாய் வழியாக... (நோ..நோ) குரல் எழுப்ப வேண்டும். ’ஹாக்கி’ என்ற அஜய்தேவ்கனின் இந்திப்படம் பற்றிக்கவலையில்லை.

ஊழல் ஒழிய உண்ணாவிரதம் இருப்போம். கார்ப்பொரேட் கம்பெனிகளிடம் இருந்து ஸ்பான்சர் பெற்று மூன்றாம், நான்காம் சுதந்திரப் போராட்டத்தை முன்னெடுப்பொம் என்று நெஞ்சில் குத்திவிடாதபடி, டி-சர்ட்டில் குத்திய நேஷனல் பிளாக் உடன் உதார் வுடலாம். அல்லது அப்படிப்பட்ட உதார்களுக்கு link கொடுக்கலாம்.

யூ டியூப் செய்முறைப்படி, காந்தி குல்லாய் போட்டு சேட்டு கணக்கா அலைவது கூடுதல் மணம் கொடுக்கும். http://www.youtube.com/watch?v=_RJv23_CVss

ஹிந்தி படிக்கவிடாததால் பெரிய நட்டம் என்று தமிழ்நாட்டில் குல்பி விற்கும் இந்திக்காரனிடம் குல்பி வாங்கிச் சப்பியபடி ‘ச்சே... நான்சென்ஸ் டமிலியன் லீடர்ஸ்’ சொல்லவேண்டும்.

காஷ்மீர் எல்லையில் குண்டூசி விழுந்தாலும் பாகிஸ்தானின் ஐ.எஸ்.ஐ. அல்லது ஐ.எஸ்.ஓ.. எதன் மீதாவது குற்றம் சொல்ல வேண்டும். காஷ்மீரில் சாகும் மக்கள் பற்றிய கவலை நமக்கு வேண்டியதில்லை.

(அப்படியென்றால், அஸ்ஸாம், மணிப்பூர், தண்டகாருண்யா, tamil fisherman...? )
”அதெல்லாம் இந்தியாவிலேயா இருக்கு?”

குஜராத்தின் சாதனை, மோடியின் அன்பான புன்னகை, அங்கங்கே Pribe to an indian.. சீ.. Proud to be an indian, My country, இந்தியாவை வல்லரசாக்க facebook-la இந்த மெசேஜை forward பண்ணுங்க போன்ற வாசகங்களை இடையிடையே போட்டுக்கலாம்..

தேசீயத்தின் பிராண்டு அம்பாசிடர்களான மணிரத்னம், ஷங்கர், அர்ஜூன் படங்களைக் கண்டு விரைப்புக் கொள்ள வேண்டும்,

இதெல்லாம் செஞ்சா... நீங்க அக்மார்க் ’இந்து’ய தேசீயவாதி ஆயிடலாம்...

முடிவுரை: அவ்வப்போது ஆங்கில ஊடகங்கள் பரிந்துரைக்கும் நிலைப்பாடுகளை மட்டுமே எடுத்துவருவதால், அவை கேபிளில் கட்டாகும் வரை... அல்லது இண்டர்நெட்டில் லைவ் போகும் வரை...

தீபாவளியன்று வீட்டுக்கு வந்த பெரியார்

2011-10-25T20:15:00.002+05:30

...... 1949க்குப் பிறகு அய்யா அவர்கள் எனது இல்லத்தில் தான் தங்குவார்கள் (காரைக்குடி வரும்போது) என்பது எனக்குக் கிடைத்த பெருமையாகும்.

ஒருமுறை 1950வாக்கில் தீபாவளி அன்று திடீரென்று பெரியார் அவர்கள் எங்கள் இல்லத்திற்கு வந்து விட்டார்கள். முதல் நாளில் திருநெல்வேலி, கன்னியாகுமரி மாவட்ட நிகழ்ச்சி முடித்து மதுரை வந்த அய்யா மேலூர், திருப்பத்தூர் வழியாக காரைக்குடிக்கு வந்து விட்டார்கள்.

நேராக எனது கடைக்கு முன் அய்யாவின் வேன் வந்து நின்றுள்ளது. நான் அந்த நேரம் கடையில் இல்லை. எனது மைத்துனர் தனுக்கோடிதான் கடையில் இருந்தார். அப்போது மதியம் 3-4 மணி இருக்கும். வந்தவுடன் "சாமி எங்கே?" என்று கேட்டதும், "வீட்டிலிருக்கிறார். இதோ கூட்டி வருகிறேன்" என்று கிளம்பியவரை நிறுத்திவிட்டு, அய்யா அவர்களே தனியாக கடை எதிரே உள்ள ஒரே நீளமான சந்தில் வருகிறார்.

(படம்:பெரியார் நடந்து வந்த சந்தின் இன்றைய தோற்றம்)

(உள்படம்: என்.ஆர்.சாமியும், பேராண்டாள் அம்மையாரும், கையில் குழந்தையாக திராவிடச்செல்வம்)

நான் கருப்புச்சட்டையுடன் எதிரே வருகிறேன். சற்று தூங்கிவிட்டு வருவதால் எனக்கே ஒரு சந்தேகம். 'காண்பது கனவோ' என்ற நிலை.

"அய்யா வாங்க" என்றேன்.

அய்யாவும் "வாங்க வீட்டிற்குப் போகலாம்" என்று சொன்னபடியே வீடு நோக்கி நடந்தார். நானும் கூடவே பின் சென்றேன்.

வீட்டில் நுழைந்து, என் துணைவியார் மற்றும் நான்கு (அப்போது நான்கு குழந்தைகள்தான்) குழந்தைகளும் அனைவருமே தீபாவளி துக்க நாள் குறித்து கருப்பு உடை அணிந்திருந்ததைப் பார்த்த அய்யா அவர்கள் ”ரொம்ப சரி, ரொம்ப சரி” என்றுரைத்து ”அம்மா காப்பி போடுங்கள். சாப்பிட்டு செல்கிறேன்” என்றார்கள். கடையிலிருந்த என் மைத்துனனும் கருப்புச் சட்டையுடன் தானிருந்தார்.

(பின்னொரு நாள் எடுக்கப்பட்ட படம்: என்.ஆர்.சாமி அவர்களின் ஆறு செல்வங்கள்
இடமிருந்து: திராவிடமணி, தமிழரசி, ஈவெரா மணியம்மை, திராவிடச்செல்வம்(கீழே), ஜனசக்தி, சமதர்மம்)

எனது குடும்பம் கொள்கையில் பிடிப்புடனிருக்கிறார்களா என்று பார்த்து விட்டுப் போக வந்திருப்பார்கள் என்று எண்ணி மகிழ்ந்தோம்.

-----------------------------------------------------------------------------------------

(என் தாத்தா என்.ஆர்.சாமி அவர்கள், தன் வாழ்க்கைப் பாதையைத் தானே சொல்லும் பாங்கில் எழுதப்பட்ட ”காவனூர் முதல் காரைக்குடி வரை... வழி: மலேயா” என்ற கட்டுரையில், ”திடீரென வீட்டுக்கு வந்த பெரியார்” என்ற தலைப்பில் எழுதப்பட்ட செய்தி - காரைக்குடி பெரியார் பெருந்தொண்டர் என்.ஆர்.சாமி நூற்றாண்டு விழா மலரிலிருந்து...)

மாசு அகற்றிய மாசு!

2011-10-21T08:28:00.000+05:30

இந்தக் கட்டுரையை நான் எழுதத்தொடங்குகிற இந்த நொடியோ (11:59:14 - 20.10.2011), அல்லது எழுதத் தோன்றிய 16-ஆம் தேதி இரவோ எந்த விதத்திலும், பிரச்சாரத்திற்கோ ஒரு ஓட்டிற்கோ கூடப் பயன்படப் போவதில்லை; அந்த நோக்கமும் இல்லை.

ஏன், எழுதும் நான், என் ஓட்டைக் கூடத் தர முடியாதவன்... சென்னை மாநகராட்சிக்கு! (காரைக்குடிக்குச் சென்று 19-ஆம் தேதி வாக்கிட்டுவிட்டு வந்துவிட்டேன்) வயிற்றெரிச்சலைக் கொட்டிக் கொண்ட மாமன்ற உறுப்பினர்கள் மீதான வெறுப்பையும் தாண்டி, மக்களின் ஆதரவு என்னும் பேரலை இவருக்குச் சாதகமாக இருப்பினும், சென்னை மாநகராட்சியை எப்பாடுபட்டேனும் கைப்பற்றியே தீருவது என்ற வெறியில், இவரது வெற்றி ஆளுங்கட்சியினரால் தட்டிப் பறிக்கப்படலாம். ஆனாலும் என் நன்றியைத் தெரிவிக்கும் நோக்கம் ஒன்றே என்னை எழுதத் தூண்டுகிறது.

நேரடியாக மேயரைத் தேர்ந்தெடுக்காமல், மாநகராட்சி உறுப்பினர்களிலிருந்து ஒருவரைத் தேர்ந்தெடுக்கும் முறை கடந்த 2006-ஆம் ஆண்டு பின்பற்றப்பட்டது. அப்படி சென்னை சைதையிலிருந்து தி.மு.க.வின் சார்பில் மாமன்ற உறுப்பினராகத் தேர்வாகி, பின்னர் மாநகரத் தந்தை ஆகத் தேர்ந்தெடுக்கப்பட்டவர் தான் மா.சு என்கிற மா.சுப்பிரமணியன்.

சென்னையின் பெரும் மாற்றங்களுக்குக் காரணமாயிருந்த தளபதி மு.க. ஸ்டாலினின் காலத்திற்குப் பிறகு (1996-2001), மீண்டும் அவரே மாநகராட்சிக்கு 2001-இல் வென்ற நிலையில், அன்றைக்கு ஆட்சியில் அமர்ந்த ஜெ-யும் அவரது அடியாளாக காங்கிரசிலிருந்து அ.தி.மு.க.வில் சேர்ந்திருந்த கராத்தே தியாகராஜன் போன்றோரும் கொடுத்த குடைச்சல், துணை மேயர் என்னும் பெயரில் அடித்த கூத்து, பின்னர் கராத்தேவைப் போட்டுத் தள்ளத் தயாரான முதல்வர் ஜெ-யின் செயலால் அவர் தப்பியோடி வடநாட்டில் மறைந்த மர்மம் என சீர்கெட்டுப் போயிருந்த சென்னை மாநகராட்சி நிர்வாகத்தை மாற்றியமைக்க வேண்டிய மாபெரும் பணியைத் திறம்பட செய்து முடித்தவர் மா.சுப்பிரமணியன்.

பெரியார் கொள்கைப் பற்று, திராவிட இயக்கச் சிந்தனை, கலைஞரின் மீதான பாசம் என பக்கா தி.மு.க.காரர்! சென்னையின் ஒவ்வொரு வளர்ச்சியும் தி.மு.க. காலத்தில் மட்டுமே செய்யப்பட்டது என உறுதியாகச் சொல்ல முடியும். அதனாலேயே தி.மு.க.வின் கோட்டையாக இருக்கும் சென்னையை இன்னும் சிறப்பாக நிர்வகித்த பெருமையும் மா.சு அவர்களுக்கு உண்டு. எளிமை, பழகுதற்கு இனிமை, மக்கள் எவரும் சென்று சந்திக்கும் அளவு இயல்பான பண்பு இவருடையது.

ஜீ தொலைக்காட்சி நேரடி ஒளிபரப்பில், தொலைபேசியில் குறை தீர்க்கும் நிகழ்ச்சிக்காக நேயர்கள் உரையாடும் போது, தெருப் பெயரைச் சொன்னவுடனேயே, அங்கே என்ன பிரச்சினை? என்ன நடவடிக்கை எடுக்கப்பட்டிருக்கிறது? எப்போது சரியாகும்? என பதில் சொல்லி நிகழ்ச்சித் தொகுப்பாளரையே வியக்க வைக்கும் அளவு சென்னையின் நீள அகலங்களைச் சரியாகத் தெரிந்து வைத்திருந்தவர்.

கூவம் கால்வாய்ச் சீரமைப்புத் திட்டம், சென்னையெங்கும் பூங்காக்கள், போக்குவரத்தைச் சீர்படுத்துவதற்கான நடவடிக்கைகள் போன்ற பணிகள் குறிப்பிடத்தக்கன. ஆனால், அவற்றையெல்லாம் விட என்னை ஈர்த்தவை சில.

தனியார் பள்ளிகள் தான் தரத்தில் சிறந்தவை என்ற மாயையை அகற்றி, சென்னை மாநகராட்சிப் பள்ளிப் பிள்ளைகள் அதிக மதிப்பெண் பெறமுடியும்; முதலிடத்தைப் பிடிக்க முடியும் என்னும் அளவிற்கு பள்ளிகளின் தரத்தைத் தூக்கிப் பிடித்தது முக்கியமானது.

மாநகராட்சி மருத்துவமனைகளில் பிறக்கும் குழந்தைகளுக்கு தமிழ்ப்பெயர் வைத்தால் தங்க மோதிரம் அணிவித்து அவர்களை ஊக்கப்படுத்தியது இன்னொன்று. ’நல்ல தமிழ்ப்பெயர்களைப் பிள்ளைக்குச் சூட்டுங்கள்’ என்று சொல்லுவதோடு அல்லாமல் அதற்கொரு பரிசும் கொடுத்து அதற்கொரு பயனையும் தந்தது அத்திட்டம்.

சென்னை சாலைகளின் இரு பக்கச்சுவர்களிலும் தமிழர் தம் பண்பாட்டையும், வரலாற்றையும் பறைசாற்றும் வண்ணம், இயற்கைக் காட்சிகளும், தமிழகத்தின் வளங்களும் தலைநகருக்குப் பெயர்ந்துவிட்டதோ என்று வியக்கும் வண்ணம் வண்ண ஓவியங்களை மிளிரச் செய்து, வழமையான அலுத்துப் போன சென்னை வாழ்க்கையில் இருந்து சென்னை மக்களுக்கே புத்துணர்வான மனமாற்றத்தைத் தந்தவர் மா.சு! (பெங்களூருவில் இருந்ததைப் போலத் தான் இந்தத்திட்டம் பின்பற்றப்பட்டது என்றாலும், அங்கிருந்த மொக்கையான ஓவியங்களை ஒப்பிடுகையில் அழகுணர்ச்சியோடு அதைச் செய்தவர் நமது மேயர் என்று பெருமையாய்ச் சொல்லாம்.

இன்னும் தலையாய ஒன்றுண்டு.

”வாணிகர்,தம் முகவரியை வரைகின்ற பலகையில்,ஆங் கிலமா வேண்டும்?
'மாணுயர்ந்த செந்தமிழால் வரைக' என அன்னவர்க்குச் சொல்ல வேண்டும்!
ஆணிவிற்போன் முதலாக அணிவிற்போன் ஈராக அனைவர் போக்கும்
நாணமற்ற தல்லாமல் நந்தமிழின் நலம்காக்கும் செய்கையாமோ?

உணவுதரு விடுதிதனைக் 'கிளப்'பெனவேண் டும்போலும்! உயர்ந்த பட்டுத்
துணிக்கடைக்கு 'சில்குஷாப்' எனும்பலகை தொங்குவதால் சிறப்புப் போலும்!
மணக்கவ ரும் தென்றலிலே குளிராஇல்லை? தோப்பில் நிழலா இல்லை?தணிப்பரிதாம் துன்பமிது! தமிழகத்தின் தமிழ்த்தெருவில் தமிழ்தா னில்லை!”

என்றெழுதிய புரட்சிக் கவிஞர் போல், ’தமிழ் இருக்காதா எம் தலைநகர்த் தெருவினில்’ என்று வருந்திக் கொண்டிருந்த வேளையில், விதிமுறையை நெருக்கி, ”ஆக்ஸ்போர்டு பிரஸ்’ என்றாலும் தமிழில் எழுது” என்று பன்னாட்டு நிறுவனங்களிலிருந்து, பாதையோரக் கடை வரைக்கும் தமிழில் பெயர்ப்பலகை எழுத வேண்டும் என்பதை நடைமுறைக்குக் கொண்டுவந்து வெற்றிகண்ட பெருமை சர்வ சந்தேகமில்லாமல் மா.சுப்பிரமணியன் அவர்களைத் தான் சாரும்.

”தமிழை எங்கே தேடுவேன்?” என்று பாடல்கூட வெளிவந்து இணையதளங்களில் உலவியது.

ஆனால், ஆங்கில எழுத்துகளை தமிழில் மாற்றி Transliteration செய்தால் மட்டும் போதாது. நல்ல தமிழில் மொழியாக்கம் செய்து ‘இனிப்பகம்’, ‘வெதுப்பகம்’, ’தொலை தொடர்பகம்’ என்று தமிழ் எழுத்துருவைக் கேள்விப்படாத பன்னாட்டு நிறுவனங்கள் கூட, அதிகம் அழகில்லாத ’ஒருங்குறி’ எழுத்துகளைப் பயன்படுத்தி தமிழ்ப்பெயர்ப் பலகை வைக்க வேண்டிய அளவு நடைமுறையில் உறுதியாக இருந்து சாதித்தும் காட்டியது மனமுவந்து பாராட்டத்தக்கது. இன்னும் சில இடங்களில் அப்படித் தான் இருக்கிறது என்று குறைப்படவும் கூடும். மறுக்கவில்லை. ஆனால் ஓரிரண்டு வீதம் தவிர முழுமையான வெற்றி என்றே சொல்லவேண்டும். தமிழில் கட்டாயப்படுத்தி எழுதச் செய்தாலும், அழகைக் கெடுப்பதாகக் கருதி அதை வெறுப்போடு எழுதியவர்களே பின்னர் ரசிக்கும்படி இருந்த இன்பத்தைத் தந்தவர் நம் மா.சு அவர்கள்!

மதராஸ் என்றிருந்ததை மாற்றி ’சென்னை’ என்று சொல்ல வைத்த கலைஞரைப் போல, சென்னையின் தெருக்களில் தமிழ் கிடந்து தள்ளாடும் என்றிருந்த ’மாசு’ தனை அகற்றி தமிழ் செழிக்க வைத்த ’மா.சு’ அவர்களே, உங்களை நாளும் நன்றியோடு நினைவுகொள்கிறேன். இன்னும் நிறைய இருக்கிறது இவரைப் பாராட்டி எழுத! (8 மணிக்காவது நான் பதிவை முடிக்க வேண்டாமா?)

இன்று வெளிவரும் முடிவுகள் எப்படியும் இருக்கலாம். சென்னை மக்கள் மட்டுமல்ல... உணர்வுள்ள தமிழர்கள் எங்கிருப்பினும் உம்மை நன்றியோடு நினைப்பார்கள்! சென்னை மாநகராட்சிக்கு மட்டுமல்ல... ஒட்டுமொத்த தமிழகத்துக்கும் உங்கள் பணி தேவைப்படுகிறது வாருங்கள்!

பின்குறிப்பு: சென்னை மாநகராட்சிக்கு இன்றியமையாத இன்னொரு பணியும் உண்டு... அதை வெற்றிபெறுபவரின் கவனத்துக்கு வைப்போம் - மாநகரைக் காக்க!

ராம்தேவை விட பெரிய தில்லாலங்கடி!

2011-10-16T14:54:00.000+05:30

’சுடிதார் எஸ்கேப்’ புகழ் பாபா ராம்தேவ் உண்ணாவிரதம் இருந்தபோது, அவரது பல படங்களையும் ஊடகங்கள் பெரிதாக விளம்பரப்படுத்தின. ஏற்கெனவே ஊடகங்கள் மற்றும் தொலைக்காட்சிகளை மிகச் சரியாகப் பயன்படுத்தி வந்த ராம்தேவுக்கு இவை பெரிதும் பயன்பட்டன.

அதில், மூச்சை நன்கு உள்ளிழுத்து, வயிற்றைக் குழி விழுந்தது போல் காட்டும் படம் கூட பெரிய அளவு பிரபலமாகவில்லை. காரணம், சிறுவயதில் பள்ளிக்கூடம் பள்ளிக்கூடமாக வந்து, 2 ரூபாய் கட்டணம் வாங்கிக் கொண்டு, மேஜிக் ஷோ செய்யும் எளிய வகை நிபுணர்கள் காட்டும் தண்ணீரை நிறையக் குடித்து பம்புசெட்டு போல வெளியே விடுதல், பேப்பர் மேஜிக் போன்ற வித்தைகளில் ஒன்றுதான் வயிற்றை உள்ளிழுத்துக் காட்டி வியப்பூட்டுவதும்!

ஆனால், பிரபலமான மற்றொரு படம் - இரண்டு கால்களையும் பாம்புபோல் பின்னி நிற்கும் படமாகும். பல பேர் இதைப் பார்த்தே இவர் பெரிய யோகா வித்தகர், உண்மையான சாமியார் என்று பேசிக் கொண்டார்கள்.

அடப்பாவிகளா! நம்ம வைகைப் புயல் வடிவேலு, ”சிங்கார வேலன்” படத்திலேயே இந்த வேலையெல்லாம் காண்பிச்சுட்டுட்டாரே! அப்ப அவரையெல்லாம் ராம்தேவுக்கு முன்னோடின்னுல்ல சொல்லணும் என்று யோசித்துக் கொண்டேன்.

நேற்று பாத்த youtube காணொளி ஒன்றில் விழிகள் வியக்க ஒரு மனுசன் பண்ணதைப் பார்த்தா, ”இவர்லாம் இந்தியாவுக்கு வந்து யோக குருவானா... ராம்தேவ் ஒரு தீவைத் தானே விலைக்கு வாங்கினார். இவர் இந்திய தீபகற்பத்தையே விலைக்கு வாங்கிடுவார்’னு நெனச்சுக்கிட்டேன்.

ஆனா, இவர் விவரமில்லாமல், ‘வயித்துக்காக மனுசன் இங்கே கயித்தில் ஆடுறான் பாரு’ என்பதைப் போல, வயிற்றுக்காக உடலைச் சுருக்கி, டென்னிஸ் மட்டைக்குள் புகுந்து வெளிவருகிறார். இதெல்லாம் செஞ்சா நம்ம ஊரில் இவர்தான் பெரிய தில்லாலங்கடி!

எதற்காக டெல்லியில் குண்டுவெடித்தது?

2011-09-08T16:51:00.004+05:30

வட இந்திய ஆங்கில ஊடகங்களைப் போலவே, புதிய தலைமுறை தொலைக்காட்சியின் இன்றைய பேசு பொருளாக டில்லி உயர்நீதிமன்றத்தில் நடைபெற்ற குண்டு வெடிப்பே இருந்தது!

நீதி கிடைக்குமென நம்பி சாதாரண மக்களும், நீதியை ’வாங்கு’வதற்கென சிலருமாகப் பொதுமக்கள் குழுமியிருக்கும் இடத்தில் நடத்தப்பட்டிருக்கும் குண்டு வெடிப்பு கடுமையான கண்டனத்திற்குரியது தான். நீதிமன்றத்திற்குள் குத்து, வெட்டு, கொலை நடப்பதை நம்மூரில் பார்த்திருக்கிறோம். ஆனால், இந்தியாவின் தலைநகரல்லவா? குண்டு வெடித்திருக்கிறது. கடும் கண்டனத்திற்குரிய இந்நிகழ்வை யாரும், எக்காரணத்தைக் கொண்டும் ஆதரிக்க முடியாது.

இதற்கு பாதுகாப்புக் குறைபாடுகள் காரணமா? அலட்சியம் காரணமா? CCTV கேமராக்கள் இல்லாத்தற்குக் காரணம் யார்? சகல திறமையும் பொருந்திய நமது இராணுவம், காவல்துறை இவற்றைவிட தீவிரவாதிகள் பெரியவர்களா? உளவுத்துறை என்ன செய்கிறது? இப்படி எண்ணற்ற கேள்விகள் எல்லா ஊடகங்களாலும் கேட்கப்பட்டன. புதிய தலைமுறை நிகழ்ச்சியிலும் கேட்கப்பட்டது.

இந்த விவாதத்தில் கலந்துகொள்ள ஓய்வுபெற்ற இந்திய இராணுவ உளவுப்பிரிவைச் சேர்ந்த கர்னல் ஹரிஹரன் என்பவரும், இதழாளர் பகவான் சிங்-கும் கலந்து கொண்டனர். அக்மார்க் தினமலர் வாசகர் போல, ’அந்நியன்’ பேசும் டயலாக்குகளைக் கொட்டிக் கொண்டிருந்தார் ஹரிஹரன். அரசியல்வாதிகளின் அலட்சியப் போக்குதான் காரணம் என்றார். டெல்லி உயர்நீதிமன்றத்தில் காவல் பணி பார்ப்பதும், உளவுப் பிரிவில் வேலை பார்ப்பதும் அரசியல்வாதிகள் தான் என்ற உண்மை(!) நமக்குத் தான் தெரியவில்லை போலும்.

பகவான் சிங்கோ, இந்தியாவின் வெளியுறவுக் கொள்கைதான் முக்கியக் காரணம். அவ்ளோ தூரத்தில் இருக்கும் அமெரிக்கா பறந்துவந்து பிற அரபு நாடுகளோடு சண்டை போடுகிற போது, ’பாகிஸ்தானிலிருந்து குண்டு வருகிறது என்று தெரிந்தபின்னும் இந்தியா ஏன் இன்னும் போய் சண்டை பிடிக்கவில்லை’ என்றார்.

மீண்டும் பேசிய ஹரிஹரன், ’கடும் நடவடிக்கை மூலம் அல் கொயிதாவின் தீவிரவாதம் ஒடுக்கப்பட்டிருக்கிறது. அதேபோல் லஷ்கர் இ தொய்பா, இந்தியன் முஜாஹிதீன் போன்ற தீவிரவாத அமைப்புகளின் செயல்பாடுகளும் ஒழிக்கப்பட வேண்டும். இனிமேல் தீவிரவாதம் செய்தாலும் நாம் நினைத்தது நடக்காது என்று எண்ணும் அளவிற்கு கடுமையான நடவடிக்கைகள் மேற்கொள்ளப்படவேண்டும்” என்று கலர்ச் சட்டையில் வந்திருந்தாலும், கழற்றாத இராணுவப் பச்சையின் முறுக்கோடு பேசினார்.

அதெல்லாம் சரிதான். ரொம்பத் தெளிவா சில இஸ்லாமிய அமைப்புகளின் பெயரை மட்டும் சொன்ன ஹரிஹரன், கடந்த 5 ஆண்டுகளில் இஸ்லாமிய அமைப்புகளால் நடத்தப்பட்டதாகச் சொல்லப்பட்ட பல்வேறு குண்டு வெடிப்புகளுக்கு இந்துத்துவ அமைப்புகளே காரணம்; ஆர்.எஸ்.எஸ்-சின் பின்னணி தான் இவற்றில் எல்லாம் இருந்திருக்கிறது என்பதைப் பற்றியெல்லாம் கொஞ்சமும் வாய் திறக்கவில்லை.

டில்லி உயர்நீதி மன்றத்தில் குண்டு வெடித்த அந்தப் பகுதியில் CCTV கேமராக்கள் இல்லை என்பதற்காக கவலைப்பட்ட எந்த ஊடகமும், 2008 மும்பைத் தாக்குதல்களின் போது CCTV கேமராக்கள் இருந்தும் குறிப்பிட்ட இடத்தில், குறிப்பிட்ட நேரத்தில் மட்டும் எதுவுமே வேலை செய்யவில்லையே ஏன்? என்பதையும், அந்த குறிப்பிட்ட நேரத்தில் படுகொலை செய்யப்பட்ட ஹேமந்த் கர்க்கரே குறித்தும் மறந்தும் வாய்திறக்கவில்லை.

எஸ்.எம்.எஸ் அனுப்பினார்கள்; பேக்ஸ் அனுப்பினார்கள்; இ-மெயில் அனுப்பினார்கள்; எனவே அவர்கள் தான் குண்டு வைத்தார்கள் என்று பலமுறை முஸ்லீம் தீவிரவாதிகள் ஏற்றுக் கொண்டதாகச் சொல்லப்பட்ட எண்ணற்ற வழக்குகளின் பின்னணியில் ஆர்.எஸ்.எஸ்-சின் பயங்கரவாதச் செயல்கள் இருந்திருக்கின்றன என்று அம்பலப்படுத்தியதால் கொல்லப்பட்டவர் தான் ஹேமந்த் கர்க்கரே என்பதையும், இந்த பயங்கரவாதச் செயல்களுக்கெல்லாம் இந்திய உளவுத்துறையின் வழிகாட்டுதலும், தூண்டுதலும் எவ்வளவு இருக்கிறது; அதற்குக் காரணம் இந்திய உளவுத்துறையைக் கட்டுப்படுத்தி வைத்திருக்கும் பார்ப்பனியமே என்பதையும் பற்றி எந்த ஊடகமும் கிஞ்சிற்றும் அலட்டிக் கொள்ளவில்லை.

இந்திய உளவுத்துறைக்கு இதிலென்ன பங்கு? ஆர்.எஸ்.எஸ். - இதை செய்ய வேண்டிய அவசியமென்ன? என்று யோசிக்கத் தோன்றுகிறதா? தீவிரவாதிகள் என்றால் முஸ்லீம்கள், முஸ்லீம்கள் என்றாலே தீவிரவாதிகள் என்று பொதுமக்களின் மனதில் பதிய வைக்கவும், அதனூடாக இந்துத்துவ மனப்போக்கை வெகுமக்களிடம் விதைக்கவும் இதை விட சரியான யோசனை உண்டா? இன்னும் நிறைய விவரங்களுக்கு “Who killed Karkare?” நூலைப் படியுங்கள்.

சரி, இப்போ எதற்கு டெல்லியில் குண்டு என்று யோசித்தால், நமக்குக் கிடைக்கும் விடை ஒன்றுதான். அதை அவர்களே (குண்டு வைத்தவர்களே விடுத்திருக்கும் கோரிக்கையின்) சொல்லியிருக்கிறார்கள். அப்சல் குருவின் தூக்கு தண்டனை ரத்து செய்யப்படவேண்டும் என்று ஹர்கதுல் ஜிகாதியிடமிருந்து மின்னஞ்சல் கிடைத்திருப்பதாகச் சொல்கிறார்கள். மூவர் தூக்குக்கு எதிரான போராட்டங்கள் நடைபெற்றுக் கொண்டிருக்கும் வேளையில், உடன் மற்றவர்கள் எழுப்பும் கேள்வி, ”அப்படியென்றால் அப்சல் குருவுக்கும், கசாப்புக்கும் இதே நிலைப்பாடுதானா?” என்பது!

மரண தண்டனை வேண்டாமென்றால் எல்லோருக்கும் தான் என்று ஒன்றாய்க் குரல் எழும்பும் வேளையில், மக்களின் நினைவுகளில் இருந்து மங்கிக் கொண்டிருந்த முஸ்லீம் தீவிரவாதிகள் என்ற வெறுப்புணர்வை மீண்டும் விசிறிவிடவும், ”இவய்ங்க எப்பவும் திருந்த மாட்டய்ங்க; இவய்ங்களையெல்லாம் தூக்கில போடணும் சார்” என்று மக்கள் வாயாலேயே மீண்டும் சொல்ல வைக்கவும் தான் இந்தக் குண்டுவெடிப்பு நிகழ்த்தப்பட்டிருக்க வேண்டும். இதற்குப் பின்னணியில் இருப்போர் யார்? இந்திய உளவுத்துறையின் பங்கு என்ன? என்பது நேர்மையாக விசாரிக்கப்பட வேண்டும்.

குற்றம் செய்ததற்கான எந்த ஆதாரமும் நிரூபிக்கப்படாத நிலையிலும், இந்தியாவின் ஒட்டுமொத்த மனசாட்சியைக் கருத்தில் கொண்டு தூக்குதண்டனை வழங்கப்பட்டிருக்கும் அப்சல் குருவுக்கும் சேர்த்து குரல்கள் கேட்டுக் கொண்டிருக்கும் வேளையில், அவருக்கு ஆதரவான தீவிரவாதிகள் என்று இருந்தால் அவர்கள் குண்டு வைப்பார்களா?

தீவிரவாதிகளைத் தூக்கு மேடைக்கு அனுப்பிய பின்னும் தொடர்ந்து தீவிரவாதம் நடக்கிறது என்று சொல்வார்களேயானால், நாங்கள் கேட்கிறோம்... “அப்போ, தூக்கு தண்டனையால் குற்றம் குறையும் என்பது பீலா தானே!”

’தீவிரவாதிகள் நினைப்பது நடக்கக்கூடாது; அவர்களின் கோரிக்கை நிறைவேற்றப்படக் கூடாது’ என்று பேசும் கர்னல்களின் குரலில் ஒளிந்திருக்கும் மரணதண்டனைகளுக்கு ஆதரவான தொனியை கண்டுகொள்ள வேண்டும். ’கசாப்பையும், அப்சல் குருவையும் தூக்கில போடணும்’ என்று இந்திய ஊடகங்கள் மீண்டும் மீண்டும் அலறி கருத்துருவாக்கம் செய்வதற்குத் தான் இந்தக் குண்டுவெடிப்பு என்ற திசையில் ஏன் விசாரிக்கக் கூடாது? இந்திய உளவுத்துறை இத்தகைய செயல்களை செய்யக் கூடியது தான் என்பது அரசுக்கும் தெரியும்.

இன்று கடைசியாய் வந்த செய்தி இந்தியன் முஜாகிதீன் அமைப்பும் குண்டு வெடிப்புக்கு உரிமை கோரியிருக்கிறது என்பது! அதெப்படி, ஒரு குண்டு வெடிப்புக்கு இரண்டு அமைப்புகள் உரிமை கோரும். இந்தியன் முஜாகிதீன் என்றாலேயே அதில் உளவுத்துறையின் பங்கு இருக்கிறது என்பதை நாம் உறுதிப்படுத்திக் கொள்ளலாம்.

ஹர்கதுல் ஜிகாதியா? இந்தியன் முஜாகிதீனா? இந்திய உளவுத்துறையா? அல்லது இ.மு-வைப் போல ஹர்கதுல் ஜிகாதி என்பது இந்திய உளவுத்துறையின் உருவாக்கம் தானா? ஹேமந்த் கர்க்கரே இல்லையே என்று இப்போது தோன்றுகிறது!

வீணை - சாதனை - ரசனை

2011-07-18T23:03:00.001+05:30

தகுதி, திறமை என்றால் அவாள் தான் என்பது பார்ப்பனர்களின் வசதிக்காக, பார்ப்பனர்களாலேயே கட்டமைக்கப்பட்ட ஒரு கட்டுக்கதை. அதிலும், இசை என்றால் அவாள் தான் என்ற மாயையை அவ்வப்போது பலர் உடைத்து வருகிறார்கள். தமிழ்த் திரை என்று மட்டும் இல்லாமல், தமிழிசை, கர்நாடக இசை என்று சாஸ்திரீய சங்கீதத்திலும் கொடி கட்டிப் பறந்தது என்னவோ நம்மவர்கள் தான்.

கே.பி.சுந்தராம்பாளாக இருந்தாலும், வீணை தனம்மாளாக இருந்தாலும், பாகவதராக இருந்தாலும், கற்க வாய்ப்புக் கிடைத்த தமிழர்கள் தங்கள் திறனால் உலகு புகழ வளர்ந்தார்கள். ”எங்களாவாவை கட்டிண்டதாலதான் எம்.எஸ். இப்படி தேனா பாடுறா!” என்ற இங்கிதம் இல்லாத இவர்களின் சங்கீத பீலாக்களை வரலாறு பதிந்துதான் வைத்திருக்கிறது.

இந்த வரலாற்றின் தொடர்ச்சியாக இதோ நேற்று (17.7.2011) ஓர் இளம் பிஞ்சு, இசைப் பாரம்பரியம் என்றெல்லாம் இல்லாத ஒரு 13 வயது மாணவி 16 மணி நேரம் வீணை வாசித்துச் சாதித்திருக்கிறார். கரூரைச் சேர்ந்த அந்த மாணவியின் பெயர் ஸ்ரீநிதி கார்த்திகேயன். கருவூர் தமிழிசைச் சங்கமும், கருவூர் திருக்குறள் பேரவையும் இணைந்து கரூர், நாரத கானசபாவில் நடத்திய இந்நிகழ்வில் சிறுமி ஸ்ரீநிதியின் இந்தச் சாதனையை ’இந்தியா புக் ஆப் ரெக்கார்ட்ஸ்’ பதிவு செய்திருக்கிறது. (இந்நிகழ்வை வலையில் நேரலை செய்யும் தொழில்முறைப் பணிக்காக அங்கு செல்லும் வாய்ப்பு எனக்குக் கிடைத்தது.)

காலை 8.10-க்கு தொடங்கிய இந்த முயற்சியின் முதல் கட்டம் 3 மணிநேரம் நடந்து 11.10-க்கு முடிந்தது. ஒரு மணிநேரத்திற்கு 10 நிமிடங்கள் ஓய்வு எடுக்கலாம் என்ற விதியின் படி 3 மணிநேரத்திற்கு 30 நிமிடங்கள் ஓய்வுக்குப் பின் 11.40-க்கு மீண்டும் தொடங்கியது. அது 2.40 வரையிலும், பின்னர் 3.10 முதல் 6.10 வரையிலும், மீண்டும் 6.40 முதல் என பல்வேறு கட்டங்களாக நடந்து 12.10 மணிக்கு நிறைவடைந்தது. பரதநாட்டியம், வாய்ப்பாட்டு, கீபோர்டு என பல்வேறு இசைப் பயிற்சிகளையும் மேற்கொண்டு வருகிறார் சிறுமி ஸ்ரீநிதி.

இந்தச் சாதனை முயற்சியில் குறிப்பிடத்தக்க விசயம் என்னவென்றால், பக்க வாத்தியங்களோடு அவர் வாசித்துக் கொண்டிருந்தாலும், பாடலின் இசை இடைவேளைகளிலும் (பல்லவி - சரணம் இடைவேளை, சரணம் - சரணம் இடைவேளை), ஒரு பாடல் முடிந்து அடுத்த பாடலுக்கிடையிலான இடைவேளைகளிலும் கூட ஒரு நொடிக்கு மேலாக வீணை வாசிக்காமல் இருக்கக்கூடாது. விரல்கள் வீணையை மீட்டியபடியே இருக்க வேண்டும்.

அதை மிகத் தெளிவாகவும், அனைவரும் ரசிக்கும் படியும், கர்நாடக சங்கீதப் பாடல்கள், பழைய, புதிய தமிழ்த் திரைப்படப் பாடல்கள், பக்திப்பாடல்கள் என மாற்றி மாற்றி வழங்கி அரங்கிலிருந்த அனைவரையும் அசத்தினார் சிறுமி சிறீ நிதி. ’அப்படிப்போடு, அப்படிப் போடு’வும், ‘காதல் வந்தாலே’யும், ‘அச்சம் என்பது மடமையடா’வும், ‘மலர்ந்தும் மலராத’வும், ‘பழமுதிர்ச்சோலையிலே’வும் இன்னும் பலவும் அந்த விரல்கள் மீட்டிய வீணையிலிருந்து புறப்பட்டு வந்துகொண்டிருந்தது. அதில் இருந்த பலதரப்பட்ட பார்வையாளர்களின் ரசிப்புத் தன்மை என் கருத்தை அதையொட்டிய மற்றொரு திக்கில் செலுத்தியது.

----------------------------------------------------------------------------

ரசனை என்பது புரிதலையும், அறிந்திருத்தலையும் கூட காரணிகளாகக் கொண்டது என்று கருதுகிறேன். நேற்று ஸ்ரீநிதி கார்த்திகேயனின் வீணை இசை நிகழ்ச்சியில் புரியாத பாடல்களை வாசித்ததை விட, சினிமா பாடல்களையும், தெரிந்த பழைய பாடல்களையும் வாசித்த போதுமாணவர்களிடமிருந்தும், பொதுமக்களிடமிருந்தும் கிடைத்த கைதட்டு அதை உணர்த்தியது.

இதே போக்கை வேறொரு நிகழ்வில், ’அஞ்சாதே ஜீவா’ பாடியபோது டாக்டர் சீர்காழி சிவசிதம்பரத்துக்கு இருபால் மாணவர்களிடமிருந்து கிடைத்த வரவேற்பையும், பிற தமிழிசைப் பாடல்களுக்கு பெரியவர்களிடமிருந்து கிடைத்த வரவேற்பையும் பார்க்கும் போது உணர முடிந்தது.

இதை வெறுமனே சினிமாப் பாடல்களுக்கான வரவேற்பு என்று கருதி ஒதுக்கிவிட முடியாது. அடிக்கடி கேட்ட பக்திப் பாடல்களோ, விளம்பரங்களோ, மைய நோக்கு இசைகளோ (செம்மொழி மாநாட்டைப் போல) பெரும் வரவேற்பைப் பெறுவதைக் கவனிக்க முடிகிறது. பாடலைக் கேட்கும் போதே உண்டாகும் மகிழ்ச்சி, ’இது எனக்குத் தெரிந்த ஒன்று’ என்பதிலிருந்து முளைக்கிறது.

எனில், ரசனை வளர்ப்பு என்பது மீண்டும் மீண்டும் கொண்டுபோய்ச் சேர்ப்பதிலேயே இருக்கிறதோ?

-------------------------------------------------------------------------

வால் துண்டு:

நேற்று நான் கண்ட காட்சிகளில் ஒன்று.

வீணையில் பாடலை வாசிக்கும் போது, அடிக்கடி பாடல் கேட்பவர்களால் உடனே இது எந்தப் பாடல் என்பதை அடையாளம் கண்டுகொள்ள இயலும். ’செல்லாத்தா..’ போன்ற குத்து-பக்திப் பாடல்கள் வாசிக்கப்பட்டு வெகுநேரம் கழித்து, பாடல் ஒன்றை ஸ்ரீநிதி வாசித்துக் கொண்டிருக்கும்போது, எனக்கருகில் அமர்ந்திருந்த காணொளி படத்தொகுப்பாளர் ஒரு திக்கில் கையைக் காட்டினார். கடைசி வரிசையில் இருந்த வெகு ஏழ்மையான பணியாளர்களில் ஒரு அம்மையாருக்கு ’சாமி’ வந்துவிட்டது. இரண்டு பெண்கள் அவரை சமாதானப் படுத்த முயன்றும் முடியவில்லை. விபூதியெல்லாம் வைத்துப் பார்த்தார்கள் வேலைக்காகவில்லை. கடைசியில் அசிங்கமாகிவிடக்கூடாதே என இழுத்துச் சென்றுவிட்டார்கள். இதில் அசிங்கப்பட என்ன இருக்கிறது என்கிறீர்களா?

அந்த அம்மையாருக்கு சாமி வரவைத்த பாடல் என்ன தெரியுமா?

“சித்தாடை கட்டிக்கிட்டு, சிங்காரம் பண்ணிக்கிட்டு” என்ற பழைய தமிழ் சினிமா பாடல். ஆடுவதற்கு ஏதுவான தாளக்கட்டும், துள்ளல் தரும் இசைக் குறிப்பும், தன்னிலை மறக்கச் செய்யும் கருவிகளின் இசையும் தான் சாமி வரவைக்கின்றன என்று திருவிழா சாமியாடுதலை எத்தனை முறை சொன்னாலும் நம்பாதவர்கள் - நேற்றைய நிலையைப் பார்த்திருந்தால் நம்பக்கூடும்.

ராசா வீடா? நவீன கோயபல்ஸ்களின் புளுகு அம்பலம்

2011-07-07T17:42:00.000+05:30

”அய்யய்யோ... பாருங்கள்! இது தமிழ்நாட்டில் கட்டப்பட்டிருக்கும் ஆ.ராசாவின் வீடு... எவ்வளவு மோசமானவர்கள் பாருங்கள்!” என்ற தொனியில் மின்னஞ்சல் ஒன்று அனைவர் முகவரிக்கும் ஓலமிட்டு வருகிறது. நீங்களும் கூட அதனைப் பார்த்திருக்கக் கூடும். இதோ அந்த மின்னஞ்சலின் நகல்.

------------------------------------------------------------

Spectrum Raja's House ....in Tamil Nadu

. . . Hold YOUR breath.

Forward it to as many as a true Indian Citizen.

Indians are poor but INDIA is not a poor country". Says one of the swiss bank directors.

He says that "280 Lacs crore" of Indian money is deposited in swiss banks which can be used for 'taxless' budget for 30 yrs. Can give 60 0000000 jobs to all Indians. From any village to Delhi 4 lane roads. Forever free power supply to more than 500 social projects. Every citizen can get monthly Rs. 2000/- for 60 yrs. No need of World Bank & IMF loan. Think how rich politicians block our money. We have full right against corrupt politicians.

Forward to everybody so that every Indian can read this.

-----------------------------------------------------------------------------------------------------------------------------------

ஆ... அடேயப்பா... எவ்வளவு பெரிய சொகுசு பங்களா...? இது ஆ.ராசாவினுடையதா...? ஊடகங்கள் சொன்னதெல்லாம் உண்மையாக இருக்குமோ என்று ஒரு கணம் எண்ணத் தோன்றுகிறதா?

இப்படி அளந்துவிட்டிருக்கும் இந்த மின்னஞ்சல் உண்மையானதா? என்பதையெல்லாம் கொஞ்சமும் சிந்தித்து பார்க்காமல், நம் பங்குக்கு நாமும் பரப்புவோம் என்று பகுத்தறிவற்றவர்களாக forward மேனியா பிடித்தலைகிறார்கள் நம் தமிழர்கள்.

அதிலும் சும்மா இல்லை... ”நீ ஒரு சுத்தமான ஆம்பிளையா இருந்தா..?” அப்படிங்கற ரீதியில் ”உண்மையான இந்தியனா இருந்தா கேள்வி கேட்காம மடத்தனமா இதை forward பண்ணுன்னு” ஒரு சீண்டல் வேறு.

இதில் தரப்பட்டிருக்கும் தகவல் உண்மையானது தானா? இப்படி ஒரு வீடு தமிழ்நாட்டில் இருக்கிறதா? அந்த வீடு முன்னாள் அமைச்சரும், நாடாளுமன்ற உறுப்பினருமான ஆ.ராசா அவர்களுக்குச் சொந்தமானதா? இந்தப் புகைப்படத்தை வெளியிட்டவர்கள் யார்? உள்ளே நுழைந்து ரசித்து, புகைப்படம் எடுத்தவர்கள் யார்? அவ்வளவு பெரிய அப்பாடக்கர் பத்திரிகைக்காரர் யார்? யாராவது ஆதாரத்துடன் பதில் சொல்ல முடியுமா?

முடியாது. காரணம்... இப்படியொரு வீடு, ராசா அவர்களுக்கு இல்லை.. இன்னும் சொல்லப்போனால் சென்னையில் அவருக்கு குடியிருக்க சொந்த வீடே கிடையாது.

பிறகென்ன இந்தப் படம் என்று யோசிக்கிறீர்களா?

பின்வரும் இணைப்பையும் இந்தப் படங்களையும் பாருங்கள். உண்மை புரியும்.

http://www.sothebyshomes.com/Santa-Barbara-Real-Estate/sales/0113311#

அமெரிக்காவின் கலிபோர்னியா மாகாணத்தில் உள்ள சாண்டா பார்பரா கடற்கரைப் பகுதியில் கட்டப்பட்டு இணையத்தில் விற்பனைக்கு விளம்பரம் செய்யப்பட்ட The Glass Pavilion என்ற வீட்டின் புகைப்படத்தை எடுத்துப்போட்டு, “இது ராசாவின் வீடு... ஊழல் பணம்இதில் இருக்கும் கழிவுத் தொட்டிக்குள் தான் புதைக்கப்பட்டிருக்கிறது” என்கிற ரீதியில் புரளி கிளப்பி அதனூடாக, தமிழகம் குறித்தும், ராசா அவர்களைக் குறித்தும், தமிழகத்தைச் சேர்ந்தவர், தாழ்த்தப்பட்ட இனத்தவர், சமூக சீர்திருத்த சிந்தனை பெற்றவர் என்ற காழ்ப்புணர்வு காரணமாக வட நாட்டவரும், பார்ப்பனர்களும், முதலாளித்துவவாதிகளும் பரப்பும் இந்த மோசடி மின்னஞ்சலை அரை வேக்காட்டுத்தனமாகவோ, அறியாமையாலோ பரப்பிடும் பணியை நாம் செய்யலாமா?

இப்படி மோசடியான குற்றச்சாட்டை முன்வைத்து, படம் போட்டு “ராசாவின் சென்னை வீடு” என்பது போல் படம் போட்டு பரப்பும் அறிவுஜீவிகளே! கோயபல்ஸ் இல்லாத குறையைப் போக்க ஏன் இந்த ஈனப்பிழைப்பு!

இந்த மோசடி மின்னஞ்சலை திட்டமிட்டு தான் உருவாக்கியிருக்கிறார்கள். இதைப் போலவே தான் காற்று ஊதப்பட்ட பலூனாக இருக்கும் 1,76,000 கோடி என்ற போலியான கற்பனைத் தொகையை வைத்து பரப்பப்பட்ட பிரச்சாரமும்! அந்த வழக்கு நடைபெற்று முடிவு வரட்டும். உண்மை புரியும்.

ஆனால், வேறு யாருக்கும் இல்லாத அளவுக்கு, வேறு எந்த வழக்குக்கும் இல்லாத அளவுக்கு முக்கியத்துவத்தை இந்த வழக்குக்கு ஊடகங்களும், பார்ப்பனர்களும் வழங்கி, நம்மை ஏதோ ஒரு மாயையில் ஏன் மூழ்க வைத்திருக்கிறார்கள்? ஏன் அதை ஊதிப் பெரிதாக்குகிறார்கள்? என்பதை யோசித்துப் பார்த்தால் இந்த மாய்மாலங்களுக்கு காரணம் புரியும். அண்டப் புளுகு... ஆகாசப் புளுகு.. என்பார்கள்... அதையெல்லாம் விஞ்சும் ஸ்பெக்ட்ரம் புளுகுகள் தான் இன்றைய பார்ப்பன ஊடகங்கள் உங்களுக்குத் தருபவை...

இந்த போலி மின்னஞ்சல் ஆதாரமில்லாமல் உடைந்து நொறுங்கியது போல, இந்தப் போலிக் குற்றச்சாட்டுகளும் உடைந்து நொறுங்கும்.

-----------------------------------------------------------------------

இதைப் போன்ற இன்னும் பிற போலி மின்னஞ்சல்கள் குறித்து பதிவு எழுத எண்ணிக் கொண்டிருந்தேன் வெகு நாட்களாக... ! கடந்த மார்ச்சில் இது குறித்து டெல்லியிலிருந்த தோழர் க.எழிலரசன் விவரம் கேட்ட போது தேடிப் பார்க்கையில் இந்தத் தகவல் கிடைத்தது, வடநாட்டிலும், தமிழ்நாட்டிலும் ஒட்டி ஓய்ந்திருந்த அந்த மின்னஞ்சலுக்கு மட்டும் பதில் அனுப்பிவிட்டு பிறகு விரிவாக எழுதலாம் என்றிருந்தேன். ஆயினும் இன்னும் உலாவிக் கொண்டிருக்கும் இந்த டுபாக்கூர் மெயிலுக்கு சரியான தகவல்களுடன் பதில் சொல்ல நிரந்தமாகப் பதிய வேண்டியது நம் கடமையல்லவா..? அதனால் தான் இந்தப் பதிவு...

அடுத்த பதிவு விரிவாக...:
ஹோக்ஸ் மெயில்களும் கோயபல்ஸ் பிரச்சாரமும்!

சின்னக்குத்தூசி - சில நினைவுகள்

2011-05-23T15:46:00.000+05:30

திராவிட இயக்க சிந்தனையாளர், எழுத்தாளர், இதழாளர் சின்னக்குத்தூசி அவர்கள் நேற்று (22.5.2011) காலை இயற்கை எய்தினார். திருமணம் செய்துகொள்ளாமல் கூட தன்னை முழுமையாக இயக்கத்துக்கும் கொள்கைக்கும் ஒப்படைத்துக் கொண்ட கொள்கை வீரர். பிறப்பால் பார்ப்பனர் தான்... ஆனால் அதற்கான எந்த அடையாளமும் குணத்தின் எந்தத் துளியிலும் இருக்காது. உண்மையில் இவர் தான் அக்கிரகாரத்தின் அதிசய மனிதர். பொதுவுடைமை இயக்கத்தவருடன் பணியைத் தொடங்கி, திராவிட இயக்கத்தில் இணைந்து இறுதிவரை கொள்கையில் உறுதியாய் இருந்தவர்.

1996-97-க்குப் பிறகு நக்கீரனில் அவர் எழுதத் தொடங்கியிருந்தார். பதின்ம வயதின் தொடக்கத்தில் வாசிப்பு வேகம் கூடியிருந்த எனக்கு, நக்கீரனில் ஆதாரத்துடன், திராவிட இயக்க உணர்வுடன் வெளிவரும் சின்னக்குத்தூசியின் கட்டுரைகள் ஈர்ப்பை அளித்தன. அவர் யாரென விசாரித்த போது, ”பிறப்பால் பார்ப்பனர். ஆனால் உறுதியான பெரியார் பற்றாளர். கடுமையான திராவிடர் இயக்க உணர்வாளர்” என்று சாக்ரடீசு அண்ணன் சொல்லியிருந்தார். எனக்கோ பெரிய ஆச்சரியம். இப்படியொரு மனிதன் இருக்க முடியுமா?

பின்னர் ’பொன்னர் - சங்கர்’ படித்த போது, அதில் கலைஞரின் முன்னுரையில், தியாகராசன் என்ற சின்னக்குத்தூசி என்று குறிப்பிட்டு நன்றி தெரிவித்திருந்தார். அவரின் இயற்பெயரை அப்போது தான் அறிந்து கொண்டேன். தொடர்ந்து அவர் எழுதிய நக்கீரன் கட்டுரைகள் பலவற்றை எனது கோப்புகளில் இன்றும் வைத்திருக்கிறேன். குறிப்பாக, பாரதிய ஜனதா அரசின் இந்துத்துவ போக்குகளைப் போட்டுடைத்த கட்டுரைகள், வந்தேமாதரம் பாடல், தமிழ் காட்டுமிராண்டி மொழி என்று பெரியார் சொன்னது ஏன்? போன்றவை.

’சங்கராச்சாரியார்-யார்?’ என்ற ஆசிரியரின் ஆய்வு நூலிலும் இவருடைய பணியை அறிந்தேன். சங்கராச்சாரியை ‘எதிரொலி’ ஏட்டுக்காக, சின்னக்குத்தூசியும், ஞாநியும் எடுத்த பேட்டி குறுநூலாக வந்திருந்தது. அதில் தான் உளறுவாயன் ஜெயேந்திரன் பல விசயங்களை ஒப்புக் கொண்டிருந்தான். ’பகவான்ட்ட வேண்டிண்டதால தான் கருணாநிதி படுத்துட்டார்’ என்று காய்ச்சலில் கலைஞர் பாதிக்கப்பட்டதைப் பற்றி மகிழ்வோடு பேசியது, ஆசிரியர் வீரமணியைப் பேட்டியெடுக்க கேள்விகளைத் தயார் செய்து ‘சோ’ ராமசாமியை அனுப்பியது, எதைப் படிக்க மறந்தாலும், ”விடுதலை’யையும், முரசொலியையும் முதல் ஆளா படிச்சிடுவேன்” என்று ஒப்புக் கொண்டது உள்பட.

அவரைச் சந்திக்க வேண்டும் என்ற ஆவலும் அதற்குள்ளாக எனக்குள் வந்திருந்தது. காலப்போக்கில், ஊடக ஆர்வம் என்னை சென்னைக்கு இழுத்து வந்தபின் திடலில் நடைபெறும் ஆசிரியரின் உரை கேட்க நண்பர்களோடு வருவார் சின்னக்குத்தூசி. மெலிந்த உடல். தலையும், அணிந்திருக்கும் கண்ணாடியும் உடலுக்குப் பொருத்தமற்றதாக இருக்கும். உடுத்தியிருக்கும் வெள்ளுடைக்குப் போட்டியிடும் அவரின் நிறம்.

அரிதாய்க் கிடைக்கும் ஓய்வு நேரங்களில் அண்ணனுடன் மூத்த தோழர்களைச் சந்திக்கச் செல்வதுண்டு. அப்படி ஒருமுறை இதழாளர்களின் வேடந்தாங்கல் என அறியப்படும் 13, வல்லப அக்கிரஹாரம் தெருவில் உள்ள சிறிய அறைக்குச் சென்றோம். நூல்களாலும், இதழ்களாலும் சூழப்பட்ட அறைக்குள் ஓர் அறிவுக் களஞ்சியத்துக்குள் களஞ்சியமாக அமர்ந்திருந்தார். என்னை திரைப்படக் கல்லூரி மாணவன் என்று அறிமுகப்படுத்திவிட்டு, ’உண்மை’யில் தொடர்ந்து நான் எழுதி வருவதைப் பற்றிச் சொன்னார் அண்ணன். உண்மை முன்பை விடச் சிறப்பாக வருவதைப் பற்றியும், நான் எழுதி வருவதைப் பற்றியும் மகிழ்ச்சி தெரிவித்த அய்யா சின்னக்குத்தூசி, “நானும் ஒரு ஆறு மாசம் ’உண்மை’யை கவனிச்சுக்கிட்டிருந்தேன் சார். ஆசிரியர் பார்க்கச் சொன்னார். இப்போ நல்லா வருது சார்.” என்று மனதாரப் பாராட்டினார். உண்மை இதழைப் பார்த்துக் கொள்ளச் சொல்லும் அளவுக்கு நம்பிக்கைக்குரியவராக இருந்திருக்கிறார் என்பது மேலும் ஆச்சரியமூட்டியது. அப்போதே எனக்குத் தோன்றியது ஓர் எண்ணம். அது ஆசையாகவும் ஆனது.

இரத்த உறவுகள் இன்றி, முற்றிலும் நண்பர்கள், தோழர்கள், கொள்கை என்றே வாழ்ந்துவிட்ட சின்னக்குத்தூசி அவர்கள், தனது மரணத்திற்குப் பின் தன் இறுதி நிகழ்வின் செலவுகளுக்காக ஒரு குறிப்பிட்ட தொகையை, தான் தங்கியிருந்த மேன்சன் உரிமையாளரிடம் கொடுத்து வைத்திருக்கிறார் என்று நான் கேள்விப்பட்ட தகவல் சின்னக்குத்தூசியின் மீதான மதிப்பை, அன்பை இன்னொரு பங்கு உயர்த்தியது.

சந்திப்பு முடிந்து வெளியில் வந்ததும், அண்ணனிடம் என் எண்ணத்தைச் சொன்னேன். சின்னக்குத்தூசியைப் பற்றிய ஆவணப்படம் எடுக்க வேண்டும் என்பது தான் அது. இவ்வெண்ணம் குறித்து தோழர் இதழாளர் கோவி.லெனின் அவர்களிடமும் பகிர்ந்து கொண்டோம். நக்கீரனில் பணியாற்றுவதோடு மட்டுமல்லாமல், சின்னக் குத்தூசி அவர்களின் நெருங்கிய நண்பரின் மகன் தான் கோவி.லெனின். அவருக்கும் அது அவசியம் என்றே பட்டது. நாங்களும் சின்னக்குத்தூசி அவர்களிடம் அனுமதி கேட்டோம். லெனின் மூலமாகவும் கேட்டோம். வேண்டாம் என்றே சொல்லிக் கொண்டிருந்தார்.

பெரியார் திடலில் இதழாளர் பயிற்சிப் பட்டறை ஏற்பாடு செய்யப்பட்ட போது அவரை அழைக்க வேண்டும் என்று முடிவு செய்தோம். ஆனால் உடல்நலமில்லாமல் அப்போதே அவர் மருத்துவமனை புகுந்து 5 மாதங்களுக்கு மேல் ஆகிவிட்டிருந்தது. இதைச் சாக்காக வைத்தாவது அவரைப் பேசச் செய்து பதிவு செய்துவிட வேண்டும் என்று நினைத்தேன். அப்போது அதற்கும் வாய்ப்பில்லாத சூழலில் அவர் உடல்நலம் கடுமையாய் பாதிக்கப்பட்டிருந்தது.

கடந்த மாதம் தேர்தல் முடிந்து, 10 நாட்களுக்குப் பிறகு மருத்துவமனையில் அவரைச் சந்தித்துவிட்டு வரலாம் எனக் கிளம்பிய அண்ணனுடன் சென்றிருந்தேன். எங்களுக்கு முன்பே அய்யா கோபண்ணா அங்கே அமர்ந்திருந்தார். ஓராண்டுகளுக்கும் மேலாக மருத்துவமனைப் படுக்கையிலேயே இருந்த சின்னக்குத்தூசி அவர்களுக்கு கோபண்ணா, பாலகிருஷ்ணன், திருநாவுக்கரசு போன்ற தோழர்கள் தான் பேச்சுத் துணை. இதற்கு முதல்வாரம் தான் கவிஞர் கலி.பூங்குன்றன் அவர்கள் சென்று பார்த்துவிட்டு வந்தார். வாய்ப்புக் கிடைக்கும் போது ஆசிரியரும் சென்று பார்த்து நலம் விசாரித்து வருவார். நக்கீரன் சார்பில் பார்த்திபன் மற்றுமொரு தோழர் என இருவர் மாற்றி, மாற்றி அய்யாவைக் கவனித்துக் கொண்டிருந்தனர். கடந்த ஓராண்டுகளாக பில்ரோத் மருத்துவமையில் நக்கீரன் கோபால் அவர்களின் கவனிப்பில் தான் பாதுகாக்கப்பட்டார்.

”சாவை எதிர்நோக்கிக் கொண்டிருக்கிறேன்.என்னை மருத்துவமனையில் இருந்து விடுவித்துவிட்டால் கூடப் போதும். நான் அப்படியே இரண்டொரு நாளில் இறந்துவிடுவேன். மருத்துவர்களிடம் கெஞ்சிப் பார்த்துவிட்டேன். ஒப்புக் கொள்ளமறுக்கிறார்கள்” என்று அவர் சொல்லும் போது, யாரையும் சார்ந்து இருக்காமல் தொடர்ந்து இயங்கிக் கொண்டேயிருந்த ஒரு மனிதனுக்கி, தனக்கு பிறர் சார்பு அவசியமாகிவிட்டது என்பதே பெரும் பாரத்தைத் தந்திருந்தது என்பதை உணர முடிந்தது. கவிஞரிடம் இதைச் சொல்லும்போது, சின்னக்குத்தூசி அவர்களுக்குக் கண்களில் நீர் வழிந்ததாம். மிகுந்த வருத்தத்தோடு ஏற்கெனவே கவிஞர் இது பற்றி சொன்னார்.

நேரில் அதே வாசகங்களைக் கேட்டது இன்னும் வருத்தத்தை அளித்தது. அந்த நிலையிலும், தனது நண்பரின் (லெனின் அப்பா) உடல் நலம் குறித்துக் கவலைப் பட்டு அதற்காக ஆசிரியரிடம் ஆலோசனை கேட்டிருப்பதாவும், அவரிடம் நினைவுபடுத்துமாறும் கேட்டுக் கொண்டார் சின்னக்குத்தூசி. அன்னா ஹசாரே குறித்த தகவல்கள் வேண்டும் எனக் கேட்டிருந்தார். விடுதலையில் வந்தவற்றையும், The Hindu கட்டுரைகளும் கேட்டார். படிக்கச் சிரமமாயிருந்தாலும், படிக்கச் சொல்லிக் கேட்பதும், சொல்லி எழுதச் சொல்வதும் அவரை ஓரளவு காத்துவந்தன.

கடந்த இரு தினங்களுக்கு முன், என் அண்ணனுக்கு தொலைபேசியிருக்கிறார். அண்ணனும் சென்று சந்தித்துவிட்டு வந்தார். நேற்று காலை பெரியார் சாக்ரடீசு அண்ணன் சின்னக்குத்தூசி மறைந்த தகவலை தெரிவித்தபோது வேதனையோடு, நக்கீரன் அலுவலகத்துக்குச் சென்றோம். அவருடன் பணியாற்றியோர், அவரைப் பின்பற்றியோர், அவர் மீது அன்பு கொண்டோர் என தோழர்களால் நிரம்பியிருந்தது அந்த இடம். நக்கீரன் கோபால், க.திருநாவுக்கரசு ஆகியோரோடு ஆறுதலைப் பகிர்ந்துகொண்ட ஆசிரியர் கி.வீரமணி சுமார் அரை மணி நேரத்துக்கும் மேலாக அவர் உடல் அருகிலேயே நின்று கொண்டிருந்தார். உட்காரச் சொன்னபோது கூட மறுத்துவிட்டார். கலைஞர் காலையிலேயே வந்து சென்றுவிட்டார். அவரது பேனா மூடப்பட்டு சட்டையில் சொருகப்பட்டிருந்தது... திராவிட இயக்கச் சிந்தனையைப் பதிவு செய்துகொண்டிருந்த அந்தப் பேனா ஓய்வு கொண்டுவிட்டது.

எவ்வித மூடநம்பிக்கைகளுக்கும் இடமின்றி நடைபெற்றது இறுதி ஊர்வலம். ராயப்பேட்டை நக்கீரன் அலுவலகத்திலிருந்து, மயிலாப்பூர் மயானம் வரை ஊர்வலத்தில் நடந்து வந்தார் தளபதி மு.க.ஸ்டாலின். உடன் பரிதி இளம்வழுதி, மேயர் மா.சுப்பிரமணியம், அசன் முகமது ஜின்னா, ஜெ. அன்பழகன் உள்ளிட்டோர் கலந்துகொண்டனர். மயான வாயிலில் காத்திருந்த தமிழர் தலைவர் கி.வீரமணி, ஆற்காடு வீராசாமி ஆகியோரும் இணைந்து கொண்டனர். பத்திரிகையாளர்கள் சூழ வீரவணக்க முழக்கம் ஒலிக்க இறுதி நிகழ்வு நடந்து முடிந்தது. கட்சி வேறுபாடில்லாமல்

இரண்டாண்டுகளுக்கு முன் ஒரு முறை உண்மைக்காக ஒரு கருத்துக் கேட்க வேண்டும் என்ற காரணத்தைப் பயன்படுத்தி, அவரிடம் சொல்லாமல்கூட, கையுடன் வீடியோ கேமராவையும் எடுத்துச் சென்றுவிட்டோம் நானும் உடுமலையும். அப்படியே பேச்சுக் கொடுத்து கொஞ்சம் நீளமாக வளர்த்துவிடலாம் என்ற நப்பாசை. கேமராவைத் தூக்கியதும், அவருக்கே உரிய குரலில், மெதுவாக ஆனால் உறுதியாக, ’முதல்ல அதை உள்ளே வையுங்க சார்’ என்று மூடி உள்ளே வைக்கும் வரை விடமாட்டேன் என்றுவிட்டார். கடைசிவரை அவரைப் பற்றிய ஆவணப்படம் அல்லது குறைந்தபட்சம் அவருடைய ஒரு காணொளிப் பேட்டியைக் கூட எடுக்க முடியவில்லை. அவரது மறைவையும், இறுதி ஊர்வலத்தையும் விடாமல் பதிவுசெய்தன நக்கீரன், பெரியார் வலைக்காட்சி கேமராக்கள். தடுப்பதற்கு அவரால் முடியவில்லை.

----------------------------------------------------------------------

படத்திறப்பு நிகழ்வு:

வருகின்ற மே. 29 ஞாயிறு அன்று சென்னை பெரியார் திடலில் சின்னக்குத்தூசியின் படத்திறப்பு விழா நடைபெறவுள்ளது. திராவிடர் கழகத் தலைவர் கி.வீரமணி, தளபதி மு.க.ஸ்டாலின், பேராசிரியர் சுப.வீரபாண்டியன், நக்கீரன் கோபால் மற்றும் இதழாளர்கள் தலைவர்கள் பங்கேற்கிறார்கள்.

கொள்கை வீரனான தோழனை இழந்த வருத்தத்துடன் தமிழர் தலைவர் கி.வீரமணி

இறுதி வரை உறுதியாய் நின்ற அக்கிரகாரத்து அதிசய மனிதருக்கு, அய்யாவின் வழித்தோன்றலின் இறுதி மரியாதை. உடன் நக்கீரன் கோபால், கவிஞர் கலி.பூங்குன்றன், திராவிட இயக்க எழுத்தாளர் க.திருநாவுக்கரசு (நக்கீரன் அலுவலகத்தில்...)

இறுதிக் காலத்தில் சின்னக்குத்தூசியைப் பாதுகாத்த நக்கீரன் ஆசிரியரும் ஆசிரியரும் ஆறுதல் பகிர்வு

எப்போதும் சமூக சீர்திருத்தத்திற்கான சிந்தனையை விதைத்துக் கொண்டிருந்த பேனா ஓய்வெடுக்கிறது சின்னக்குத்தூசியின் சட்டைப் பையில்..

இறுதி மரியாதை செலுத்த வந்த மு.க. தமிழரசு

இதழாளர்கள், கொள்கை உணர்வாளர்களோடு இறுதிப் பயணம்

மறைந்த திராவிட இயக்கச் சிந்தனையாளர் சின்னக்குத்தூசி அவர்களின் இறுதி ஊர்வலத்தில் முழுக்கப் பங்கேற்று அந்தக் கொள்கை வெறியனுக்கு மரியாதை செய்த தளபதி! உடன் பரிதி இளம்வழுதி, ஜெ.அன்பழகன், அசன் முகமது ஜின்னா, மா.சுப்பிரமணியன்

சாலையில் நின்றோரெல்லாம் மறைந்தவர் யாரென்று கேட்டபடி தோழர்களைப் பார்த்துக் கொண்டிருக்கின்றனர். சுயநலம் பாராத கொள்கை வீரனுக்கு தளபதியின் மரியாதை

இதழாளரின் மாலை நேர வகுப்பாசிரியராக இருந்த சின்னக்குத்தூசியின் மாணவர்கள் - இன்றைய இதழாளர்கள்

இறுதி மேடையில் சின்னக்குத்தூசியின் உடல்... சூழ்ந்து நிற்கும் தமிழ்ச் சொந்தங்கள்

வெந்தணலில் இட்டாலும் மாறாத கொள்கைக் கோமான் தகனமேடையில்..

தோழனை இழந்த வருத்தத்துடன் கவிஞர் கலி.பூங்குன்றன், பாலகிருஷ்ணன், கயல் தினகரன்

மே 29 அன்று சின்னக்குத்தூசியாரின் படத்திறப்பு நிகழ்வுக்கு திட்டமிடல்.. நிகழ்வு இடம்:பெரியார் திடல்

கொஞ்சம் தயக்கத்தோடும், நிறைய வருத்தத்தோடும்...

2011-04-14T00:25:00.002+05:30

எனதருமை தமிழீழச் சொந்தங்களே!

கொஞ்சம் தயக்கத்தோடும், நிறைய வருத்தத்தோடும் உங்களிடம் இதனைப் பேசத் துணிகிறோம். இதைப் பேசுகிற உரிமை எமக்கிருக்கிறதென்றும் கருதுகிறோம். இதனால் எம்மீது உங்களில் சிலருக்கும், எம்மில் சிலருக்கும் கூட வருத்தம் உண்டாகலாம். ஆயினும் யாரேனும் ஒருவர் இது குறித்துப் பேசியே ஆகவேண்டும்.

தமிழக அரசியலில் யார் யார் எப்படி செயல்பட வேண்டும் என்பது பற்றி அருள்கூர்ந்து நீங்கள் கருத்து தெரிவிக்காதீர்கள். இனப்பாசத்தின் அடிப்படையில், எம் உறவுகள் என்ற அடிப்படையில், தமிழனுக்கென ஒரு கொடி உலக அரங்கில் பறக்கட்டும் என்ற ஆசையில் தமிழீழத்துக்கான எங்கள் ஆதரவு அமைகிறது. அதே வேளையில் எம் தமிழ்நாட்டின் நிலைக்கேற்ப, எங்களின் தேவைகளுக்கேற்ப, இங்குள்ள சூழல்களைப் பொறுத்து யாரை ஆதரிப்பது, யாரை எதிர்ப்பது என்பது எங்கள் விருப்பம்.

அதை விடுத்து, உங்கள் விருப்பத்திற்கு செயல்படவில்லை என்பதற்காக கலைஞரைத் திட்டுவது, ஆசிரியர் வீரமணியைத் திட்டுவது, திருமாவை, சுப.வீ-யைத் திட்டுவது, தரக்குறைவாகப் பேசுவது என்று நீண்ட உங்கள் பட்டியல், இப்போது வைகோ வரை வந்திருக்கிறது. தெளிவாகச் சொல்கிறோம்... உங்களுக்காக நாங்கள் இயக்கம் தொடங்கவில்லை. எமது அடிமைச் சூழல்களுக்கு மத்தியில் தான் ஈழத்தமிழர்க்கான எங்கள் குரலும் ஓங்கி ஒலிக்கிறது. கடந்த 30 ஆண்டு காலத்தில் எமக்கான போராட்டங்களைவிட தமிழீழத்திற்கான போராட்டம் தான் தமிழ்நாட்டில் அதிகம்.

(2008-இல் Srilanka Guardian-இன் பார்வையில் ’தமிழ்நாட்டில் தமிழீழ அரசியல்’. Terror என்று அவன் தேசியத் தலைவரைக் குறிப்பிடுகிறான். மற்ற தலைவர்களை அதைக்கொண்டு வகைப்படுத்துகிறான். இதில் Terror என்ற வார்த்தையிலும், Victim of Terror, Forgetting terror- நபர்களிலும் நான் ஒத்துப் போகவில்லை.)

எப்படி சிங்களத்தின் கொடுமையை நாங்கள் நேரடியாக அனுபவித்ததில்லையோ (மீனவர் படுகொலை தவிர்த்து), அதே போல் இங்கிருக்கிற பார்ப்பனியக் கொடுவிஷத்தின் கொடுமைகளை நீங்கள் நேரடியாக அனுபவித்ததில்லை.

ஆனால் ஈழத் தமிழினத்தின் அழிவில் எந்த ஒரு தனி இயக்கத்துக்கும்(காங்கிரஸ்), தனிப்பட்ட மனிதருக்கும் இருக்கும் பங்கை விட ஆயிரம் மடங்கு வேகமாகவும், ஆழமாகவும் பார்ப்பனியத்தின் பணி இருக்கிறது. இன்னும் சொல்லப் போனால், பார்ப்பனியமே இவர்களை இயக்குகிறது. இயக்கங்களைப் பிரிப்பதும், மக்களைத் திசை திருப்புவதும், பார்ப்பனியமே. அதன் பல்வேறு கரங்கள் தான் உளவுத்துறையும், ஊடகங்களும்.

இப்படி ஈழத் தமிழர்களையும் சேர்த்து, எம் மக்கள் புரிந்துகொள்ள விரும்பாத, கண்ணுக்குத் தெரியாமல் போரிடும் எதிரியுடன் தினம் தினம் போராடிக் கொண்டிருக்கிறோம். இதில் எம்முடன் கரம் கோர்த்து போராட வேண்டிய நீங்கள், எமக்கெதிராக கட்சிகட்டி நிற்பது எவ்வகையில் சரியானது.

இதில் இன்னொரு பெரும் கொடுமையாக, ஆயிரம் ராஜபக்சேவுக்கு நிகரான மோடி என்னும் கொடுங்கோலனுக்கு அத்தனை பார்ப்பன ஊடகங்களும் ஆதரவுக் கரம் நீட்டிக் கொண்டிருக்க, அவனைப் போன்ற எண்ணற்ற வெறியர்களின் கூடாரமாகத் திகழும் ஆர்.எஸ்.எஸ் இயக்கமும், அதன் கிளைகளும் இந்த நாட்டையே விழுங்கத் துடித்துக் கொண்டிருக்கின்றன. இவர்களுக்கு எதிராக நாங்கள் எப்படி வியூகம் வகுப்பது, அணி திரட்டுவது என்று யோசித்துக் கொண்டிருக்கிறோம். ஆனால், ஆத்திரத்தால் அறிவிழந்த சிலர் மோடியைப் பாராட்டுவதையும், பா.ஜ.க-வைப் பாராட்டுவதையும், அதை ஈழத் தமிழர்களின் பேரால் செய்வதும் வெந்த புண்ணில் சூலாயுதத்தைப் பாய்ச்சுவதாகும்.

எம் தமிழ்நாட்டு மக்களின் விடியலுக்காக இயக்கம் நடத்துகிற நாங்கள், எம்மினம் என்கிற துடிப்பில் உங்களுக்குக் கரம் தர முன்வருகிறோம். அத்தகைய சூழலிலும் நாங்கள் சொல்வதை நீங்கள் கேளுங்கள் என்ற தொனியில் எங்களுக்குக் கட்டளை விதிப்பதும், உணர்வோடு கரம் தருவோரை, தமிழக அரசியலில் அவர்களது நிலைப்பாடு குறித்து விமர்சனம் எழுப்பி தட்டி விடுவதும் அறிவார்ந்த செயல் ஆகுமா?

சகோதர யுத்தம் என்று தப்பித் தவறி யாராவது பேசினாலோ, ஈழத்தில் ஜாதிப் பிரச்சினை என்று தமிழகத் தமிழர்கள் யாராவது பேசிவிட்டாலோ கூட ”உங்களுக்கென்ன தெரியும், தமிழகத்தோடு எங்கள் சூழலை ஒப்பிடாதீர்கள்” என்று கொதித்துக் கொந்தளிக்கும் எம் ஈழச் சொந்தங்களே! எங்களின் அரசியல் நிலை உங்களுக்கென்ன தெரியும் என்று நாங்கள் கேட்கிறோம். (நாளை ஈழம் விடிந்தால் அங்கு ஜாதி ரீதியாக ஒடுக்கப்படும் குரல் எழுந்தாலும் நிச்சயம் நிலைமையைப் புரிந்துகொண்டு எங்கள் குரல் இருக்கும் என்பது ஒரு பக்கம்)

தனக்கான இடஒதுக்கீட்டு உரிமைக்குக் கூட சேர்ந்து போராடாத எம் தமிழ்நாட்டு இளைஞன் பெருமளவில் உணர்வோடு திரண்டது ஈழத் தமிழர் படுகொலைகளைக் கண்டித்துத் தான்! அப்படி ஒன்று சேர்ந்தவர்களும் உள்ளூர் அரசியல் நுழைந்தால் பிரிந்துவிடுவார்கள் என்ற கவலைதான் எங்களுக்கு!

ஈழப்பிரச்சினையைப் பயன்படுத்தி பலன் அனுபவிக்கத் துடிக்கும் கும்பலும் இங்கு இல்லாமல் இல்லை. கடந்த தேர்தலில் தமிழர்கள் அங்கு செத்துக் கொண்டிருந்த நேரத்திலும், எங்களுக்கு ஆதரவாய் ஓர் அறிக்கை விட்டால் ஒரே பிடுங்காகப் பிடுங்கிவிடுவோம் என்று வாக்கு சேகரிக்க உங்களைக் கொண்டு வந்து நிறுத்த முயற்சித்தது யார் என்று யோசியுங்கள். கடந்த பாராளுமன்றத் தேர்தலிலேயே ஈழப்பிரச்சினையை வைத்து அரசியல் லாபம் பார்க்கத் துடித்தவர்கள் தோல்வியுற்றார்கள்.

ஏற்கெனவே, சமூகப் பார்வை கொண்டவர்கள், அரசியலில், பொதுவாழ்வில் இருப்பவர்களில், பார்ப்பனர்கள், காங்கிரஸ்காரன், தேசிய அரசியல் பேசுபவன், பெரும்பான்மை பொதுவுடைமைத் தோழன், அ.தி.மு.க போன்றோர் ஈழப்பிரச்சினை பேசுவதில்லை. இன்னும் சொல்லப்போனால் இவர்கள் எப்போதுமே எதிர் நிலைப்பாடு கொண்டவர்கள்.

மிச்சமிருக்கும் சமுதாய இயக்கங்களான திராவிடர் கழகம் உள்ளிட்டவை, அரசியல் இயக்கங்களான தி.மு.க., ம.தி.மு.க., பா.ம.க, வி.சி, இவற்றோடு, என்றைக்கும் தங்களுக்குள் ஒன்று சேர விரும்பாத கணக்கிலடங்கா தனிநபர் தமிழ்தேசியக் கட்சிகள் இவைதான் ஈழத் தமிழர் ஆதரவு நிலைப்பாட்டில் இருப்பவை. இதிலும் தி.மு.க - நேரடியாக புலிகளை ஆதரிக்காத இயக்கம்; ஆனால் ஈழத் தமிழர்களுக்கு ஆதரவாகக் (இருக்கிறார்கள் என்று நான் கருதுகிறேன்; இன்று பெயரளவில்தான் என்று நீங்கள் சொல்லலாம்) குரல் கொடுக்கும் இயக்கம்.

’நாங்கள் போராடிய அளவுக்காவது 2008-க்கு முன் புலம்பெயர் தமிழர்கள் களம் கண்டிருக்கிறார்களா’ என்ற கேள்வியும் கூட, புலம்பெயர் தேசத்தில் அதற்கான வாய்ப்பில்லை என்பதை நாங்கள் உணர்ந்த காரணத்தால் எம்மிடமிருந்து எழவில்லை.

ஆனால், இவர்களையும் இழக்கும் விதத்தில் அண்மைக் காலமாக பலரது பேச்சு இருந்துகொண்டிருக்கிறது. இப்படி எரிச்சலைக் கிளப்பும் வகையில் பேசச் செய்து, தமிழகத்தில் ஈழத் தமிழர்க்கான மக்கள் இயக்கங்களின் குரலை ஒழித்துவிடலாம் என்பதும் பார்ப்பனியத்தின் சூழ்ச்சியாக இருக்கலாம். இதில் அருள்கூர்ந்து ஈழத் தமிழர்கள் சிக்க வேண்டாம் எனக் கேட்டுக் கொள்கிறோம்.

இப்போதைக்கு இது போதும், தேவைப்பட்டால் பிறகு விரிவாகப் பேசுவோம்.

ஏதோ சிலரின் அறிவற்ற பேச்சுக்காக, தமிழீழத்திற்கான ஆதரவுக் குரலையும், உணர்வையும் எங்களிடமிருந்து பிரித்துவிட முடியாது. ஏனெனில் உங்களுக்காகப் போராடுகிறோமே தவிர, உங்களைக் கேட்டுக் கொண்டு நாங்கள் போராடவரவில்லை.

நீங்கள் திட்டினாலோ, எங்களைத் துரோகி என்றாலோ நாங்கள் போராடாமல் இருக்கப் போவதுமில்லை. ஏனெனில், உங்களிடம் இருந்து எந்த பலனையும் எதிர்பார்க்காதவர்கள் நாங்கள். அதனால் தான் கேட்கிறோம், குறைந்தபட்சம் உங்கள் நலனை முன்னிட்டாவது, எமக்குள் இருக்கும் அரசியல் பிரிவினைகளுக்குள் நுழையாதீர்கள். பிறகு அதில் நசுங்கி ஒடுங்கப் போவது ஈழ ஆதரவு உணர்வுதான்!

ஈழப் பற்றாளர்களே! இவருக்கா உங்கள் ஆதரவு?

2011-04-10T17:13:00.000+05:30

மாவீரன் பிரபாகரன்பற்றி சட்டமன்றத்திலேயே ஜெ கூறியது என்ன?

16.4.2002 அன்று தமிழ்நாடு சட்டப் பேரவையில் முதல் அமைச்சர் ஜெயலலிதா முன்மொழிந்த தீர்மானம் வருமாறு:

நான் தமிழகத்தின் முதலமைச்சராக இருந்த போதெல்லாம் இந்திய அரசாங்கத்தை ஸ்ரீலங்கா அரசுடன் தொடர்பு கொண்டு பயங்கரவாத அமைப்பான LTTE.-யின் தலைவரான பிரபாகரனை ஸ்ரீலங்கா நாட்டிலிருந்து இங்கு கொண்டு வந்து சேர்த்து, ராஜீவ்காந்தி கொலை வழக்கில் நீதிமன்றத்தின்முன் நிறுத்தவேண்டுமென திரும்பத் திரும்பக் கேட்டுக் கொண்டிருந்தேன். 20.9.1991 ஆம் தேதியிட்ட எனது கடிதத்தில், அப்போது மாண்புமிகு பாரதப் பிரதமராக இருந்த திரு. பி.வி. நரசிம்மராவ் அவர்களை, தேவைப்படும் பட்சத்தில் ஸ்ரீலங்கா அரசினுடைய அனுமதி பெற்று நம்முடைய இராணுவத்தை அனுப்பியேனும், பிரபாகரனைப் பிடித்து இந்தியாவிற்குக் கொண்டுவரவேண்டுமென்று கேட்டுக்கொண்டேன். முன்னாள் பிரதமர், அமரர் திரு. ராஜீவ்காந்தியின் படுகொலையைப் புரிந்தமைக்காக விடுதலைப்புலிகள் இயக்கத் தலைவர் பிரபாகரனை இந்திய நீதிமன்றத்தின் முன் நிறுத்த வேண்டுமெனக் கோரியிருந் தேன். அதன் பின்னர் பலமுறை இதே கோரிக்கையை வலியுறுத்தினேன். அப்போது பாரதப் பிரதமராக இருந்த திரு. பி.வி. நரசிம்மராவ் அவர்களின் அரசு, இது குறித்து நடவடிக்கை எடுத்து, 1995-இல் - Interpol-International Criminal Police Commission அமைப்பின் வாயிலாக பிரபாகரனைக் கைது செய்ய Red Corner Notice வழங்கப்பட்டது. ஆனால், அதன் பின்னர் எதுவும் நடக்கவில்லை.

அண்மையில் நிறைவேற்றப்பட்ட 2002 ஆம் ஆண்டு பயங்கரவாத தடுப்புச் சட்டம், Prevention of Terrorism Act, 2002-இன்கீழ் இந்திய அரசாங்கம் விடுதலைப்புலிகள் இயக்கத்தைப் பயங்கரவாத அமைப்புகளின் பட்டியலில் சேர்த்து இந்திய மக்களை நிம்மதியடையச் செய்தது. அந்தப் பயங்கரவாத அமைப்பினால், அண்மைக் காலங்களில் விடுதலைப்புலிகள் சம்பந்தப்பட்ட சில பிரச்சினைகளில் மத்திய அரசாங்கம் மௌனம் காத்து வருவது எங்களுக்குக் கவலை அளிக்கிறது.

படுகொலை செய்யப்பட்ட முன்னாள் பாரதப் பிரதமர் அமரர் திரு. ராஜீவ்காந்தி அவர்களின் கொலை வழக்கில் முக்கியக் குற்றவாளியாகக் கருதப்படும் இலங்கை விடுதலைப் புலிகளின் தலைவர் வேலுப்பிள்ளை பிரபாகரனை உடனடியாக இலங்கை அரசு கைது செய்து இந்திய அரசிடம் ஒப்படைப்பதற்கு மத்திய அரசு உடனடி நடவடிக்கையை மேற்கொள்ளவேண்டும் என்று இச்சட்டப் பேரவை வற்புறுத்துகிறது. மேலும், தடை செய்யப்பட்ட விடுதலைப்புலிகளின் இயக்கத்தைச் சார்ந்த எந்த ஒருவரையும் இந்தியத் திருநாட்டிற்குள் நுழைய அனுமதிக்கக் கூடாது என்றும் மத்திய அரசை இப்பேரவை வற்புறுத்துகிறது. இவ்வாறு சட்டப் பேரவையிலேயே தீர்மானத்தை நிறைவேற்றியவர்தான் ஜெயலலிதா.

----------------------------------

"தமிழகத்தில் அமைதி நிலவவும், இந்தியாவின் இறையாண்மை காக்கப்படவும், பயங்கரவாத இயக்கமான தமிழ் ஈழ விடுதலைப்புலிகள் இயக்கம் தடை செய்யப்பட வேண்டும் என்று 1991-ஆம் ஆண்டு நான் தமிழக முதலமைச்சராக பொறுப்பெற்ற பிறகு, மத்திய அரசை வலியுறுத்தினேன். என்னுடைய பெரு முயற்சியின் காரணமாகத்தான் தமிழ் ஈழ விடுதலைப்புலிகள் இயக்கம் 14.5.1992 அன்று மத்திய அரசால் தடை செய்யப்பட்டது. அந்த இயக்கத்தின் மீதான தடை இன்று வரை தொடருகிறது. ராஜீவ்காந்தி கொலை வழக்கில் நிர்ணயிக்கப்பட்ட நீதிமன்றத்தால் பிரகடனப்படுத்தப்பட்ட குற்றவாளியாக வி. பிரபாகரன் அறிவிக்கப்பட்டுள்ளார்"

(நமது எம்.ஜி.ஆர். 23.10.2008 பக்கம் 1).

(மதிமுக பொதுக்குழுவில் (9.4.2009) விடுதலைப்புலிகள் இயக்கத்தின் மீதான தடையை நீக்க வேண்டும் என்று தீர்மானம் நிறை வேற்றியுள்ளார்களே - இதற்கு என்ன பதில் சொல்வார்கள்? விடுதலைப்புலிகள் இயக்கம் என்னால்தான் தடை செய்யப்பட்டது என்று கித்தாப்புப் பேசும் அம்மையாரிடம் அல்லவா கூட்டு சேர்ந்துள்ளனர்?)

-------------------------------------

தற்போது பொடா சட்டம் ரத்து செய்யப்பட்டு விட்டது என்ற அசட்டுத் தைரியத்தில் சிலர் பகிரங்கமாகவே தேச விரோத கருத்துகளை பேச ஆரம்பித்து விட்டனர். POTA இல்லாவிட்டாலும், சட்ட விரோதமான நடவடிக்கைகளை தற்போதுள்ள சட்ட விரோதமான நடவடிக்கைகள் தடுப்புச் சட்டத்தின்கீழ் இந்திய இறையாண்மைக்கு எதிராக பேசுபவர்கள்மீது நடவடிக்கை எடுக்கலாம். ஆனால் நடவடிக்கை எடுக்க மைனாரிட்டி திமுக அரசின் முதலமைச்சருக்கு மனமில்லை. எப்போதெல்லாம் கருணாநிதி ஆட்சிக்கு வருகிறாரோ அப்போதெல்லாம் விடுதலைப்புலிகள் ஆதரவான பேச்சுகள் தமிழ்நாட்டில் பகிரங்கமாகவே நடைபெறுகின்றன.

- ஜெயலலிதா அறிக்கை (நமது எம்.ஜி.ஆர். ஏடு 23.10.2008)

இதன் மூலம் என்ன தெரிகிறது? ஜெயலலிதா ஆட்சியில் இருந்தால் விடுதலைப்புலிகளைப் பற்றிப் பேச முடியாது. கலைஞர் ஆட்சியில் இருந்தால் பேச முடிகிறது. இதற்குப் பிறகும் ஜெயலலிதாவுக்கு ஜெ போடுவோரை என்னவென்று கூறுவது?
கலைஞர் ஆட்சியில் இருக்கும்போதுதான் பொதுக் கூட்டம் போட முடிகிறது, பேரணி நடத்த முடிகிறது, போராட்டங்களை நடத்த முடிகிறது என்பதை நன்கு தெரிந்திருந்தும் ஜெயலலிதாவைப் போற்றுவதும், கலைஞரைத் தூற்றுவதும் அறிவார்ந்த செயல் தானா? உண்மையிலே ஈழத் தமிழர்கள்மீது அக்கறை யிருந்தால் விரோதியை நண்பராகவும் நண்பரை விரோதியாகவும் கருதுவார்களா?

--------------------------------------

விடுதலைப்புலிகளுக்கு ஆதரவாக கருணாநிதி !

அனைத்துக் கட்சிக் கூட்டத்தில் நிறைவேற்றப்பட்ட (14.10.2008) தீர்மானத்தைப் பார்த்தால், விடுதலைப்புலிகளுக்கு ஆதரவாக கருணாநிதி செயல்படுகிறாரோ என்ற சந்தேகம்தான் தமிழக மக்கள் மனதில் எழுந்துள்ளது. இலங்கையில் தற்போது நடைபெறும் உள்நாட்டுப் போரை நிறுத்துவதற்கான அதிகாரம் இந்திய அரசிடம் இல்லை என்பதை அய்ந்து முறை முதலமைச்சரான கருணாநிதி புரிந்து கொள்ளாதது விந்தையாக உள்ளது.
இலங்கை உள்நாட்டு விஷயத்தில் இந்திய அரசு தலையிட்டால், பின்னர் நம் நாட்டு உள் விவகாரத்தில் அண்டை நாடுகள் தலையிடுவதற்கான வாய்ப்பு ஏற்பட்டு, அது இந்திய இறையாண்மைக்கு ஊறு விளைவிப்பதாக அமையும். அடுத்த நாட்டின் உள்விவகாரத்தில் தலையிடுவதை உலக நாடுகள் ஏற்றுக் கொள்ளாது.

- ஜெயலலிதா (நமது எம்.ஜி.ஆர். 16.10.2008)

------------------------------------

போரை நிறுத்த வேண்டும் என்பதன்மூலம் கருணாநிதி விடுதலைப் புலிகள் அமைப்பை காப்பாற்றுவதற்கான முயற்சியில் தற்போது ஈடுபட்டிருக்கிறார். இது ஏற்றுக் கொள்ளக்கூடிய ஒன்றல்ல.

(நமது எம்.ஜி.ஆர். 16.10.2008)

ஈழப் போரை நிறுத்த இந்தியா தலையிட வேண்டும் என்று ஜெயலலிதாவுடன் கூட்டணி சேர்ந்துள்ள கட்சிகளும் கூறுகின்றன. ஜெயலலிதாவோ என்ன சொல் லுகிறார்? அப்படி தலையிட்டால், இந்திய இறையாண்மைக்கு ஊறு விளைவிக்கும் என்கிறார். இந்த ஜெயலலிதாவுடன் தான் இவர்கள் கூட்டாம் -குழம்பாம் - பொரியலாம் - ரசமாம் - துவையலாம் - குருமாவாம்! தமிழர்களே, புரிந்து கொள்வீர்!

தேமுதிக-வினரே! பாவம்! விட்டுவிடுங்கள் விஜயகாந்தை...!

2011-04-06T14:46:00.000+05:30

திரையுலகில் நாயகனாக வாழ்க்கையைத் தொடங்கி, அரசியலில் காமெடியனாக பரிணமித்து, இன்று பரிதாபத்திற்குரியவராகக் காட்சியளிக்கிறார் விஜயகாந்த். கொள்கைத் தெளிவோ, அரசியல் புரிதலோ இல்லாமல் கேப்பில் கட்சி தொடங்கிய கேப்10, திரைப்படங்களில் இயக்குநர்கள் சொல்படி நடித்ததைப் போல, மனைவி, மச்சானின் இயக்கத்தில் அரசியலில் நடித்துக் கொண்டிருக்கிறார்.

எதிர்பார்ப்பு இல்லாத காலத்தில், கேப்டன் பிரபாகரன் என்று படத்துக்கும், தன் பிள்ளைக்கும் பெயர் வைத்த விஜயகாந்த், அரசியல் கட்சி ஆரம்பித்த பின் ஈழத்தமிழர் பிரச்சினை உச்சத்தில் இருந்தபோது காங்கிரசைக் கண்டிக்கவோ, குறைந்தபட்சம் ’ஆங்’ என்று அவர் ஸ்டைலில் கண்ணடிக்கவோ கூட செய்யவில்லை. காரணம் நாடாளுமன்றத் தேர்தலில் காங்கிரசின் தயவை எதிர்பார்த்து நின்றது. இதனால் அப்போதே தமிழர்கள் இவரின் வீராதிவீரத்தைப் புரிந்துகொண்டார்கள்.

சென்னை, சேலம் என மாநாடு என்ற பெயரில் இவர் அடித்த கூத்து பத்தாது என ஊர் ஊராய் சென்று தன் ’புகழைப்’ பரப்பி வருகிறார். மக்களுடனும் (இதய)தெய்வத்துடனும் தான் கூட்டணி என்று இப்போது களம் இறங்கியிருக்கும் பிரச்சாரத்தில், விஜயகாந்தின் காமெடி காட்சிகள் அவருடைய முந்தைய படங்களைக் காட்டிலும் அதிகம் விரும்பப்படுகின்றன.

வைகோ இல்லாத இடத்தை நிரப்புவார் என்று எதிர்பார்த்து களமிறக்கிய அதிமுக அணி, காற்றிறங்கிய பலூன் போல இவர் ஆகிவிட்டதைக் கண்டு தலையிலடித்துக் கொண்டிருக்கிறது.

”தொப்புளில் விடாமல் பம்பரத்தை வேறு எங்கே விடுவது?” என்று ஆபாசமாகப் பேசுகிறார் தாம்பரத்தில்...

வேட்பாளர் பெயரை மாற்றிச் சொல்லி, பின்னர் அதைத் திருத்தியவரை கும்மாங்குத்து குத்தி தனது ஆக்‌ஷன் ஹீரோ இமேஜைத் தக்க வைக்கிறார் தர்மபுரியில்...

எம்.ஜி.ஆர். கட்சியுடன் தான் கூட்டணி, அண்ணா ஆவி கனவில் வந்து சொன்னதால் தான் கூட்டணி என்று ஜெகன்மோகினி வேலையெல்லாம் காட்டுகிறார் அம்பத்தூரில்...

கூட்டணிக் கட்சியினரின் கொடியை இறக்கச் சொல்லிக் கத்தி, விரட்டப்படுகிறார் அரியலூரில்...

”நான் வெயில்ல பிரச்சாரம் செய்கிறேன்.. மற்றவங்க அப்படியா?” என்று ஏசியில் அமர்ந்து பிரச்சாரம் செய்யும் தனது கூட்டணித் தலைவர் ஜெயலலிதாவையே (அதை ஒப்புக் கொள்வாரா என்று தெரியவில்லை) குறிவைக்கிறார். “ ஹே மாட... இந்தா நீ கருப்... ம்ம்ம்... அந்தக் கட்சிக்கெல்லாம் ஆப்பு அடிக்கணும்னா ஆஃப் அடிக்கணும்” என்று குளறுகிறார் திண்டுக்கல் தர்மத்துப் பட்டியில்...

கூட்டணியில் யார் இருக்கிறார் என்று கூடப் புரியாத அளவிற்கு மப்பு தலைக்கேறி, ’அண்ணா தி.மு.க-வின் கொள்கை பரப்புச் செயலாளர் ஜெயிலில் இருக்கிறார்’ என்று கிண்டல் செய்கிறார் நெல்லை-ராதாபுரத்தில்...

இப்படி தொடர்ச்சியான உளறல்களைப் பார்த்து ஊரே நகைக்கிறது. ஆதித்யா, சிரிப்பொலி சேனல்களைவிட கேப்டன் டி.வி-யில் விஜயகாந்தின் காமெடியைப் பார்க்க நிறைய பேர் விரும்புகின்றனர். தன் பேச்சைக் கேட்கக் கூடியிருக்கும் மக்களை மடையர்களாக நினைத்து, என்ன பேசுகிறோம் என்பது கூடத் தெரியாமல் பேத்திக் கொண்டிருக்கிறாரே என்று கோபம் ஒரு பக்கம்.

இவர் அடிக்கும் கூத்துகள் அதிமுக அணியின் மீதும் இவரது நாக்கமூக்க கட்சியின் மீதும் மக்களுக்கு போதுமான வெறுப்புணர்ச்சியை ஊட்டிவிட்டது. அது தி.மு.க அணிக்கும் பயனாகிறது. எனவே இன்னும் பல இடங்களில் விஜயகாந்த் பிரச்சாரம் செய்ய வேண்டும் என்று கூட நான் விரும்பினேன்.

ஆனால் நெல்லை ராதாபுரத்தில் “அண்ணா தி.மு.கவின் கொள்கைப் பரப்புச் செயலாளர் ராஜா ஜெயிலில் இருக்கிறார். அண்ணா தி.மு.கவின் கொள்கை ஜெயில்” என்று உளறிக் கொண்டிருந்தபோது, வேனுக்குள் இருந்த யாரோ ஒரு நபர் வேட்டியைப் பிடித்து இழுத்து, தவறைச் சுட்டிக் காட்டியதும், “நான் ஏதோ தப்புத் தப்பா சொல்லிக்கிட்டிருக்கேன்னு நினைக்கிறேன். இந்த சத்தம்...” என்று நாக்கைத் துருத்திக் கொண்டு கையை ஓங்குகிற காட்சியைப் பார்த்ததும் உண்மையிலேயே விஜயகாந்தின் மீது பரிதாப உணர்ச்சி கலந்த பெரும் சங்கடம் தான் என் மனதில் எழுந்தது. (சிறு வயதில் அவரது திரைப்படங்களும், அதில் வெளிப்பட்ட தமிழ் உணர்வும் என்னைக் கவர்ந்தவை என்ற காரணத்தால் அது இன்னும் அதிகமாகியது.)

தன்னிலை மறந்து திரியும் ஒருவரை மேடையேற்றி, அவரது சுயமரியாதைக்கு இழுக்கு ஏற்படுத்துவதைப் பற்றிக் கூடக் கவலைப்படாமல் அதன் மூலம் பலன் அனுபவிக்க நினைக்கும் இந்த அவலத்தை என்னவென்பது? சாலையில் ஆதரவற்றுத் திரியும் கால்நடைகளுக்குக் கூட வதைத் தடுப்புச் சட்டமெல்லாம் இருக்கிற போது, இதற்காக தேர்தல் ஆணையம் எதுவும் செய்யாதா?

பிரச்சாரத்திற்கென வேறு ஆட்கள் இல்லாமல், விஜயகாந்தின் முகத்தைக் காட்டி ஓட்டு வாங்க வேண்டிய நிலையில் இருக்கும் தே.மு.தி.கவினர் தங்கள் தலைவரின் மானம் பறிபோவதைப் பற்றிக் கவலைப்படாமல் எப்படியாவது அவரைப் பயன்படுத்தத் துடிக்கின்றனரே! மனைவி, மச்சான் என எல்லோரும் அவரைச் சுற்றி பலன் அனுபவிக்கத் துடிக்கும் நிலையில் இருக்கின்றனரே தவிர, அவரது மானத்தைக் காக்கும் முயற்சியோ, அவரைக் கட்டுப்படுத்தும் முயற்சியோ எடுக்கப்படாதது மனிதாபிமானமற்ற ஒன்றாகும்.

வயதைப் பொருட்படுத்தாமல் கலைஞர் உழைக்கிறார் என்றதும் பேனாவைத் தூக்கிப் பரிதாபப்பட்ட ஞாநி போன்றோர் இதைப் பற்றி எல்லாம் எழுதமாட்டார்கள் போலும். வயது காரணமாக தடுமாறுவோருக்கும், போதை காரணமாக தடுமாறுவோருக்கும் நமது பரிவில் வேறுபாடு உண்டுதானே!

தண்ணியடித்துவிட்டு, விஜயகாந்த் அடிக்கிற கூத்தை மக்களுக்குப் போட்டுக் காட்டுவது இவர்களின் நாயகன், ரட்சகன் (படங்கள் அல்ல) பிம்பத்தை நொறுக்குகிற செயல் தான்! அதை இந்த தேர்தல் நேரத்தில் யாராலும் கட்டுப்படுத்த முடியாது. எறிவதைப் பிடுங்கினால் கொதிப்பது அடங்கும்.

எனது இந்தக் கருத்தில் எந்தவித அரசியலோ, உள்நோக்கமோ இல்லை. மக்கள் முன் சுயமரியாதையை இழந்து கொண்டிருக்கும் சக மனிதனைப் பற்றிய கவலையே இதை எழுதச் செய்தது.

தேமுதிக-வினரே! பாவம்!விட்டுவிடுங்கள் விஜயகாந்தை...!

அவலை நினைத்து உரலை இடிக்காதீர்! ஆத்திரப்பட்டு அறிவை இழக்காதீர்!

2011-04-06T08:58:00.000+05:30

கோபம் அறிவை மறைக்கும் என்ற அரிச்சுவடி தெரியாதா உங்களுக்கு?

’ஈழத்தை அழித்த காங்கிரசை ஒழிக்கிறேன்’ பேர்வழி என்று சொல்லிக் கொண்டு அதனினும் கொடிய விசத்தை, தமிழகத்தை அழிக்கும் பார்ப்பனிய பார்த்தீனியத்தைக் கொண்டு வந்து அமர்த்தத் துடிக்கிறீர்களே! கொஞ்சம் உளச் சுத்தியோடும், அறிவு நாணயத்தோடு சொல்லுங்கள்! ஈழத்தை காங்கிரசு மட்டும் அழித்ததா? அல்லது இவர்களைப் பயன்படுத்தி பார்ப்பனியம் அழித்ததா? தனித் தமிழீழம் அமையக் கூடாது என்று துடிப்பவர்கள் யார்? ஒட்டுமொத்த பார்ப்பனர்களின் உணர்வு என்ன இவ்விசயத்தில்! தமிழர்களுக்கென்று நாடு அமைவதை விரும்பாதவர்கள் பார்ப்பன நலம் காக்கத் துடிப்போர் அல்லவா?

63 சீட்டுக்காகக் கூட்டணியை விட்டு வெளியில் வரத் தயாரான கலைஞர், ஈழத் தமிழர் அழிவின் போது காங்கிரசு கூட்டணியை விட்டு வந்திருந்தால் எப்படி இருந்திருக்கும் என்று கேட்கிறார் அண்ணன் சீமான்!

எப்படி இருந்திருக்கும்?

வெளியில் வந்து பினாத்த முடியாமல் உள்ளே முடங்கியிருப்பார் சீமான்!

67-இல் தமிழ்நாட்டில் முறியடிக்கப்பட்ட காங்கிரஸ் கொல்லைப்புற வழியாக ஆட்சியைப் பிடித்திருக்கும். அ.தி.மு.க.வின் ஆதரவோடு ஆட்சியில் காங்கிரஸ் அமர்ந்திருந்தால் அழக்கூட உரிமையில்லாமல் அடக்கப்பட்டிருப்போம்! வெளியில் உலாத்தி, மூச்சைப் பிடித்து கையை உயர்த்தி கலைஞரைத் திட்ட முடியாது.

இன்று நீங்கள் மலர வைக்கத் துடிக்கும் இலைக்கார அம்மா வந்தால் முதல் இடுப்பொடிப்பு உங்களுக்குத் தான் என்பதை மறந்துவிடாதீர்கள். வெற்று முழக்கங்களும், அரசியல் தெளிவற்ற தன்மையும், உணர்ச்சிக் கொந்தளிப்புகளும் தமிழின உணர்வை இல்லாது அழித்தொழித்துவிடும்..

ஆரியத்தின் பகடைக் காய்களே! முதலில் வெட்டுப் படப்போவது நீங்கள் தான் என்பது புரிகிறதா?

உடனிருந்து உற்றுளி உதவியோருக்கே உட்கார இடம் கிடைக்கவில்லை.

சொன்ன சொல்லுக்கும், விட்ட காற்றுக்கும் எனக்கும் சம்பந்தமில்லை என்ற உணர்வோடு திரியும் அம்மையாரின் கொடுக்கு பிடித்து அலைகின்றீர்களே! உங்கள் பணிக்கும், தீட்டிய மரத்தில் கூர் பார்க்கத் துடிக்கும் கோடரிக் காம்பின் நுனிக்கும் என்ன வேறுபாடு?

இந்தத் தேர்தலில் ஜெயலலிதா தோற்றால், மீண்டும் அவரது அரசியல் வாழ்க்கை எழுச்சி பெறுதல் என்பது இயலாத காரியம். அப்படி ஜெயலலிதா தமிழக அரசியலை விட்டு வெளியேறினால், மீண்டும் ஒரு பார்ப்பனத் தலைமையைக் கொண்டு வந்து அதிகாரப் பீடத்தில் அமர்த்துவது கடினம் என்ற உண்மையை உணர்ந்த காரணத்தால் எப்படியாவது ஜெயலலிதாவைக் கரை சேர்த்து பார்ப்பன ஆதிக்கத்தை நிலை நிறுத்தத் தன்னாலான அனைத்து உபாயங்களையும் செய்து பார்க்கிறது ஆரியம்.

அத்தனை பார்ப்பன ஊடகங்களும் கோவணத்தையும் அவிழ்த்துவிட்டு அம்மண ஆட்டம் போடுகின்றன. ஆனந்த விகடனும் தன்னுடைய நடுநிலை வேடத்தையெல்லாம் உரித்து எறிந்துவிட்டு, பார்ப்பனக் கோர முகம் காட்டி நிற்கிறது.

தி.மு.க, பா.ம.க, விடுதலைச் சிறுத்தைகள் என்று உணர்வாளர்களெல்லாம் ஓரணி! எதிரணியில் சொல்லிக் கொள்வதற்கென இருந்த ஒரே இயக்கமான ம.தி.மு.கவும் கழுத்தைப் பிடித்து வெளியில் தள்ளப்பட்டுவிட்டது. போராடிக் கட்சியை நடத்தக் காரணம் கிடைக்காத பொதுவுடைமை இயக்கங்கள் ஈழத் தமிழர் பிரச்சினையாவது மோட்சம் கிடைக்குமாவெனப் பார்த்து நிற்கின்றனவே தவிர வேறில்லை..

என்றைக்கும் தமிழின உணர்வுக்கு எதிர் நிலை எடுக்கும் அத்தனை பார்ப்பனர்களும் ஓரணியில் - கலைஞரை வீழ்த்தத் துடிக்கின்றனர். கலைஞர் வெளிப்படையாக பார்ப்பன எதிர்ப்பை பேசத் தொடங்கிய பின், சு.சாமி தன்னை எதிர்க்கும் ஓட்டுகளும் ஜெயலலிதாவிற்குக் கிடைக்க வேண்டுமென நினைக்கிறார்.

அத்தனைப் பார்ப்பானுக்கும் உச்சத்தில், அதிகாரப் பீடத்தில் அமர்ந்திருந்த சங்கராச்சாரியைக் கைது செய்து சிறையில் அடைத்தவரே ஆயினும், தங்கள் பார்ப்பனத் தலைமையை பலி கொடுக்க விரும்பாமல், பார்ப்பன சங்கம் உள்ளிட்ட அனைத்தும் அணிவகுக்கின்றன ஜெயாவின் பின்னால்..!

தமிழர்களே உங்கள் நிலை என்ன? பார்ப்பனர்கள் மூட்டிவிடும் ஊடக நெருப்புக்குள் குளிர் காயப் போகிறீர்களா? அது உங்களை எரித்துவிடும். எச்சரிக்கிறோம்.

மக்கள் நல அரசு என்கிற மாபெரும் வெற்றிச் சரிதத்தை இதுவரை தமிழகத்தில் இல்லை என்னும் அளவுக்கு, கல்வி, வேலைவாய்ப்பு, வறுமை ஒழிப்பு, இடஒதுக்கீடு, சமூகநீதி,

காங்கிரஸ் என்ற ஒற்றைக்காரணத்தைச் சொல்லி தி.மு.க அணியை நிராகரிப்பது மாபெரும் வரலாற்றுத்தவறுக்கு வழிவகுக்கும்.

காங்கிரசின் அழிவை நீங்கள் தரத்தேவையில்லை. அது தன்னைத் தானே அழித்துக் கொள்ளும். அதற்கென்று அவர்கள் கட்சியின் பொதுச் செயலாளர் ராகுல் காந்தி இருக்கிறார். காங்கிரசு பற்றியா அமைகிறது உங்கள் பேச்சு... இரண்டு மாதங்களுக்கு முன்பு வரை வைகோ பேசியதைப் போல, காங்கிரசை விட, அதிகமாக தி.மு.க.வைத் தாக்குகிற உங்களை’ மவுத் பீஸ்’ஆக மட்டுமே பார்க்கிறது ஆரியம். காங்கிரசோ, பி.ஜெ.பியோ மத்தியில் இருக்கும் யாரையும் ஆள்வதும், வழிநடத்துவதும் பார்ப்பனியம் என்கிற கொடும் கூட்டணி என்பதை மறந்துவிட்டு, மேம்போகக் காங்கிரசை அழித்தால் தீர்வு கிடைக்கும் என்று திமிறாதீர்!

காங்கிரஸ் எதிர்ப்பு என்பதைவிட தி.மு.க எதிர்ப்பு என்பதில் முன்னணியில் நிற்கும் உங்களைக் கொம்பு சீவிவிட்டு நம் இனத்தையே நோக்கித் திருப்புகின்றது ஆரியம். புகழ் வெறி கொண்டு அலையும் சிலரின் பிழைப்பு வாதத்திற்குப் பலியாகாதீர்! எந்தக் காலத்திலும் தமிழகத்தில் காங்கிரசு ஆட்சி அமைக்க முடியாது. தமிழ்நாட்டில் காங்கிரசு செத்த பாம்பு... அதை அடித்து வெற்றி பெற்றவராக உங்களைக் காட்டிக்கொள்வதைவிட, சீறிக்கொண்டிருக்கும் பார்ப்பன நச்சரவைப் பிடியுங்கள்.

2006 தேர்தலில் சில இடங்களுக்காக அணிமாறி, தி.மு.க-வின் வெற்றி வாய்ப்பையும் குறைத்து, தன் இடத்தையும் இழந்து நின்று, பின்னாளில் காங்கிரசின் ஆதரவை அவசியம் பெற்றாக வேண்டிய சூழலில் தி.மு.க.வைத் தள்ளி அதைத் தொடர்ந்து ஈழத்தமிழர் பிரச்சினையிலும் தமிழர்களை ஓரணியில் நிற்கவிடாமல், குறுக்குச் சால் ஓட்டி, வரலாற்றுப் பழிக்கு இலக்காகிவிட்ட ம.தி.மு.க-வைப் போன்ற அழிவு முடிவைத் தேடாதீர்கள்!

நலத்திட்டங்களுடன் சமூக நீதிக்கு உழைக்கும் அரசை ஒழித்துவிட்டு, அப்படியே தலைகீழ்த் தனமாக, தானடித்த மூப்பாகக் காட்டாட்சி நடத்தும் ஜெயாவுக்கான உங்கள் ஆதரவு என்பது தமிழன் தலையில், தமிழ் உணர்வுப் பேரைச் சொல்லி, நெருப்பள்ளிக் கொட்டுதற்குச் சமமாகும்.

சிந்திப்பீர்! வெற்று உணர்ச்சியும், பழிவாங்கும் வெறியும் தேக்கி, மீண்டும் ஒரு அவலத்தை விலைக்கு வாங்காதீர்கள்! நட்பு முரணுக்கும், பகை முரணுக்குமான வேறுபாட்டை உணராமல் முடிவெடுக்காதீர்! நாம் ஒன்றிணைந்து எதிரியை வீழ்த்துவது முறையா? எதிரியைக் கோட்டைக்குள் அனுமதித்து, நம்மவரைச் சாய்த்தல் முறையா?

“எங்கள் பகைவர் எங்கோ மறைந்தார் இங்குள்ள தமிழர்கள் ஒன்றாதல் கண்டே!” என்று பகைவரை விரட்டத் திரளுங்கள்! ஓரணியில் நின்று ஒன்றாய் வென்றால் எந்த எதிரியும் நம்மை வெல்ல முடியாது. இதுநாள்வரை இழைத்த தவறை இனியும் தொடராதீர்!

திமுக, பாமக, விடுதலைச் சிறுத்தைகள், முஸ்லிம் லீக் இணைந்திருக்கும் அணிக்கு வாக்குத் தாருங்கள்! உலைக்குப் பயந்து நரகலில் விழுந்த கதையாக, செத்தபாம்பு காங்கிரசை அடிக்கிறேன் என்று அதிமுக பார்ப்பனத் தலைமைக்கு பல்லவி பாடாதீர்! அல்லல் படாதீர்!

’தமுக்கு’ வீரமணி: ஆசிரியரின் அறிக்கையும், அலர்ஜிக்காரர்களின் அரிப்பும்!

2011-03-01T22:39:00.000+05:30

தமுக்கு வீரமணி என்று பட்டம் தருகிறார்களாம்! அதற்கு ஆதரவு தந்து கை தூக்குகின்றனராம் அலர்ஜிக்காரர்கள்! http://www.facebook.com/photo.php?fbid=166589886723898&set=a.132067643509456.20892.100001186622923&comments

தமுக்கு எங்கள் ஒடுக்கப்பட்டோரின் இசைக்கருவி தான்! அதைச் சுமப்பதிலும் அடிப்பதிலும், அதன் மூலம் அடைமொழிபெயர் பெறுவதிலும் கூட எங்களுக்கு ஒன்றும் மனஒதுக்கீடு இல்லை! இன்னும் சொல்லப்போனால் அந்தப் பெயருக்கு ஒரு பொருத்தமும், கூடவே வரலாறும் உண்டு!

”1995 செப்டம்பரில் தந்தை பெரியார் பிறந்த நாள் விழா உத்தரப்பிர தேச அரசு சார்பில் மூன்று நாள்கள் கோலா கலமாகக் கொண்டாடப்பட்டது. இந்தியா முழுவதுமிருந்தும் மக்கள் லட்சக்கணக்கில் வந்து குவிந்தனர். இதனைப் பொறுக்க மாட்டாத ஆர்.எஸ்.எஸ்.காரர்கள் சந்திராசாமி பின்னணியில் பிள்ளையார் பால் குடித்ததாக இந்தியா முழுமையும் பரப்பினர். இது புரட்டு என்பது நிரூபிக்கப்பட்டது பிள்ளையார் கொழுக்கட்டை தின்றால் ரூபாய் ஒரு லட்சம் பரிசு என்று அன்றைய திராவிடர் கழக பொதுச்செயலாளர் கி. வீரமணி அவர்கள் சென்னை அண்ணா சாலையில் தமுக்கு (டாம்டாம்) அடித்துப் பிரச்சாரம் செய்தார்" என்பது வரலாறு.

அதனால் பகுத்தறிவைப் பரப்பவும், இனத்தின் நலனுக்காகவும் தமுக்கடிப்பதில் எங்களுக்கு எந்தத் தயக்கமும் இல்லை! ஜால்ரா அடிக்கிறார்; பூசாரி வேலை செய்கிறார்; ராஜகுருவாக இருக்கிறார்; மேலவைக்குப் போகிறார்; பொம்மை முதலமைச்சராகிறார்... இன்னும் என்னென்ன அரிப்போ அவ்வளவையும் தினமலம் உள்ளிட்ட பார்ப்பனப் பத்திரிகைகள் எழுதி சொறிந்து கொண்டிருந்தன. இப்போது அந்தப் பணியில் தினமலத்தின் புதல்வர்கள் நாங்கள் என்று புறப்பட்டிருப்போர் செய்து கொண்டிருக்கிறார்கள். அது கிடக்கட்டும்.

தி.மு.க. கூட்டணியிலிருந்து காங்கிரஸ் விலகினால் என்ன செய்வது என்ற கவலை யாருக்கு இருக்கிறதோ இல்லையோ, அரைவேக்காடுகளுக்கு நிறையவே இருக்கிறது. காரணம் இவர்களின் நோக்கம் காங்கிரசை வெறுப்பதும் இல்லை; வேரறுப்பதும் இல்லை. திராவிட இயக்கத்தைக் கொச்சைப்படுத்துவதும், அதற்கெதிராக செயல்படுவதும்தானே!

அதை விட முக்கியமாக ”எங்கே காங்கிரஸ் விலகி, அதிமுக கூட்டணிக்கு வந்துவிட்டால் நம்ம பொழப்பு என்னாவது” என்கிற ரீதியில், மூணு சீட்டு பாண்டியன் கட்சிக்கும், Y, U நாம ’மார்க்’சீட்டுகளுக்கும் கலக்கம் உண்டாகியிருப்பது தெரிகிறது. வை.கோவுக்கு அந்தச் சிக்கல் இல்லை. எங்கிருந்தாலும் ஜெயிக்கப்போவதில்லை; மொத்தமே ரெண்டு பேர் தான் என்பதால், கூட இருப்பவர்களுக்கு சீட்டு வாங்கிக் கொடுக்க வேண்டுமே என்ற கவலையும் இல்லை.

ஆசிரியர் விடுத்த அறிக்கை காரணமாக, நிறைய பேருக்கு அரிக்க ஆரம்பித்திருக்கிறது.

அலர்ஜிக்காரர்கள் அரித்துக் கொண்டிருக்கட்டும்! நாங்கள் தமுக்கு அடித்துக் கொண்டிருக்கிறோம்.

பிள்ளையார் பால் குடிப்பதாகக் கிளப்பிவிடப்பட்ட புரளியை எதிர்த்து
தமுக்கடித்துப் பிரச்சாரம் செய்த தமிழர் தலைவர் கி.வீரமணி (செப்டம்பர் 25, 1995)

பெரியாரியல் பரப்புநர் பூபதி மறைந்தாரே!

2011-02-15T02:24:00.001+05:30

தந்தை பெரியாரின் கொள்கைகளை புத்தகங்கள் மூலம் நாளும் பரப்பும் அரும்பணி ஏற்றிருந்த தோழர் செங்கை பூ.பூபதி அவர்கள் மறைவுற்றார் என்ற செய்தி ஆழ்ந்த வருத்தத்தையும், தாங்கொணாத துயரத்தையும் தரக்கூடிய ஒன்றாக இருக்கிறது. 14.02.2011 இரவு 7 மணிக்கு தனது சொந்த ஊரான செங்கல்பட்டில் வயது நாற்பதுக்குள் தான் என்றாலும், காசநோய் தீவிரத்தின் காரணமாக இறப்பு நிகழ்ந்திருக்கிறது. கடந்த சனிக்கிழமையன்று அவரைத் திடலில் சந்தித்தேன். உடல்நிலை குறித்து கேட்டபோது, எப்போதும் போல் இருப்பதாகச் சொன்னார்.. உடலின் சோர்வை உழைப்பில் காட்டாமல்!

எப்போதும் வருத்தும் உடல்நிலையைக் குறித்தும் கவலை கொள்ளாமல் கொண்ட கொள்கைக்காக களப்பணியாற்றும் சுயமரியாதை வீரர். யாருடைய உதவியையும் எவ்விதத்திலும் ஏற்கமாட்டார்; யாருடைய பரிதாபத்தையும் கோர மாட்டார். அவருடைய உடல்நிலை மோசமாகும் சமயத்தில் எல்லாம், தென்சென்னை, வட சென்னை, தாம்பரம் கழகத் தோழர்கள் தான் அவருக்குத் தேவையான ஏற்பாடுகளைச் செய்வார்கள். அவற்றையும் கூட ஒருவித தயக்கத்துடனே ஏற்றுக் கொள்வார்.

சென்னையைச் சுற்றி திராவிடர் கழகத்தின் சார்பில் எங்கு கூட்டம் நடந்தாலும், அது தெருமுனைக் கூட்டமோ, மாநாடோ, நெடுந்தொலைவோ, போக்குவரத்து வசதி இருக்கிறதோ இல்லையோ, புத்தகம் விற்குமோ விற்காதோ எப்படியிருந்தாலும், புத்தகங்களைக் காட்சிக்காகவாவது வைத்துவிட்டு வருவோம் என்று கிளம்பிவிடுவார். கட்டுக் கட்டான புத்தக மூட்டைகளைத் தானே சுமந்துவரும் அவரிடம், அவற்றைக் கொடுங்கள் நாங்கள் எடுத்து வருகிறோம் என்று கேட்டாலும் தர மாட்டார். பனி பெய்யும் மாதங்களிலும், தலையையும் காதையும் மூடிய மப்ளரோடு புத்தகப் பையைத் தூக்கிக் கொண்டு கூட்டங்களுக்குச் சென்று நள்ளிரவுக்கு அப்பாலும் பெரியார் திடலுக்கு திரும்புவார்.

பாசத்திற்குரிய அண்ணன் அறிவுமதி அவர்கள் விருப்பப்பட்டு

எடுக்கச் சொன்ன படம். (இடம்: வி.ஜி.பி.தங்கக் கடற்கரை)

பூபதியுடன் எழுத்தாளர் பாமரன்

திராவிடர் கழகக் கூட்டங்கள் என்று மட்டும் இல்லை; முற்போக்கு சிந்தனையுடைய கூட்டம் எங்கு நடந்தாலும் அங்கே அவர் புத்தக விற்பனை இருக்கும். பெரியார் திடலின் உத்தியோகப்பூர்வ ஊழியர் கிடையாது. ஆனால் திடல் குடும்பத்தில் அவர் ஒருவர். எனக்குத் தெரிந்து கடந்த 7 ஆண்டுகளாக திடலில் தான் அவருடைய வாசம். எங்கே எந்த சூழலில் எந்தப் புத்தகத்தைக் கொண்டு சென்று படிக்க வைக்கலாம் என்பது அவருக்கு நன்கு தெரியும்.

யாரிடமும் ஒரு பைசாவும் கடன் வாங்கும் பழக்கம் அவருக்குக் கிடையாது. புத்தகம் விற்கும் கழிவுத் தொகையில் தான் அவருடைய வாழ்க்கை என்றாலும், முதல் முயற்சியில் இருக்கும் பதிப்பாளர்கள், எழுத்தாளர்களிடம் அதற்காகப் பெரும் இடைஞ்சல் தரமாட்டார். புத்தகம் பதிப்பிப்பவர்கள், விற்பனையாளர்களிடம் இருந்து உரிய தொகையைப் பெறுவதற்குள் போதும் போதுமென்றாகிவிடும். ஆனால் பூபதி இவற்றிலெல்லாம் ”பெரியாரைப் பின்பற்றுபவன்; எப்படிப்பட்ட நேர்மையாளனாக இருப்பான்” என்பதற்கு சான்றாக இருந்தவர்.

பெரியாரின் கொள்கை பரவுவதற்கு தன்னை முழுமையும் ஒப்படைத்துக் கொண்டவர். போராட்டக் களங்கள், மாநாடுகள் என அனைத்திலும் பங்கேற்பவர். கூட்டங்களுக்கோ, திடீர் போராட்டங்களுக்கோ அவசரத்தில் இவரை அழைக்காமல் போய்விட்டால் உரிமையோடு கோபித்துக் கொள்ளக்கூடியவர். குழந்தைகள் மேல் அபார பிரியம் கொண்டவர். அதே நேரம் தனக்கு உடல்நிலை சரியில்லாத நேரங்களில் குழந்தைகளுக்கு நோய்த் தொற்று ஏற்பட்டுவிடக் கூடாதென்பதிலும் எச்சரிக்கையோடு இருக்கக் கூடியவர். ஆந்திரம், கேரளம், மகாராஷ்டிரம் உள்ளிட்ட பகுதிகளில் தேநீர்க் கடைகளிலும், உணவகங்களிலும் வேலை பார்த்த தனது இளமைக் காலத்திற்குப் பிறகு, திராவிடர் கழகத்தில் தன்னை இணைத்துக் கொண்ட பின் தனது உயிர்மூச்சாக பெரியாரைக் கருதியவர்.

முதன் முதலில் தனியாளாக இயக்கத்துக்கு வந்த பூபதி, தொடர்ந்து தனது அண்ணன், குழந்தைகள், அண்ணி என்று குடும்பத்தையே இயக்கக் குடும்பமாக மாற்றிய சாதனையாளர். அவருடைய அண்ணன் பூ.சுந்தரம் இன்று செங்கல்பட்டு கழக மாவட்ட அமைப்பாளராகவும், அண்ணி ஆனந்தி - திராவிடர் மகளிர் பாசறை பொறுப்பாளராகவும் இருந்து களப்பணியாற்றி வருகிறார்கள்.

உலகத் தமிழ் மக்கள் அரங்கம் (Orkut) நிகழ்ச்சிக்கு செல்லும் வழியில்
சென்ட்ரல் ரயில் நிலையத்தில் தோழர் உடுமலையுடன்...

அவரைப் போற்றவும், அவருடன் இணைந்து பணியாற்ற விரும்பவும் தான் பலரால் முடிந்ததே தவிர, அவருக்கு இணையாக பணியாற்ற முடிந்ததில்லை. யார் பின்வாங்கினாலும் தான் பின்வாங்காதவர். சிகரெட் உள்ளிட்ட எந்த பழக்கங்களும் இல்லாவிட்டாலும் கூட காசநோய் தீவிரம் காரணமாக எப்போதும் தனக்கு மரணம் நேரலாம் என்பது தெரிந்தும், கடைசி வரை தீவிரமாக உழைத்தவர். ஒவ்வொரு கூட்டத்திலும் வாசலில் புத்தகம் விற்கும் பூபதியை நான் புகைப்படம் எடுக்காமல் போவதில்லை. அப்படி விட்டுவிட்டாலும் அவரே அழைத்துவிடுவார். குழந்தையைப் போல கோபித்துக் கொள்வதும், தலை சாய்த்துச் சிரிப்பதும், கொடகொட என்று பேச்சும் அவருடைய தனி இயல்புகள்.

நான் இயக்கிய ‘திற’ குறும்படத்தில் அவரும், அவருடைய அண்ணன் மகள்கள் இருவரும் நடித்திருந்தனர். அதில் ஷகினாவை தூக்கிக் கொண்டு வந்து மருத்துவமனையில் கிடத்தும் குழுவில் இவரும் ஒருவர். வடநாட்டார் முகச்சாயலை ஒத்திருந்ததால், அவருக்கும் ஹிந்தியில் பேச ஒரு வசனம் கொடுத்திருந்தோம். அவர் ஆர்வத்தோடு, அதை எழுதி வாங்கி மனப்பாடம் செய்து கொண்டு வந்து பேசினார். அவர் பேசிய பேச்சுக்கு இணையாகக் குரல் பதிவு(dubbing) செய்வதற்குள் பெரும்பாடாகிவிட்டதென்பதும், கிட்டத்தட்ட 10 பேர்கள் பேசிப் பார்த்து அவருடைய உருவத்துக்கு சரியான குரல் கண்டுபிடிக்கப்பட்டது என்பதும் கூடுதல் சுவாரஸ்யமான தகவல்கள். இதன் காரணமாகவே அவரை ‘ரஜினிக்கு அடுத்து உங்களுக்குத் தான் இந்த ஸ்பீடு பேச்சு’ என்று கிண்டல் செய்ததும் உண்டு.

சமூக நீதிக் காவலர் வி.பி.சிங் அவர்களைப் பற்றி அவதூறாக எழுதிய “இந்தியா டுடே”வைக் கொளுத்தும் போராட்டத்தில் செங்கை பூபதி

அவரை விளையாட்டாக, புரட்சிப் புயல் என்றும் செங்கை சிங்கம் என்றும் அழைப்போம். “சார்.. சார்... என்னப் போயி அவரோட ஒப்பிடுறீங்களே.. நான் வேட்டிதான் (கொள்கை) முக்கியம்னு நினைக்கிறவன் சார். எனக்கு வெறும் துண்டு தேவையில்ல சார்” என்பார் சிலேடையுடன்!

பொதுச்செயலாளர்கள் கவிஞர் கலி.பூங்குன்றன், சு.அறிவுக்கரசு மற்றும் பெரியார் பேருரையாளர் கு.வெ.கி.ஆசான் ஆகியோர் சென்னையில் எங்கு கூட்டத்திற்குச் சென்றாலும் தானும் உடன் சென்று உதவுபவர். பெரியார் திடல் பணியாளர்களுக்கெல்லாம் பொங்கல் புத்தாடை எடுத்துத் தந்த அண்ணன் அன்புராஜ், பூபதிக்கும் ஒன்று எடுத்துக் கொண்டு வந்து வழங்கினார். அதைப் பெற்றுக் கொண்டு பூபதி அடைந்த மகிழ்ச்சிக்கு அளவேயில்லை.

அண்மையில் ”2ஜி அலைக்கற்றை: உண்மை என்ன? பின்னணி என்ன?” நூலை பெருமளவில் விற்று, அதில் தனக்குக் கிடைத்த கழிவுத் தொகையைக் கொண்டு வந்து, தமிழர் தலைவர் கி.வீரமணி அவர்களிடம் நன்கொடையாக வழங்கினார். ”நீ வச்சுக்கய்யா.. உடம்பைப் பார்த்துக்க... ” என்று ஆசிரியர் அன்போடு மறுத்தபோதும், ”இதை நாகம்மையார் குழந்தைகள் இல்லத்துக்கு கொடுத்துவிடுங்கள்” என்று உறுதியாக அதை ஆசிரியர் அவர்களிடமே தந்துவிட்டார்.

கடைசியாக செங்கை பூபதி தமிழர் தலைவருடன் எடுத்துக் கொண்ட ஒளிப்படம்

தலைவர், தொண்டர் யாராயினும் தனக்கு சரியென்று பட்டதை எடுத்துச் சொல்லும் துணிவாளர். கூடுவாஞ்சேரியில் நடைபெற்ற பொதுக்கூட்டத்தில் கழகச் சொற்பொழிவாளர் பெரியார் செல்வம் உரையாற்றிக் கொண்டிருந்தபோது ஆர்.எஸ்.எஸ். காலிகள் செய்த வன்முறையின் போது கூட்டத்தின் ஒருபகுதியில் புத்தகம் விற்றுக் கொண்டிருந்த பூபதி தாக்கப்பட்டு காயமடைந்தார். ஒவ்வொரு கூட்டத்திலும் ஏதோவொரு இருட்டு மூலையில் புத்தகம் விற்றுக் கொண்டிருக்கும் இவருக்கு மிரட்டல்களும் எதிர்ப்புகளும் உண்டு. அந்த எதிர்ப்புகளெல்லாம் அவரை கட்டிப் போட்டுவிடவில்லை.

அவரிடம் வந்து வம்பிழுக்கும் பலர், அவருடைய கேள்விகளுக்கு பதில் சொல்ல முடியாமல் தான் ஓடியிருக்கிறார்கள். கொள்கையையும், தலைமையையும் எந்தக் காலத்திலும், எந்தச் சூழலிலும் விட்டுக் கொடுக்க மாட்டார். இன எதிரிகளும், துரோகிகளும் இவரிடம் பேச்சுக் கொடுக்கவே அஞ்சுவர். ’பட்’ பட்’டெனத் தெறிக்கும் பதில்களில் அதுவரை யாரும் சிந்திக்காத கோணம் இருக்கும்.

சான்றுக்கு ஒன்று:

”பூபதி, புத்தகம் போட்டிருக்கிறோம். அதை விற்பனைக்குக் கொண்டு செல்ல வேண்டும். வழக்கமான அளவை விடக் கழிவு கூடுதலாக எடுத்துக் கொள்” என்றார் ஒருவர்.

”நான் எல்லாப் புத்தகங்களையும் விற்பதில்லை. கொள்கைப் பிரச்சார நூல்களைத் தான் விற்கிறேன்.” என்றார் பூபதி.

“நாங்களும் பெரியார் நூல்களைத் தான் வெளியிட்டிருக்கிறோம்” என்று இடைமறித்தார் கேட்டவர்.

“நான் நல்ல நோட்டை வச்சிருக்கிறேன். நீ கள்ள நோட்டைக் கொண்டுவந்து விற்கச் சொல்லுகிறாயே! நியாயமா சொல்லு” என்றார் பூபதி. அதன்பிறகு வந்தவர் வாயை மூடிக் கொண்டார்.

ஆம். எப்போதும் கள்ள நோட்டு புழங்காத தூய்மை பூபதிக்கு சொந்தம். பூபதியைப் போன்ற கொள்கைப் பற்றாளர்கள், உறுதியாளர்கள் திராவிடர் கழகத்திற்கே சொந்தம்! அவருக்கு என்றும் நம் வீரவணக்கம்!

வாழ்க பூபதி! பெருகட்டும் பூபதியைப் போன்ற களப் பணியாளர்கள்!!

காலம் முழுக்க அவர் சுமந்து விற்ற புத்தகங்கள்
இன்று அவரின் நினைவுகளைச் சுமந்து கொண்டிருக்கின்றன...

தமிழ் நாள்காட்டி: ஒரே சொடுக்கில்... உங்கள் தளத்தில்...

2011-01-31T01:39:00.004+05:30

”நித்திரையில் இருக்கும் தமிழா!

சித்திரை இல்லை உனக்குப் புத்தாண்டு
அண்டிப்பிழைக்க வந்த ஆரியக்கூட்டம் கற்பித்ததே
அறிவுக்கொவ்வா அறுபது ஆண்டுகள்

தரணி ஆண்ட தமிழனுக்கு

தை முதல் நாளே தமிழ்ப் புத்தாண்டு”

என்றார் புரட்சிக் கவிஞர்.

அறிவுக்குப் பொருந்தாத, ஆபாசக் கதைகளைச் சொல்லி உங்கள் ஆண்டுக் கணக்கு இது தான் என்று, அறுபது ஆண்டுகளை நம் தலையில் கட்டிவிட்டது ஆரியம். இந்த பண்பாட்டுப் படையெடுப்பைக் கண்ட தமிழறிஞர்கள் 1921-ஆம் ஆண்டு சென்னை பச்சையப்பன் கல்லூரியில் மறைமலை அடிகள் தலைமையில் கூடி விவாதித்தனர்.

திருவள்ளுவர் பிறப்பு கி.மு.31 எனக் கொண்டு தமிழ் ஆண்டைக் கணக்கிடவும், தமிழர்களின் பண்பாட்டுத் திருவிழாவான தை முதல் நாளே தமிழர்களின் புத்தாண்டுத் தொடக்கம் என்றும் முடிவு செய்தனர். கி.பி 1971-ஆம் ஆண்டு முதல் திருவள்ளுவர் ஆண்டு என்பதனை தமிழக அரசு ஏற்றுக் கொண்டாலும், தமிழ்ப் புத்தாண்டு என்பது சித்திரை 1-ஆகவே கருதப்பட்டு வந்தது.

தமிழ் உணர்வுள்ளவன் என்பதால் ஒவ்வோராண்டும் எனது நண்பர்கள் சித்திரை 1-க்கு தமிழ்ப் புத்தாண்டு வாழ்த்து சொல்வார்கள். அவர்களை மறுத்து விளக்கம் சொல்லி, தமிழ்புத்தாண்டு என்பது தை முதல் நாள் தான்; இது ஆரியர் திணித்த ஆபாசம் என்று விடைதர வேண்டியிருக்கும். இது என்னடா, இவனுக்கு பிடிக்கும் சொன்னால் அதையும் மறுக்கிறானே என்று அவர்கள் நினைத்திருப்பார்கள். இது எனக்கு மட்டுமல்ல, தமிழுணர்வாளர்கள் பலருடைய அனுபவமாகவும் இருந்திருக்கும்.

”நான் தான் கோபாலகிருஷ்ணன்’னு சொல்லிக்கிட்டு திரியுறேன்; எவன் அப்படி கூப்பிடுறான்?” என்று கமல் அலுத்துக் கொள்வதைப் போல, தை முதல் நாளே தமிழ்ப் புத்தாண்டு என்று சுவரெழுத்து, சுவரொட்டி, வாழ்த்தட்டை போன்றவற்றின் மூலமாக தொடர்ந்து பரப்புரை செய்து வந்தாலும், நாள்காட்டிகளும், ஊடகங்களும் ஏப்ரல்-14-அய் தான் தமிழ்ப் புத்தாண்டு என்று போட்டிருக்கும். இதனால் மக்கள் மனதிலும் அதுவே பதிந்திருந்தது. அதை மாற்ற அரும்பாடுபடவேண்டியிருந்தது.

தமிழ்ப் புத்தாண்டை முறையாக அரசு அறிவிக்க வேண்டும் என்று திராவிடர் கழகமும், தமிழ் உணர்வாளர்களும், எண்ணற்ற தமிழ் அமைப்புகளும் தொடர்ந்து குரல் எழுப்பியதன் பயனாக, முத்தமிழறிஞர் கலைஞர் ஆட்சியில் 9.4.2008 அன்று வெளியிடப்பட்ட அரசாணை எண் 70-ன் மூலம் ’பிரபவ’ முதல் ’அட்சய’ வரையிலான மூடநம்பிக்கை, முட்டாள் கணக்கு ஆண்டை பயன்படுத்தக் கூடாது என அறிவித்தது.

தை முதல் நாளை, தமிழ்ப் புத்தாண்டாகவும் பொங்கலை, எழுச்சியான தமிழர் திருநாளாகவும் கொண்டாட பல முயற்சிகளை வெகு எளிதாக மேற்கொண்டு வெற்றி பெற்றிருக்கிறார் கலைஞர். நகரங்களில் மங்கியிருந்த பொங்கலை அனைத்துத் தரப்பினரும் குறிப்பாக இளைஞர்களும், குழந்தைகளும் எதிர்பார்க்கும் வண்ணம் கலை நிகழ்ச்சிகள், வண்ண விளக்குகள், ஊரெங்கும் போட்டிகள், சமத்துவப் பொங்கல், சென்னை சங்கமம் என்று மாற்றிக் காட்டியிருப்பதை அனைத்துத் தரப்பினரும் ஒப்புக் கொள்வர்.

இந்தப் பண்பாட்டுப் புரட்சியின் வெற்றியை கடந்த இரண்டு ஆண்டுகளாக “தமிழ்ப் புத்தாண்டு வாழ்த்துகள்” என்று அத்தனை தமிழர்கள் வாயிலிருந்தும் கேட்கும்போது அடடா அந்த மகிழ்ச்சியில் கண்ணீர் நம்மை நனைத்துவிடுகிறது. ஒரு சில பேர்களாக இருந்து தை முதல் நாளுக்குக் குரல் கொடுத்துக் கொண்டிருந்த நிலை மாறி, இன்று அனைவரும், பொங்கலோ பொங்கல் என்ற வாழ்த்தொலியோடு, தமிழ்ப் புத்தாண்டு குறித்தும் பேசும் போது அந்த நெகிழ்ச்சியை, மகிழ்ச்சியை, புரட்சியை சாத்தியமாக்கிய கலைஞரை தமிழினம் என்றைக்கும் மறக்காது .

அப்படி, தமிழ்ப் புத்தாண்டினை நினைவூட்டவும், மீளமைக்கவும், பயன்பாட்டுக்குக் கொண்டுவரவும் தொடர்ந்து பாடுபட்டவர்கள் பலர். அதில் எனக்குத் தெரிந்து தொடர்ந்து தமிழ் நாள்காட்டிகளை உருவாக்கி, தான் காண்பவர்களுக்கெல்லாம் அதை இலவசமாகத் தந்து பரப்பிவருபவர் கல்பாக்கம் வேம்பையன் என்ற ஐவர் வழி வேம்பையன் அவர்கள். தமிழகம் முழுக்க இருக்கும் தமிழ்ப் பற்றாளர்கள் கைகளில் எப்படியாவது சென்று சேர்ந்திருக்கும். ஆண்டு பாதி முடிந்திருக்கலாம். ஆனால் இவர் கையில் எப்போதும், அந்த கையடக்க நாள்காட்டி இருக்கும். அவரிடம் பெற்று பலருக்கும் வழங்குவதை நான் வாடிக்கையாகக் கொண்டவன்.

உலக நாத்திகர் மாநாட்டுக்கு சென்றிருந்த போது, செங்கற்பட்டு மாவட்ட திராவிடர் கழகச் செயலாளர் மானமிகு. துரை.முத்து அவர்கள் நாள்காட்டிகளை வழங்கினார். ‘வேம்பையன் அய்யாதானே வழங்குவார்?’ என்றேன். அவர் தான் தயாரித்தார். இவ்வாண்டு அதற்கான தொகையை நான் ஏற்றுக் கொண்டேன் என்றார். பணி தொடர்வதில் பெரு மகிழ்வடைந்தேன். நானும் பெற்றுக் கொண்டேன்.

இணையத்தைப் பயன்படுத்தத் தொடங்கியபின் தமிழ் நாள்காட்டிகளைப் பலமுறை தேடியிருக்கிறேன். எளிமையாய் பயன்படுத்தும் விதத்தில் கிடைக்கவில்லை. இவ்வாண்டு எப்படியும் அதை தயார் செய்துவிட வேண்டும் என்று நினைத்திருந்தேன். இன்று அதை ஓரளவு முடித்ததில் பெருமகிழ்வு.

எனக்குத் தெரிந்த அளவில் பிக்காஸா மூலம் slide show ஆக உருவாக்கியிருக்கிறேன். அதற்கான embed code-அய் பயன்படுத்தி பிற பதிவர்களும் தங்கள் தளத்தில் பயன்படுத்திக் கொள்ளலாம்.

உங்கள் தளத்தில் இணைத்துக் கொள்ள:

தானாய் சுழல்வது(Auto Play)

தானாய் சுழலாதது (with out auto play)

இவற்றில் ஏதேனும் ஒன்றை உங்கள் தேவைக்கேற்ப இணையதளத்திலும், வலைப்பூக்களிலும் பயன்படுத்திக் கொள்ளலாம். அதில் சிவப்பு நிறத்தில் வழங்கப்பட்டிருக்கும் அளவை மாற்றிக் கொள்வதன் மூலம் பெரிதாகவோ, சிறிதாகவோ அமைத்துக் கொள்ளலாம்.

இன்னும் எளிமையாய் வலைப்பூக்களில் சேர்த்துக் கொள்வதற்கு ஏதுவாக கீழ்க்காணும் வடிவத்தில் “இணைத்துக்கொள்” சுட்டி வழங்கப்பட்டிருக்கிறது.

இதனைச் சொடுக்குவதன் மூலம் விட்ஜெட்டாக உங்கள் வலைப்பூவில் இணைத்துக் கொள்ளலாம். இந்த வாய்ப்பு இனி எப்போதும் எம் தளத்தில் பார்வையில் படும்படி வலது பட்டை மேற்புறத்தில் இருக்கும். ஒவ்வொரு மாதமும் அந்த மாதம் முதலில் வரும்படி இவ்விணைப்பு செயல்படும்.தமிழ் வலைப்பதிவர்கள் இதனைப் பயன்படுத்திக் கொள்ளவேண்டுமென்று கேட்டுக்கொள்கிறோம்.

மேலும் இதனை மேம்படுத்தி, தொடர்ந்து அடுத்தடுத்த ஆண்டுகளுக்கும் பயன்படும் வண்ணம் நிரலியை உருவாக்கித் தர நமது மென்பொருள் வல்லுநர்கள் முன்வரவேண்டும். ஏற்கெனவே எவரும் செய்திருந்தாலும் அதனையும் நாம் பரப்ப வேண்டும். இதற்கென tamilnaalkaatti.blogspot.com என்ற தனி வலைப்பூ தொடங்கப்பட்டுள்ளது. பண்பாட்டை மீட்கும் பணியில் நாமும் இணைவோம்.

'ரைம்' கவிதை

2011-01-26T17:49:00.001+05:30

ஆளாளுக்கு ரைம் (Rhym) கவிதை(!?) எழுதியிருக்கிறார்களே என்று நானும் அவ்வப்போது எழுதுவது உண்டு! (என்ன கொடுமையடா).
எழுதுவது என்றால் எழுதுவது அல்ல; பக்கத்தில் இருப்பவர்களிடம் சொல்வது... அவர்கள் சிரித்தால், மகிழ்ந்தால் 10 மறுமொழி வந்த மகிழ்ச்சி! (நம்ம அளவு அவ்வளவு தான்!)

அப்படி சொல்வதற்கு யாருமே பக்கத்தில் இல்லாமல், வாகனத்தில் சென்று கொண்டிருந்த நேரத்தில் ஒரு 'ரையும் கவிதை' உதித்துத் தொலைந்ததால், செல்பேசியில் பதிவு செய்துகொண்டு வந்து பின்னர் இங்கேயும் பதிவிடுகிறேன்.

"தாரில் போட்ட ரோடானாலும் ஒரு நாள் மழையில் கரையும்
அடுத்த முதல்வரை நாங்கள் தேட போதும் வெள்ளித் திரையும்
பண்பாட்டுப் படையெடுப்பால் மறந்தோம் கூத்தும் பறையும்
தோழர் என்று தோளில் கையிட தகுதி டீயும் பொறையும்
முல்லை அணையை உசத்தனுமாமே எந்தா சேட்டா பறையும்?"

(பின்குறிப்பு: ஒவ்வொரு வரியும் ஒரு வரிக் கவிதையாதலால் (!?) கவிதையா எனக் கேட்பவர்கள் மீது கவிதை பாதுகாப்புச் சட்டம் பாயும்!)

எல்லை தாண்டிய பயங்கரவாதம்!

2010-12-28T00:30:00.000+05:30

சிப்பிகள் பொறுக்க வந்தோம்
சிதைகள் தந்தாய் - எங்கள்
கடல் தமிழர் வாழ்க்கை இன்று
புதை குழி மண்ணாய்!

கடல் நீர் நடுவே பயணம் போனால்
குடிநீர் கிடைப்பது கடினம்;
கடல்நீர் நாட்டுள் பயணம் வந்தது
வடிந்தது எங்கள் உதிரம்!

நாட்டுக்குள் பூகம்பம் வந்தது
மக்கள் கடற்கரை சென்றனர்.
கடலுக்குள் பூகம்பம் வந்தது
கடற்கரையே காணாமல் போனது!

உயிரைப் பணயம் வைத்தோர்
உயிருடன் வந்தனர் - தங்கள்
உறவுகள் காவு போனதைக்
கண்டதும் வெந்தனர்!

கடல் என்னும் கந்துவட்டிக்காரன்
பணயப் பொருளை மாற்றி கைக்கொண்டான்!
தடைச் சட்டம் போட ஆளில்லை - கடல்
தடைக்கெல்லாம் தயங்குகிற ஆளில்லை!

இது
மனித குலத்தின் மீது
எல்லை தாண்டிய பயங்கரவாதம்!
இயற்கை
என்ன செய்யும் பாவம்?

ஆழ்துளை போட்டான்
அணுகுண்டு வீசினான்

கடற்கரைக் காடுகள் அழித்து
களியாட்ட விடுதிகள் கட்டினான்

நீரை உறிஞ்சினான்
நிலத்தடியில் வறட்சி..
கோலா பாட்டில் குளிர்ச்சி!

சுற்றுச்சூழலின்
சூத்திரம் மாற்றினான்..
தற்கொலைத் தூதனைத்
தானே தேடினான்!

தன்னை கவனிக்காத
மனிதனைத்
தானும் கவனிக்கவில்லை
இயற்கை!

பயங்கரவாதி இயற்கையா?
இல்லை மனிதன்!

கொலை
செய்தவனை விட
தூண்டியவனுக்கே
தண்டனை அதிகம்!
பெற்றுவிட்டோம்!

பழித்தது போதும்
இயற்கையை!
அது சுவற்றிலடித்த
பந்து!

நன்மையோ
தீமையோ
செய்ததே விளையும்

தீமை தொடர்ந்தால்
மனித இனம் அழியும்

இது
இயற்கையின் விதி!
அறிவியல் சமன்பாடுகளில்
அழியாத விதி!

(27.12.2004 அன்று சுனாமியின் தடங்களை அண்ணா நினைவிடம் தொடங்கி, நொச்சிக்குப்பம், டுமீங்குப்பம், பட்டினப்பாக்கம், சாந்தோம், ஸ்ரீநிவாசபுரம் முடிய வலிகளைச் சுமந்தபடி பார்த்துவிட்டு வந்தேன். பின்னர் ஒரு நாள் சுனாமியால் பாதிக்கப்பட்டோருக்கு நிதி திரட்டும் கலை நிகழ்ச்சியில், பரதநாட்டியத்தின் பின்னணியில் வாசிப்பதற்காக எனதருமைத் தோழி தேவி அவர்கள் கேட்டுக் கொண்டதற்கிணங்க எழுதப்பட்டது.)

இலவசக் கழிவறையும், சில கழிவுகளும்

2010-12-27T16:36:00.002+05:30

மதுரை பேருந்து நிலையம் அருகில் நவீன இலவச கழிப்பிடம் ஒன்றைக் கட்டப்பட்டிருக்கிறது! அவரைப் பாராட்டுவதை விட்டுவிட்டு அழகிரி படம் இருப்பதைப் புகைப்படம் எடுத்துக் காட்டி கிண்டல் அடிக்கிறார் ஒருவர். அங்கே ராசா படம் வைக்கவேண்டும்; பெண்கள் பகுதிக்கு கனிமொழி, நீராராடியா என்று ஏதேதோ பேசிக் கொண்டிருக்கிறீர்கள். வேலையத்த வெட்டிகளைப் போல உங்கள் அருவெறுப்பை இங்கே வந்து காட்டுவதா?

http://www.facebook.com/photo.php?fbid=1693166976473&set=a.1134458769117.21317.1456758830&pid=1725248&id=1456758830

கோடிகோடியாய்க் கோயிலுக்குக் கொட்டி அழுபவர்களும், திருவிழா, கொண்டாட்டம் என்று பாவக் கணக்கை தீர்க்க செலவு செய்து கொண்டிருப்பவர்களும் லட்சக்கணக்கில் இருக்கின்றனர். அப்படி நடக்கும் திருவிழாக்களில் கூட முறையாகக் கழிப்பிட வசதி செய்து கொடுக்காமல், போகும் வரும் இடங்களில் எல்லாம் அசுத்தம் செய்து ஊரையே கழிவறையாக்கிவிட்டுச் செல்லும் படி திருவிழா நடத்துகிற கோயில்களையும், அதன் மூலம் கொள்ளையடிக்கிற கும்பலையும் கண்டிக்க ஒருமுறையாவது உங்களுடைய விரல்கள் கணினியைத் தொட்டிருக்குமா? சுகாதரமற்ற குளங்களினாலும், கோவிலைச் சுற்றிய கழிவுகளினாலும் எத்தனை பேர் பாதிக்கப்படுகிறார்கள். அதற்கெல்லாம் கவலைப்பட்டதுண்டா?

சமூகத்திற்குப் பயன்படும் விதத்தில் கழிவறை கட்டிவிட்டவர் அழகிரி ஆதரவாளராக இருந்தால் அவரையும், மனமிருந்தால் அழகிரியையும் சேர்த்துப் பாராட்டுவதை விட்டுவிட்டு கிண்டல் அடித்துக் கொண்டிருக்கிறீர்களே! வெட்கமாயில்லை...?

ஊடகங்கள் உருவாக்கியிருக்கும் தோற்றத்தைக் கொண்டே, தொடர்ந்து வன்மம் நிறைந்ததும், கருத்தற்ற கிண்டலுமாக பேசிக் கொண்டிருப்பதும், கற்றோர்க்கு அழகல்ல!

கழிவறையில் அடையாளத்திற்காக படம் மாட்டப்பட்டிருந்தால், அதைக் கேவலம் என்றா கருதுவீர்கள்? அப்படியெனில் அதைப் பயன்படுத்தும் நீங்கள் அதைவிடக் கேவலமானவர்களா? நாம் கேவலமானவர்களா? ஏன், உங்களில் யாருக்கும் கழிவு வெளியேறாதா? கடவுளர், கடவுளச்சி படங்களை கழிவறைகளில் மாட்டியிருக்கிறார்களே! அதற்கென்ன பொருள்?

---------------------------------------------------------------------------------------------

இதை விட மோசமான, ஆபாசமான குறுந்தகவல்களும், மின்னஞ்சல்களும் தி.மு.க.வைக் குறிவைத்து எய்யப்படுகின்றன. ஸ்பெக்ட்ரம் குறித்த கேள்விகளுக்குப் பதில் தரத் தயார் என்று சொன்னாலும், நாடாளுமன்றத்தை நடத்த விடாத அராஜககும்பலைப் போலத்தான் இருக்கிறது இவர்களது நடவடிக்கை.

"ஸ்பெக்ட்ரம் பிரச்சினை - ஊழல் பிரச்சினையில்லை; கற்பனை நட்டம் என்ற கதை கட்டல்" என்று தெரிந்ததும், "அதுவும் இவர்கள் சொன்ன தொகையெல்லாம் சம்பந்தமே இல்லாத தொகை" என்று இதே துறைக்கான முன்னாள் அமைச்சர் அருண்ஷோரி சொன்னதும், "2001-இலிருந்து விசாரிக்க வேண்டும்" என்று உச்ச நீதிமன்றம் சொன்னதும் நடந்தபிறகு முறையான கருத்துகளை விட்டுவிட்டு, அவதூறு பரப்பும் விதமாக மட்டுமே வருவதை கவனித்தாலே இந்த கெட்டிக்காரர்களின் புளுகு எத்தனை நாள் என்று தெரிந்துவிடும்.

பாவாணர் துரோகியோ?

2010-12-15T18:35:00.000+05:30

துரோகி முத்திரை குத்துவதற்கு இப்போது ஆதாரங்களையெல்லாம் தேடி அலைய வேண்டியதில்லை.

கலைஞரைப் பாராட்டி, வாழ்த்தி யார் பேசினாலும், அவர்களுக்கெல்லாம் ’துரோகி’ முத்திரை குத்தி குதூகலிப்பதுதான் தமிழ் தேசியத்தை வளர்க்கும் பணி என்றும், ஈழத்திற்கு செய்யும் பணி என்றும் கருதிக் கொண்டு இணையக் களங்களில் எண்ணற்றோர் அலைந்து கொண்டிருக்கிறார்கள். இந்நிலையில் கலைஞரை கரிகால் வளவனோடு ஒப்பிட்டு ’திராவிட ஞாயிறு’* பாவாணர் அவர்கள் பேசியிருப்பதைப் படித்ததும், அவருக்கும் துரோகி முத்திரை குத்திவிடுவார்களோ என்று பயமாய் இருக்கிறது.

திரவிட மொழி நூல் ஞாயிறு பாவாணர் பார்வையில் கலைஞர்

”கரிகால் வளவனே திரும்ப நம் கருணாநிதியாராகப் பிறந்தானோ என்றுகூட நாம் நம்பும்படியாக இருக்கின்றது. அந்தக் கரிகால் வளவனும் காவிரி நாட்டிலேதான் பிறந்தான். இவரும் அந்த நாட்டிலேதான். அந்தப் பூம்புகாரை அவன் வளப்படுத்தினான். இவரும் இப்போது அதைப் புதுப்பித்து வருகின்றார்.... அவன் இளமையிலே பகைவராலே இடர்ப்பட்டுத் துன்பப்பட்டு அதிலிருந்து தப்பினான். அப்படியே இவரும் போன பொதுத் தேர்தலிலே (1971) எப்படியோ பகைவரிடத்தில் அகப்பட்டுத் தப்பினார்... அந்தக் காலத்திலேயே அவரைப் பற்றி ஏதாவது ஒரு புகைப்படமோ, பூச்சுப் படமோ இருந்திருந்தால், இவர் முகச்சாடை கூட ஒத்துப் போகுமோ என்றுகூட நாம் நினைக்கும்படியாக இருக்கிறது.”

- பாவாணர் உரைகள் - பக்கம். 82

நன்றி: கருஞ்சட்டைத் தமிழர் (அக்டோபர் 1-15, 2010)

ஏப்ரல் முட்டாள் முத்திரையைக் கையில் வைத்திருப்பவன் யார் முதுகில் குத்தினாலும், அவரெல்லாம் முட்டாளாகி விடுவார் என்பதுபோல் ஆகிவிட்டது ’துரோகி’ பட்டமும். முத்திரையை வைத்திருப்பவன், தன் முதுகில் புதிதாய் ஒருவர் குத்திவிட்டாலும், தானும் துரோகியாகிவிடுவோம் என்பது புரியாமல் திரிவது போல் இருக்கிறது.

* திராவிட ஞாயிறு பாவாணர் :

இதென்ன இத்தனை நாளும் மொழிஞாயிறு என்று தானே கேள்விப்பட்டு வந்தோம்; புதிதாய் என்ன ’திராவிட ஞாயிறு’ என்று சிலர் எண்ணக் கூடும். உண்மையில் நடந்தது என்ன? என்பதை பேராசிரியர் சுப.வீ அவர்கள் ’கருஞ்சட்டைத் தமிழர்’ அக்டோபர் 1-15, 2010 எழுதியிருக்கிறார்கள். அதனையும் அனைவரின் பார்வைக்கும் வைக்கிறேன்.

மறைக்கப்படும் திராவிடம்

தனித்தமிழியக்க முன்னோடிகளில் ஒருவரும், தன்னிகரற்ற தமிழ் அறிஞருமான ஞா.தேவநேயப் பாவாணர் அவர்களை மொழி ஞாயிறு என அழைக்கின்றோம்.

அறிஞர் பாவாணருக்கு ‘ மொழிஞாயிறு பட்டம் ’, எந்த ஆண்டு, எந்த அமைப்பால் வழங்கப்பட்டது என்பதை அறிந்து கொள்ள முயன்றபோது, புதிய செய்தி ஒன்று கிடைத்தது.

1957 ஆம் ஆண்டு சேலம் தமிழ்ப் பேரவையினர் பாராட்டு விழா நடத்திப் பாவாணருக்கும், பொன்னம்பலனாருக்கும் விருதுகள் வழங்கிச் சிறப்பித்துள்ளனர். இருவருக்குமான விருதுகள் மற்றும் பொற்கிழிகளைத் தந்தை பெரியார் வழங்கியுள்ளார். அவ்விழாவில், புரட்சிக் கவிஞர் பாரதிதாசனாரும் கலந்து கொண்டு பாராட்டுரை வழங்கியுள்ளார். பொன்னம்பலனாருக்கு அன்று வழங்கப்பட்ட பட்டம்தான் ‘தமிழ் மறவர்’ என்பது. இச்செய்திகள் அனைத்தும், பாவாணரின் இளைய மகனார் மணி என்ற தே.மணிமன்றவாணன் எழுதியுள்ள, ‘பாவாணர் நினைவலைகள்’ (பக்.197) என்னும் நூலில் உள்ளன.

இவற்றுள் ஒரு செய்தி முதன்மையானது. அறிஞர் பாவாணருக்கு அன்று வழங்கப்பட்ட பட்டம் ‘திரவிட மொழிநூல் ஞாயிறு’ என்பதுதானே அன்றி ‘மொழி ஞாயிறு’ என்பதன்று. சுருக்கம் கருதி ‘திரவிட’ என்னும் சொல் நீக்கப்பட்டுள்ளதாக எண்ணிவிடக் கூடாது. ‘மூதறிஞர் ராஜாஜி நகர்’ என்பது, எம்.ஆர்.நகர் என்று சுருங்குவதில்லை. ஆனால் தியாகராயர் நகர் என்பது ‘தி.நகர்’ என்றும், கலைஞர் கருணாநிதி நகர் என்பது ‘கே.கே.நகர்’ என்றும் சுருங்கிவிடுகின்றது.

‘திராவிட’ மறைப்பு வேலைகள் தொடர்ந்து நடைபெறுகின்றன. இனி நாம் பாவாணரைக் குறிப்பிடும்போதெல்லாம் ‘திரவிட மொழிநூல் ஞாயிறு’ என்றே எழுதுவோம். சுருக்கம் தேவைப்படின் ‘திராவிட ஞாயிறு ’ என்போம்.

(அன்று வழங்கப்பட்ட விருதின் படத்தையும், எடுக்கப்பட்ட ஒளிப்படத்தையும் கொடுத்துதவிய திரு. மணி அவர்களுக்கு நன்றி!)

நன்றி: கீற்று

இதில் இன்னொரு கொடுமை என்னவென்றால் ‘மறைக்கப்படும் திராவிடம்’ என்ற இந்தக் கட்டுரையை வெளியிட்ட கீற்று, கலைஞரைப் பற்றி பாவாணரின் பேச்சு அடங்கிய பெட்டிச் செய்தியை வெளியிடவில்லை. சரி, என் பயம் பலிக்குமா? இல்லையா? என்பதை இன்னும் சில நாட்களில் இணைய தளங்களைப் பார்த்துத் தெரிந்துகொள்ளலாம்.

என்னாச்சு பிளாக்கருக்கு? வலைப்பூ காணாமல் போச்சு :(

2010-12-14T09:25:00.000+05:30

திடீர் திடீரென சில வலைப்பூக்கள் காணாமல் போகின்றன. என்னவென்று அந்தந்த வலைப் பதிவரைக் கேட்டபோது தான் அவரும் கவனித்தார்.

இவ்வாறு ”நீங்கள் தேடும் வலைப்பூவைக் காணவில்லை. நீங்கள் இவ்வலைப்பூவின் உரிமையாளரானால் கணக்கில் நுழைக” என்று பதில் வருகிறது. தனது கட்டுப்பாட்டகத்துக்குள் சென்று அவர் பார்த்த போது மேலும் அதிர்ச்சி. வலைப்பூ இருந்ததற்கான அடையாளமே இல்லாமல் காணாமல் போயிருக்கிறது. ஆனால், google தேடலில், cached இணைப்பில் முந்தைய பதிவுகள் கிடைக்கின்றன.

சரி, இது குறித்து Blogger-க்கு தெரிவிக்கலாம் என்றால், அங்கே ஒரு வாரமாக இது குறித்து முனங்கி முறையிட்டுக் கொண்டிருக்கிறார்கள் போலிருக்கிறது. என்ன பிரச்சினை? என்ன செய்யலாம்? என்று

விவரம் தெரிந்தவர்கள் பாருங்கள். முடிந்தால் தமிழில் இது குறித்த விளக்கங்களைத் தாருங்கள்.

http://www.google.com/support/forum/p/blogger/label?lid=0271191b4249689a&hl=en

இது போல பதிவுகளைத் தொலைத்தவர்கள் அங்கே போய் முறையிடுங்கள். அவர்கள் தீர்வை முன்மொழியும் போது மின்னஞ்சலில் அது குறித்த தகவல் கிடைக்க வழியேற்படும்.

அப்புறம் என்னை மாதிரி பல பதிவுகள் வைத்திருப்போர், சுற்றுலாவிற்குப் போய்விட்டு ஆங்காங்கே பிள்ளைகள் தலையை எண்ணி சரிபார்ப்பதுபோல், எல்லாப் பதிவுகளும் இருக்கின்றனவா? இல்லை சுழலில் ஒன்றிரண்டு காணாமல் போய்விட்டனவா? என்று சரி பார்த்துக் கொள்ளுங்கள்.

விதையாக விழுந்தவர்கள் உரமாக மாறுவர்!

2010-11-27T18:38:00.000+05:30

எவன் சொன்னான் தமிழீழம்
மண்ணில் புதைந்ததென?
மாவீரர் இல்லங்கள்
தகர்க்கப்பட்டதென?

துயிலும் இல்லங்களைத்
துடைத்தெறிந்தோம்..
துகிலுரிக்கப்பட்ட உன்
தமிழச்சி போலென‌
கொக்கரிக்கட்டும்
சிங்களம் செருக்குடன்!

கல்லறைகளில் மட்டுமா
வீரர்கள் உறைந்தனர்!
தமிழீழ மண்ணெங்கும்
காற்றாய் நிறைந்தனர்!
இன்று அவ்வில்லங்கள்
இணையத்தில்..
என்றும் அவ்வில்லங்கள்
இதயத்தில்...!

புரட்டிப் போடட்டும்
வீரம் விதைத்த மண்ணை!
வரலாறு மறக்காது
விதைகளின் எண்ணை!

போயிற்று களம் என‌
அழுவது வீணடா!
ஒரு போகம் விளைந்ததும்
உழுவது ஏனடா?

உனக்குமா தெரியாது
உழவின் அரிச்சுவடி?

நல்லேரைக் கொண்டுழுது
அடிமண்ணை மேலெழுப்பி
சத்தாக்குவோம்!

நெல் வேரை உரமாக்கி
விளைச்சலுக்கு அதனையே
சொத்தாக்குவோம்!

அன்று நாம் விதைத்தோம்!
அவன் அறுத்தான்!!
முதல் போகம் முடிந்தது!
இன்று..
அறுத்தவன் உழுகிறான்
இனி...
நாம் விதைப்போம்..
நாம் அறுப்போம்!

விதையாக விழுந்தவர்கள்
உரமாக மாறுவர்!
உறுதியாய் நம் தமிழர்
தமிழீழம் காணுவர்!